سفينة نوح " وعجلت إليك رب لترضى "

راجية رضا الرحمن · #1 02-06-2009, 09:53 PM

سفينة نوح

صفحتنا دى عبارة عن سفينة " زى سفينة سيدنا نوح " اللى ركبها المسلمين فى وقت غلب عليه المعصية والبعد عن الله

ودلوقتى فى حياتنا للأسف الغفلة غلبتنا وشغلتنا عن مهمتنا فى الحياة

( طاعة الله عز وجل )

وعشان كده .. احنا قولنا نبنى سفينة صغيرة " هتكبر بوجودكوا ان شاء الله " نركب فيها كلنا ,, وستبحر بنا وسط بحر الحياة ,, فوق أمواج الغفلة ,, لترسو بنا على شاطىء طاعة الله عز وجل

سفينة سنحتمى بها من أمواج الغفلة والبعد عن الله

هنساعد بعض

ونثبت بعض

ونحمل بعض

وأحيانا نعاقب بعض " حين نقصر "

سفينة نوح .. عايزين نبحر بيها عبر أمواج الغفلة لنرسو على شاطىء
" الطائعات لله عز وجل "

وبفضل الله الأمة

مليئة بمن جعلت المولى عز وجل أول أولوياتها

مليئة بمن جعلت صلاتها ونسكها لله

مليئة بمن جعلت حياتها ومماتها لله

فى ناس عايشين معانا على نفس الأرض وتحت نفس السما ,, ولكن

مفيش فى حياتها أغلى من ( طاعة الله )

ولا أهم عندها من ( رضا الله )

أخواتى الحبيبات .. ربنا سبحانه وتعالى غنى عنا وعن طاعتنا " احنا اللى محتاجين نكون من الناس دى "

" احنا اللى هنخسر كتير أوى لو لم نكن منهم "

يلا لن أُطيل أكثر .. وخلونا نبدأ نشتغل

الحملة عبارة عن جدول أسبوعى للطاعة .. هنتفق فيه على ثوابت لازم نعملها

" فى ثوابت يومية & وفى ثوابت أسبوعية "

شروط الاشتراك فى الحملة وركوب السفينة :_

استحضار النية

النشاط والهمة

الإصرار والعزيمة

وكلنا هناخد بإيدين بعض إن شاء الله .. واللى هتقع فى الطريق كلنا هنساعدها تقوم بإذن الله

بس بجد لازم كلنا نشارك يا أخواتى ..

الأخوة فى الله من أغلى نعم ربنا سبحانه وتعالى علينا .. وأنا عارفة ومتأكدة ان كل واحدة فينا تتمنى انها تفضل طول حياتها مرتبطة بأخوات يحبوها بس لله مش لمصالح دنيوية

لكن لو إفتقدنا طاعة الله فى علاقتنا وأخوتنا " يمكن العلاقات دى كلها تنهار ولا حول ولا قوة إلا بالله "

طوق النجاة هو الطاعة يا حبيباتى فى الله .. لما نطيع ربنا سبحانه وتعالى مع بعض " قلوبنا هترتبط ببعض أكتر وهتعلو وتسمو فوق اى شىء ممكن يعكر صفو هذه العلاقات الجميلة فى الله "

شعار حملتنا

وعجلت إليك رب لترضى

أكيد كل واحدة فينا أقصى أمنياتها " رضا الرحمن عز وجل "

أكيد كل واحدة فينا تتمنى يوم لما تقف بين إيدين المولى عز وجل يناديها بإسمها ويقولها

أَمَتى ............ إنى راض عنكِ إذهبى فادخلى جنتى " وعايزينها فردوس أعلى إن شاء الله وبدون سابقة عذاب ولا مناقشة حساب "

وكأن لسان حالنا بالشعار بيقول " يارب هبذل أقصى جهدى وهعمل اللى أقدر عليه .. بس المهم أنول رضاك ومعيتك وحبك يارب "

اللهم ياربنا ارض عنا رضا لا سخط بعدها أبدااااااااااا

يلا حبيباتى ,,

أول اسبوع ان شاء الله هيبدأ من بكره السبت وينتهى بإذن الله الجمعة القادمة وهيكون علينا طاعات معينة لازم كلنا نعملها ونحتسب فيها النية دايما ونجدد نوايانا ونطلب من ربنا سبحانه وتعالى

الاخلاااااااااااااااااااااااص والقبول والمتابعة " حتى يُقبل العمل بإذن الله "

وأنا مش عايزة أى واحدة تخاف تشارك " مخافة الرياء "

