هاسقي و انا مابذرتش اي بذرة

[هنوود]

 

حسقي إيه وأنا مبذرتش ولا بذرة ؟؟؟
:/ :/
كلمات أطلقتها من بين أكوام الكتب
وكلمات تؤلم قلوب الكثييييير حين يتأمل في حاله
للأسف مضى شهر رجب بسرعة جدًا
وكل واحد منهمك في حاجة
اللي بيمتحن واللي عنده شغل ومش ملاحق واللي معندهوش حاجة وفاضي بس مكسل وبيقول لسة بدري والشهر طويل واللي عنده وقت بس مش لاقي قلبه
وهوووووب لقينا الشهر خلص
وواضح إن المفروض كان فيه حاجات كتييير ننجزها فيييه ونبدأ
طب ودلوقتي إيه الحل


المشكلة مش في إننا نلاقي حل
المشكلة في إحساسنا:


بدل ما نبدأ ونتوب من اللي فات وقفنا نتحسر على أحوالنا شوية
ونقارن
ياااه دا أنا رمضان اللي فات كنت مستعد من قبل ماشهر رجب كمان يبدأ
لألأ أنا كنت أفضل من كدا بكتييير
انا ختمت في رجب السنة اللي فاتت مرتين ،انا صمت كتيييير جدًا في رجب وسمعت دروس وانا عارف ومتأكد إن على قدر الإستعداد يكون الإمداد من الله عزوجل
وأنا بالمنظر دا مفيش استعداد، انا خايف رمضان يضيع مني السنة دي بجد، خايف أن لا أُوفق للفوز برمضان، خايف ملاقيش قلبي فيه ..
طب وبعدييييين مش حقولك خلي عندك أمل والكلام اللي انت حافظه دا
اثبببببببببببببببت اعمل stop
حلو أوووووي إحساسك بالذنب دا بس دا نهايته طريقين :-
الأول:- يا ياخدك لطريق اليأس والإحباط وتشتغل بس مفيش نفس حاسس إنك مهما عملت برده مش حتوصل // ونتيجة دا إنك مش حتوصل فعلاً سامحني ماأنت فقري ياعم أحسن ظنك بالله ...
الثاني:- إنك تحلف عليها هي مين ؟؟ نفسك قولها أقسمت بالله يانفس لتنزلن والله ماحترتاحي تاني والله حتشتغلي والله لأرين الله ما أصنع قولها حخلي شعاري لكل حاجة في الدنيا فإنهم عدو لي إلارب العالمين


ومن هنا انا حبدأ موضوعي
يااااه لو تقول لكل حاجة تأخرك عن السير إلى ربك
فإنهم عدو لي إلا رب العالمين
إلا ربنا حبيب قلبي وقرة عيني كله يهون بس ربنا لأ
أنا آسف ياسيدي ويامولاي أنا قصرت
انا كان نفسي تفرح بتوبتي مع التائبين لكن يارب حبدأ والله مش عشان بس أفوز بالحسنات
بس عشان بحبك يارب
يارب انت اللي بتكرمني وبتديني كل حاجة بحبها انا مش حزعلك مني تاني ومش حقصر ..
تعرف تقعد تتذلل وتتودد لربنا كدا عشان يرضى عنك ويسامحك
اسمع الفيديو دا حيفرق معاك كتير جدًا وحتحس أد إيه ربنا كريم



ياعم اسمع الكلام مسمعتش عن الدخول لله بالله
مسمعتش إن باب الإنكسار أكثر الأبواب التي تساعدك على الوصول ولكن قليل اووووي اللي بيقف على الباب دا !!!
إذن مش عايز أطّول في هذه النقطة كتييير
بس خليك متفائل
افرح بالأيام الجمييييلة اللي احنا داخلييين عليها
افرح بفضل الله عليك لأنه جعله تستنشق هذه النفحات
بطّل تبص وراك وتبص على اللي ضاع منك خليه يحركك لقدام
احلف على نفسك، ضاعف عملك،
انوي من دلوقتي إنك في رمضان حتفعل كذا وكذا لأن محدش ضامن حيحضر رمضان السنة دي ولا لأ؟؟،
خلي عندك عزيمة صادقة، واصدق مع الله ...

