[الشافعى الصغير]

 

العمارة اللى تحتها بتاع الكشرى

كتب على سلامة
عمارة كبيرة.. كبيرة
تيجى تمانين دور..
فيها عيادات كتيرة
ومفيهاش ولا دكتور..
المدخل معمول رخام..
مليان برد وكلام..
والميه بتطلع لفوق
والساقية لسه دايرة
ومتعلق فيها طور..
عمارة ألف شقة
لكن هس هس..
فيها الوقت ميت
يعنى الساعة سبعة
زى اتنين ونص..
ولما النور يروح
تتكعبل ف الزبالة
اللى راقدة فى كل دور..
وتسأل ع السكان
وفين روح المكان
تلاقيهم نايمين هناك
جنب شوال البصل
عند بتاع الكشرى
اللى تحت العمارة..