.. رسولنا الحبيب صلى الله عليه وسلم حينما قال يوما

من أصبح منكم اليوم صائما ؟

سيدنا أبو بكر قال : أنا يا رسول الله

فسأل الحبيب صلى الله عليه وسلم : من اتبع منكم اليوم جنازة ؟

قال أبو بكر : أنا يا رسول الله

قال فمن عاد منكم اليوم مريضا ؟

قال أبو بكر أنا يا رسول الله

قال صلى الله عليه وسلم : ما اجتمعن فى امرىء إلا دخل الجنة

تفتكروا الصحابة لما رجعوا بيوتهم عملوا ايه بعد هذه البشارة ؟؟

أكيد " عزم وسعى " يبغون به إدراك ما أدرك أبو بكر رضى الله عنه وأرضاه

ولهذا السبب أخواتى .. هنحاول كلنا دايما نجدد نوايانا ونطلب من الله عز وجل الاخلاص .. ولا نخشى الرياء
" هندعى كتييييييييييييييييييييييييييييييييييير بالاخلاص "

وجودنا مع بعض يا حبيباتى هيشجعنا نستمر .. ولما نلاقى غيرنا بتعمل وتجتهد .. احنا كمان هنغار ونغبطها ونتنافس معاها

" وفى ذلك فليتنافس المتنافسون "

اوعوا الخجل او الخوف من الرياء يمنعنا نشترك فى الحملة ونركب السفينة .. او حتى نشترك بس نخاف نقول عملنا " ليكون رياء "

هنجدد نوايانا وندعو بالاخلاص ونتوكل على الله ونستعين بالله وناخد بإيدين بعض ان شاء الله .. وكل واحدة تدخل فى آخر اليوم تكتب أى جملة تعبر فيها عن حالها اليوم

الحمد لله مثلا .. أو أى تعليق منها " بس مهم أوى نعمل كده عشان نتونس ببعض فى السفينة :) "

" دلوقتى جه معاد ركوب السفينة "

جدول أول أسبوع

بسم الله .. اول حاجة تعالوا نستحضر النية وننوى بعزم وإصرار المرة دى على الاستمرا بإذن الله .. ونحاول كلنا نقرب من ربنا " شبر " وهنشوف بعدها كرم الله لينا ازاى هيثبتنا ويزيدنا وهنحس بتوفيقه وفضله فى كل خطوة بإذن الله

الاول تعالوا نتفق على ثوابت " مينفعش يومى يخلو منها " ............. مهما كانت ظروفى

1- أحب الأعمال إلى الله الصلاة على وقتها

أول لما أسمع الآذان أقوم جرررررررى لو فى ايدى ايه !! ... مهما كان اللى بعمله أول لما أسمع الآذان اقوم

لو بطبخ اطفى على الاكل

لو التليفون رن اوعى تردى

" الشيطان بعت لك حد فى الوقت ده بالذات يعطلك عن الصلاة فى أول الوقت " بجد بجد فكروا كويس وهتلاقوا تقريبا التليفون لازم يرن فى وقت الصلاة او قبل الاذان بدقيقه واحده .. لكن خلاص احنا مش هنرد ان شاء الله ,,

اتفقنا يا بنات ؟؟؟ 5 صلوات فى أول الوقت ضروررررررى

2- ورد القران

" ومعلش هنراعى اننا يمكن فينا ناس متوقفة لها فترة والبداية صعبة عليها فهنقول على الاقل حزب فى اليوم " بلاش جزء يا ستى عشان متهربيش مننا من أولها " ... بس ده اقل شىء ( حزب = 10 صفحات )

ولو قسمناهم على ال 5 صلوات .. بعد كل صلاة وانتى لسه على المصليه قبل لما تقومى اقرأى بس صفحتين اتنين ..

2 فى 5 صلوات = ال 10 صفحات " الحزب "

وطبعا اللى تحب تزود يبقى هاااااااايل .. بس الحزب على الاقل يعنى

3- أذكار الصباح والمساء وختام الصلاة

.. وهقولكوا على اقتراح بسيييييط جدا جدا ... يمكن نكون متعودين نصلى الفجر ونجرى على السرير " عشان كده بنستصعب أوى الجلوس للضحى "

لكن ايه رأيكوا .. نصلى الفجر وواحنا على المصليه نختم الصلاة

استغفر الله .. استغفر الله ... استغفر الله

اللهم أنت السلام ومنك السلام تباركت يا ذا الجلال والإكرام

" 33 سبحان الله - 33 الله أكبر - 33 الحمد لله " وتمام المئة لا إله إلا الله وحده لا شريك له له الملك وله الحمد وهو على كل شىء قدير

ووانا على المصليه قبل لما أفكر أقوم ... أمسك المصحف على طول وأقرأ الصفحتين بتوع الورد " مش هياخدوا 5 دقايق "

استنى برضو اوعى تقومى .... لسه أذكار الصباح :)

الشاطرة هتقولهم كلهم .. واللى شاطرة نص نص بس " هتقول منهم على الاقل 5 أذكار " ....

