اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ
فى يوم 14 مارس وفى تمام الساعة التاسعة صباحا ـ لسة راجع من الأجازة وبقول يأهلا بالعمليات ـ روحت فى معادى ولسة بدور على الراجل بتاع البدلة قولت أحسن اروح المراكز المحترمة وتكييف ونظام وبدلتك موجودة وفندقة ـ انا المرة دى اللى سبته ـ روحت شوفت الليستة قبل ماأدخل وظبت نفسى على الحالة اللى داخلها ـ لقيت صمت رهيب مبيقطعوش غير صوت التكييف قولت مش مهم واقف واقف العملية كبيرة والفرجة لبليل
الحالة الاولى والوحيدة : سرطان فى البلعوم وممتد زى ماهنشوف واخد المرئ ومتفسح فى البطن ـ ربنا يحفظنا ـ
الباشا الكبير كل شوية يجى يدى التعليمات المفروض سايب اللى تحتيه يشف الرقبة والمفروض كان هيتشال الزور ويتركبلها وصلة من الامعاء ـ ده كان المفروض ولكن المفاجأت معانا مبتخلصش وهنشوف ـ
الدكاترة اللى تحت الباشا شفوا الرقبة وكانت الامور ماشية تمام قعدنا نتفرج ساعتين ونص على ازاى هما بيفصلوا كل جنب من الرقبة، وكان فى فاصل ،ان العيانة بتصحى ،ولكن بتحصل فى احسن العائلات نامت تانى وكل الامور مستقرة
لغاية لحظة فصل البلعوم والزور اللى فيهم الورم وطبعا مكانوش متوقعين المفاجاة بعد فصل البلعوم والزور نسأل الباشا ونديه ولا نفصل على طول ، كالعادة افصل افصل ـ انا قولت فى بالى هما ازاى هيقدروا يرجعوا كل حاجة زى ماكانت انا لو مكانهم همشى لسة صغير بقى وقولت لو العيانة فاقت هتموت من شكلها ربنا يعافينا ـ مش هتلاقى رقبتها اصلا وكلها مقصات وبعدين حطوا الفوطة على الرقبة وسابها وراحوا للباشا ويريحوا ربع ساعة بعد 3 ساعات من الشغل المتواصل تخللهم سؤال لينا انت عارفين الحالة ايه ـ طبعا انا شوفتها فى اللستة فسكت لانى مش فدائى بصراحة والهدوء كنز لا يفنى ـ فواحد فدائى قالهم سرطان وهو ناسى انه واقف فى مركز اورام ـ المشكلة انه كان مضايقهم ـ فعينك ماتشوف الا النور تك تك تك على اللى اتقاله واللى سمعناه والشغل اسرار يا سيد والرقابة معانا بقى ـ قالوا يتسلوا علينا بقى واحد واحد جم عندى ـ قوتله طبعا ياباشا الحالة كذا وانت بتعمل كذا ـ ولولا ستر ربنا كنت حصلت صاحبنا فالحمدلله على اختراع الليستة ودى نصحتى :مش عارف متتكلمش مع حد اكبر منك ومتعرفوش
المهم رجعوا بعد الريست وفتحوا البطن وعايزين يطلعوا الأمعاء ويخدوا حتة منها لقوا الورم منتشر فى البطن ومش هينفع يعنى لو كنا استنينا مفصلناش الزور والبلعوم كان احسن ـ بصراحة مش عارف بس هما لفوا ورجعوا وقالوا هنقفل نعمل فتحة فى الجلد للعاب وفتحة فى بطنها تاكل منها ـ وربنا يشفيها ـ والعملية اللى كان مقرر لها 6-8 على كلامهم بقت 4 ساعات تقريبا ومكملتش علشان هما قفلوا لأن مش هينفع الوصلة الخطة اللى كانت هتتعمل للعيانة وربنا يشفيها
وطبعا الباشا الكبير مجاش علشان دوره اتلغى فى العملية فالحمدلله على نعمة الصحة وانا كنت واقف علشان اشوف هيلموا الرقبة ازاى والبطن ـ بصراحة انا لاول مرة احس ان العيان فى العمليات بيتعامل معاه كأنه مش عايش ـ شغال برحتك ومفيش آه ـ طبعا بيعكر صفو الهدوء لو واحد اتكلم مش فى وقته او العيان حب يصحى غير كده ولا الدموع
وبكده نستفيد بلاش تفصل قبل متجهز اللى هتوصل به وتتأكد انه هينفع ـ ده رأى من غير دليل علمى ـ ده اللى حسيته انهم مكنوش متوقعين انهم مش هيوصلوا فاكرينها عملية كاملة وكنا هنتعزم معاهم على الغدا بس الظروف بقى
تانى حاجة اياك تتكلم مع حد متعرفوش ولو اكبر منك خصوصا لو مش عارف وحتى لو عارف متتكلمش ـ الهدوء الهدوء ـ كنز لا يفنى ومش هيعرف قيمته غير اللى يتكلم
وكفاية كده لانى روحت بعد الحالة
مش معقول هتفرج طول النهار بقى
وكمان رجلى وجعتنى 4 ساعات وزيادة واقف
ونويت اشوف حل لرجلى ان شاء الله
وإلى لقاء فى الحلقة الجاية
وياريت متكنش زهقت من الموضوع
هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية مفاجأت غير متوقعة بجد