دلوقتي عندي شوية وصايا متواضعة أو حاجات عايز أركز عليها
حبيت أفيدكم بيها وناخد بإيد بعض ممكن ؟؟ حاضر حتفضل :-
1-
اسأل نفسك أهم سؤال؟؟
انا عايز أفوز برمضان ليه؟؟
لو لسة إجابتك عشان هو شهر الخير والأجور فيه كبيرة بإذن الله
إيه رأيك السنة دي تكون عايز تفوز برمضان
عشان تعوض اللي فات عشان ربنا يحبك
نفسي ربنا يحبني، نفسي أكون قريب من ربنا، نفسي بجد حياتي بعد رمضان تكون الغالب عليها القرب من ربي، نفسي ربنا يفتح عليا بمعاني جميلة في قلبي، وأعيش زي السلف معنى ان جنتي تبقى في قلبي وأنسي يكون بربي..
ماتخلي هي دي الثمرة بتاعت السنة دي
ماتهتم السنة دي بأثر الأعمال لأن اهتمامك بالكم كل مرة بيكون بعدها إنك بترجع تاني زي الأول ..دا مش معناه إن تمشي بسرعة النملة لكن حاول كل حاجة جديدة تسمعها تروح تطبقها وقدام عينك وعجلت إليك ربي لترضى .. عشان انت بس ترضى وتحبني
ولو صدقت الله بجد ياااااااااااااااااااه ع اللي حيحصلك
قال تعالى:[طَاعَةٌ وَقَوْلٌ مّعْرُوفٌ فَإِذَا عَزَمَ الأمْرُ فَلَوْ صَدَقُواْ اللّهَ لَكَانَ خَيْراً لّهُمْ ]
2-
من أروع الدروس التي تركت في نفسي أثر عظيم
درس لاتضيعي وقتك بصراحة أول مارأيت العنوان وزي ماناس كتير بتعمل استنتجت الدرس حيتكلم عن إيه وقلت آه إن شاء الله مضيعش وقتي،وحسيته حيكون موضوع سرد، لكن سبحان الله قدر الله لي في مرة ولم أجد غيره فسمعته وبجد غيّر كتيييير في حياتي أينعم في وقت لسة بيضيع، بس الضمير صحى وعلى الأقل بقى الواحد بيشعر بوخزة كدا لما يضيع وقته
مكنتش متخيل إن تضيييع الوقت ممكن يكون معصية وحاجة كبيرة
أكتر عبارة هزتني في الدرس : علامة المقت ضياع الوقت
ياالله للدرجة دي
وبصراحة لقيت العبارة صحيحة جدًا فإستحالة بكون قريب من ربنا وعايش وقتي أي كلام، وفي أوقات الفتور والبعد عن ربنا بلاقي وقتي بيضيع ومعاه كمان قلبي بيضيع
لذا من الفترة الجاية يا شباااااااب
أ)حاول متدخلش على فيس بوك أو تويتر او المواقع دي كلها اللي بتضيع وقت مهووولي حتى لو بتدخل تقرأ حاجات مفيدة قلل الوقت بالتدريج لحد ماتوصل ل10 دقايق مع إن العشر دقايق دي والله تقدر تجيب فيها 300صلاة على النبي ودا بجد والله واستفدته من الدرس، ادخل وانت مركز انا داخل ليه؟؟ وححط إيه؟؟ متسيبش وقتك كدا وخلاص.
ب)نفس الأمر للمواقع والمنتديات في هدف انا داخل أقرأ شئ معين او أضع شئ معين في فترة زمنية معينة متسيبش الموضوع مفتوح، طب لو إنت قائم على موقع أو النت دا حاجة مهمة وفيها شغل يبقى هنا الأمر مختلف بس راقب قلبك وخد النية وحاول تستفيد..
ج)المكالمــــــــات التليفونية يا أخـوات أكتر من 5دقايق اقفلي السكة وقتك هو رأس مالك متسمحيش لحد يعطلك وتذكري دائمًا "فإنهم عدو لي إلا رب العالمين" صحبتك مش حتيجي تنورلك قبرك محدش حينفعك إلا عملك..
بشكل عام الحفاظ على الوقت في كل المجالات وتذكر أن الله عليك رقيب وإن مع ضياع الوقت يضيع خشوعك وتضيع الكثير من المعاني بداخلك..
رابط تحميل الدرس صوتي من هنا
وهذا ملخص درس "لاتضيعي وقتك"ومناقشة الدرس