لو عايزين اكتب لكوا أذكار الصباح انا مستعدة " اللى تحب تقول واحنا تحت أمرها "

بعد كده قومى نامى وهتكونى على الاقل عملتى نص ساعه تقريبا طاعة " والله ما هتتعبك ولا هتاخد من وقتك ولا هتعطلك مهما كانت ظروفك إيه " .. ويوم ورا يوم هنزود 5 دقايق عشان ان شاء الله مع الوقت اوصل لحدددددد الضحى .. يعنى لو كل يوم زودت 5 دقايق والله كم يوم وهتلاقى بسهوووله جدا بفضل الله بتقعدى لشروق الشمس

بعد كده قومى نامى .. بس اوعى تنسى آداب النوم

" الوضوء - الذكر - النوم على الشق الايمن "

واحتسبى النوم بنية انك تقومى أقوى وأنشط فتقدرى تتعبدى أفضل

" فيكون نومك كله طاعة بإذن الله "

يتبع ان شاء الله

راجية رضا الرحمن · #2 02-06-2009, 09:58 PM

صباح الخير :)
صحيتى من النوم " الحمد لله الذى أحيانا بعد ما أماتنا وإليه النشور "
بس خلى بالك من حاجة مهمة أوى ... لو انتى من البنات اللى بيصحوا على الضهر " اوعى تضيعى منك صلاة الضحى " !!! معقول تضيعى اكتر من 360 حسنة بركعتين اتنين بس !!
لالالا .. أكيد مش هتستخسرى فى نفسك كم الحسنات والصدقات ده " صلاة الضحى صدقة على كل مفصل فى جسمك .. يعنى 360 صدقة على 360 مفصل

طيب ياترى لو مصلناش الضحى .. هنجيب منين كل يوم 360 صدقة !!!!
ركعتين هتركعيهم هتاخدى عليهم بإذن الله كل الاجر ده .. آآآآآخر وقتها خلى بالك قبل الضهر بتلت ساعة " اوعى تضيعيها " والله هتخسرى كتير أوى لا حول ولا قوة الا بالله ,,
بعد كده كل واحدة تمشى يومها زى ما هى عايزة .. المهم تحافظى على الصلاة فى أول الوقت وتحافظى على ورد القران " الصفحتين اللى اتفقنا عليهم" واوعى تنسى بعد صلاة العصر وقبل لما تقومى من على المصلية " اقرأى صفحتين التلاوة " وقولى أذكار المساء " اوعى تكسلى عليهم "
كمان اوعى تنسى بعد لما تصلى العشا تصلى الشفع والوتر " اوعى يضيعوا منك "
وهنتفق على ركعتين " قيام ليل " خديهم بعد العشا على طول لو حسيتى نفسك هتكسلى عليهم "
يبقى اتفقنا على ايه ؟؟ نراجع سوا بسرعة
1- صلاة فى أول الوقت
2- ورد قران على الأقل حزب كامل مينقصش صفحة
3- أذكار الصباح " بعد الفجر على طول " وأذكار المساء " بعد العصر على طول "
4- صلاة الضحى " ركعتين كبداية "
5- صلاة الشفع والوتر
6- ركعتين قيام ليل بعد العشا على طول
على فكرة فى حاجة مهممممممممممة جدا انا مجبتش سيرتها أبدا رغم ان فضلها كبير جدااااااا ... عشان أسهلها عليكوا
" هى طاعة مصاحبة لينا طووول اليوم " من الفجر لحدددد العشا
مش هقول هى ايه عشان اشوفكوا مصحصحين ولا نمتوا منى :)

راجية رضا الرحمن · #3 02-06-2009, 10:19 PM

لسه فى حاجتين مهمين أوى لا يخلو منهم يومنا .... الذكر والدعاااااااااااااااء

الذكر طاعة لها تأثير راااااااائع على القلب " بجد القلب بيكون غير القلب " .. مع الذكر بتحسى ان فى قلب جوا بينبض " بتحسى نبضه مختلف عن الوقت اللى بتغفلى فيه عن الذكر لا حول ولا قوة إلا بالله "

عندنا كل يوم إجبارى :) نص ساعة ذكر ودعاء واختارى الوقت اللى يناسبك مش هنحدد لهم وقت معين

لكن المهم على الأقل نصف ساعة كاااااااااملة ذكر ودعاء

100 صلاة على رسولنا الحبيب صلى الله عليه وسلم

100 سبحان الله وبحمده

100 استغفار

غراسك فى الجنة ,, سبحان الله والحمد لله ولا إله إلا الله والله أكبر

لا حول ولا قوة إلا بالله كنز من كنوز الجنة " كنوز الدنيا بنموت عليها !! " فما بالنا بكنوز الجنة "

حسبنا الله ونعم الوكيل " أد ايه محتاجينها فى الوقت ده " كتيــــــــر صح ؟؟

عموما هى نصف ساعة كاملة أذكرى فيها ما شئتِ من الأذكار المأثورة عن الحبيب المصطفى صلى الله عليه وسلم

اللى فات كله أعمال " يومية " هنتعاهد أن يومنا لا يخلو منها

عندنا أعمال أسبوعية " اختارى انتِ لها اليوم المناسب لظروفك " .. لكن المهم لا يمر الأسبوع إلا ب ........................

