[الشافعى الصغير]

 

مصرى مكسر
كتب على سلامة


قالت لى شكلك جميل
وانت نايم
غرقان ف سريرك
بتشخّر..
زى الأطفال
تضحك فجأة
وفجأة تكشر..
وتبرطم بكلام
مش مفهوم
عربى ضعيف
مصرى مكسر..
وتكش ف روحك وتقرفص
خايف من إيه
اتكلم
اصرخ
شاور
عبر..
ترجع وتحن
لروحك من تانى
وتاخد المخدة ف احضانك
اقرب اكتر..
تدور وشك
تبعدنى
اقول بيخونى
مش ممكن
مش هاقبل
مش هاقدر..
تتنرفز تغضب وترفس
يعنى تيجى ع البطانية الغلبانة
وتتشطر..
طب اديك متعرى وبردان
مش قبل ما تعمل زعلان
كنت تفكر..