3-
الناس اللي مبتصليش السنن وبعدييييين؟؟ مينفعش حد يسبقنا نفسنا ربنا يحبنا
، ابدأوا اتعودوا على السنن من دلوقتي عشان لما ييجي رمضان متبقاش تقيلللة عليكم..
عايزأحكيلكم تجربتي مع السنن بصوا بصراحة عشان الموضوع انا مجربه سنين كتير في رمصان لما حافظت على السنن في رمضان والله بعده فضلت محافظ عليها وبعترف والله إن أنا اللي تركتها أنا اللي تركتها والله وجدت ثبات عليها ولم أشعر بكسل ولكن نفسي والشيطان قعدوا يقولولي عندك محاضرة انجز الدكتور دخل صلي الظهر بسرعة ودايمًا الترك بيبدأ من سنة الظهر تليها الشفع والوتر يتبعها سنة العشاء وتجر معها قيام الليل وطبعًا ينتهي الأمر بضياع الفجر وترجع ريما لعادتها القديمة وكأنك ياأبو زيد ماغزيت ..
لأ السنة دي محتاجين حب الرسول في قلوبنا يزيد محتاجينن نعرف يعني إيه فضل إني أحافظ على سنة لأن دا طريق جمييييل حيوصلنا لحب ربنا
قال تعالى: " قُلْ إِنْ كُنْتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ وَاللَّهُ غَفُورٌ رَحِيمٌ " [آل عمران:31]ولمتابعة موضوع السنن بشكل أكثر فاعلية والموضوع بجد جميييل وبسيييييط والكثير استفاد منه الفترة اللي فاتت تابعونا في سلسلة
♥¤ ღ على سنتك أعيش ღ..في الطريق إلى رمضان ¤♥

رائعة بمعنى الكلمة وميسرة جدًا....

4-
عيزين نكثر من الصياااااام وعيزين نقلل الأكل
فاكر لما كنت بتأكل في رمضان حاجة خفيفة جدًا وتقوم عشان تعرف تركز في التراويح،
اهو احنا دلوقتي عيزين نعمل ريجييييم ونبطل ناكل على الفاضي والمليان، متخافش اخواتك مش حيلخصوا الأكل بس بجد الأكل الخفيف دا بيساعدك على التركيز في الصلاة وعلى قيام الليل والتركيز في قراءة القرآن وبرده توفيييير في ظل الظروف الاقتصادية اللي احنا فيها ..
5-
الشيخ يعقوب وصى في فضفضة الجمعة دي
بحاجات جميييلة تساعد الواحد يفوق من غفلته وينتبه في شعبان
مختصرها:: أ)التوبة الصادقة، ب)النية الماضية"ودي إنك تنوي من دلوقتي حتعمل إيه في رمضان"، ج)العزيمة الصادقة"على العملو...إلخ"، الواجب العملي أوصى بقراءة 3أجزاء من القرآن، 8ركعات في الضحى متقلش عنهم،6ركعات بين المغرب والعشاء،11ركعة قيام..
بصراحة انا سمعت وابتسمت واتكسفت من نفسي ايه النوم اللي انا فيييه دا الناس دي ماشاء الله شغالة وانا ..........!!!
6-
آخر حاجة
حنهتم جدًا بذكر الله وحنحافظ كمان على أذكار المساء ونهتم بالسنن
حتوصل لكام استغفار وكام صلاة على النبي في عشر دقايق تقدر بإذن الله على 300سبحان الله وبحمده سبحان الله العظيم
مش غيران بقا من اللي بيوصلوا لـ 10000 مرة صلاة على النبي او استغفار ؟؟


لي رجاء
بالله حاول ان تقرأ هذه السطور هي فعلا سطور حتفيدك كتيير جدًا في هذا الموضوع وستزيد حماسك
الحلم الإيماني...ما حلمك؟؟ ما هدفك؟؟....

وتابع كمان الرسائل القصيرة للإستعداد لرمضان صغيرة وفيها المفيد
مشروع "جهز قلبك "للإستعداد لرمضان 1434 للشيخ / هاني حلمي


كل سنة وانتم طيبيييييييين
يارب يبلغنا رمضان وهو عنا راضِ غير غضبان
يارب أعنا وارزقنا حبك
يارب حبنا يارب حبنا يارب حبنا
والسلام عليكم ورحمة الله وبركاته
!حقوق النشر للجمييييع !

[أم عبد الله]

جزاكِ الله خيرا.

[سفري بعيد وزادي لن يبلغني]

بارك الله فيك ِ وكثر من امثالك ِ


موضوع قيييييييم جدا لا حرمت ِ الاجر