1- صلة رحم " بأى وسيلة لو حتى مكالمة تليفون "

2- بر الوالدين " سواء أحياء أو أموات "

3- صدقة " ولو أن تلقى أختك فى الله بوجه حسن "

4- دعوة إلى الله ولو بمطوية تعطيها لأى حد فى مواصلة أو محل أو أى مكان " للنساء طبعا "

5- تحفيظ القراااااااااااااااااااااااااااااااااان " خيركم من تعلم القران وعلمه " ... اوعى تفوتك خيرية تعلم وتعليم القران " ولو ظروفك مش مناسبة إنك تنزلى ممكن على النت تجدى من يساعدك بسهووووووولة جدا والحمد لله

6- طلب العلم " وممكن يكون ده بمساعدة أخواتنا فى تفريع الدروس لطلبة معاهد إعداد الدعاة "

أوصيكم باستحضار النية قبل كل عمل " خصوصا الأعمال الأسبوعية " لأن استحضار النية بيهون مشقة العمل وبيولد فى القلب لذة ومتعة وفرحة بالعمل

وممكن فى أول اليوم نسحتضر نية شاملة لكل طاعات اليوم
"إن صلاتى ونسكى ومحياى ومماتى لله رب العالمين .. لا شريك له وبذلك أُمرت وأنا من المسلمين "

عشان لو نسيت استحضر النية فى بداية أى عمل " يكون العمل لله " لأنى استحضرت نية شاملة أول اليوم بفضل الله "

راجية رضا الرحمن · #4 02-06-2009, 10:28 PM

منزلة المؤمن تُقاس باتباعه للرسول صلى الله عليه وسلم

فكلما كان تطبيقه للسنة أكثر " كان عند الله أعلى وأكرم "

والسنة هى من يُثاب فاعلها ولا يُعاقب تاركها

وهى تتكرر فى اليوم والليلة ,, وباستطاعت كل واحدة فينا القيام بها

ياترى كم من الدرجات والحسنات بتضيع مننا بسنن غفلنا عنها !!

يقول الله عز وجل فى الحديث القدسى

" ومازال عبدى يتقرب إلى بالنوافل حتى أحبه "

ولهذا السبب : كل أسبوع إن شاء الله هنراقب أنفسنا فى سنة محددة من سنن الحبيب المصطفى صلى الله عليه وسلم " نتلمسها فى كل أوقاتها " ونحرص على عدم تركها أو نسيانها

سنن هذا الأسبوع واللى إن شاء الله مش هنضيعها ولا يوم " ولو ضيعناها هيكون فى عقاب "

" أذكار الصباح والمساء & أذكار النوم والاستيفاظ "

راجية رضا الرحمن · #5 02-06-2009, 10:41 PM

معلش أنا عارفة انى طولت عليكوا :)

بس لان ده أول أسبوع ومحتاجين نضع أسس نسير عليها طول رحلتنا إن شاء الله

باقى محاضرة الأسبوع والأسبوع ده إختارنا محاضرة للشيخ حازم شومان

" عفوا لقد نفد رصيدك "

http://www.hor3en.com/vb/showthread.php?t=15302

مطلوب مننا كلنا نحملها ونسمعها .. وكل واحدة فينا تدخل تقول

استفادت منها إيه .. أو غيرت فيها إيه ؟ .. أو أثرت فيها إزاى

ده واجب إجبارى للكل إن شاء الله

أحبكنّ جميعا فى الله .. ويارب يكون برنامج الحملة خفيف والكل يقدر ينفذه بإذن الله

وعايزين كلنا ندعو لأختنا الحبيبة " أم مغفرة " بظهر الغيب لانها هى صاحبة الفكرة وأول واحدة أخدت خطوة فى هذه الحملة

ربنا يارب يبارك لها ويجازيها عنا جميعا خير الجزاء

يلا يا بنات " أروا الله من أنفسكم خيرااااااااااااااااااااا
"

وخلونا ناخد بايدين بعض " بلاش واحدة مننا تقع فى السكة
" :)

وياريت لو كل اتنين قريبين من بعض تآخوا بما يناسب ظروفهم ووقتهم حتى نضمن الاستمرار ونقوى على وسوسة الشيطان