مراسل عايز ينسى
عايز انسى طابور العيش
وانسى مشكلة الانبوبه
وانسى بلدنا المنهوبه
وانسى اللى عايز يبقى رئيس للمخروبه
وانسى اى مسئول
من اللى سابوا الناس فى السيول
وانسى تعديل الدستور
وانسى اللى ساكنين فى القبور
وانسى انفلونزا الطيور
وانسى مشاريعنا الفاشله
فى توشكى وابو طرطور
انسى تصدير الغاز
واحنا عندنا ازمة بوتاجاز
وانسى قطر العياط
وانسى قطر الصعيد
والباشا محتكر الحديد
وانسى زحمة المواصلات
وانسى الانتخابات
وانسى فتاوى الفضائيات
وانسى العشوائيات
وانسى المدرسين والمدرسات
وانسى الاهرام وانسى الاخبار
وانسى صاحب ال40 مليار
لا مش بالجنيه بالدولار
وانسى انه خلى بلدنا افقر من زنزبار
وانسى المعارضه وانسى الاحزاب
وانسى الثعالب والدياب
وانسى اوربا وامريكا وانسى الصين
المتقدمين عننا بسنين
وانسى كيلو اللحمه ابو تمانين
وانسى اننا فى الزباله غرقانين
وانسى الماده سته وسبعين
والماده سبعه وسبعين
وانسى فريق الساجدين
وانسى الفول والطعميه
وازهى عصور الديموقراطيه
وجامعة الدول العربيه
والجماهيريه الليبيه
والكفيل فى السعوديه
وانسى بطرس غالى و الضريبه العقاريه
وانسى الطلعه الاولى الجويه
والمصالحه الفلسطينيه
وانسى العراق وافغانستان
وانسى ايران و انسى باكستان
وانسى انى مديون
وغيرى ياخد فى المسلسل كام مليون
وانسى القذافى والبشير
وانسى كل ملك وكل امير
اللى حاكمين من سنين
من غير تغيير
منقول مع بعض التعديلات
التعديل الأخير تم بواسطة د. حازم ; 03-23-2010 الساعة 11:57 AM
|