((أكلات ووصفات الأخوات مع التقييم ... ))

[(أم عبد الرحمن)]

 

بسم الله الرحمن الرحيم

الموضوع ده جديد نوعا وكل أخت هتكتب فيه نوع أكلة مفضلة لديها وتتقن عملها ...
يعنى المطلوب اسم الوصفة
مقاديرها
طريقة عملها
وبعدين الأخوات يجربوها وأنا أولكم طبعا ونحط جنبها التقييم بتاعها من أول نجمة لحد خمس نجوم ....
ايه رأيكم ؟

[أم البراء]

فكره جميله جدا يا راجيه الجنه
وانا هحط كام وصفه بحبها وبعرف اعملها وهيه وصفات سهله ان شاء الله يمكن الكل عارفها
لكن انتى قولتى انك اولنا طب فين وصفتك؟؟؟
مستنين الوصفه

[(أم عبد الرحمن)]

اقتباس المشاركة الأصلية كتبت بواسطة أمة الله فكره جميله اوى يا راجيه الجنه وانا هحط كام وصفه بحبها وبعرف اعملها وهيه وصفات سهله ان شاء الله يمكن الكل عارفها بس انتى قولتى انك اولنا طب فين وصفتك؟؟؟ مستنين الوصفه

ربنا يكرمك أختى الحبيبة أمة الله بس انتى فهمتينى غلط ، أنا أقصد أنى أول واحدة هجرب الوصفات واديكوا تقييم عليها لكن عشان خاطرك هبدأ بوصفة جميلة اوى وهى :

البسبوسة

المقادير :
1ونص كوب سميد
نص كوب جوز هند
ثلاثة أرباع كوب سكر
علبة قشطة ( نسلة أو أى نوع )
بيضة واحدة
3 ملاعق بودرة لبن ( مش لبن )
3 ملاعق صغيرة بكينج بودر
مكسرات للتزيين

الطريقة :
تعجن جميع المقادير مع بعض جيدا باليد ( ممكن تحتاج قليل من اللبن وممكن لا حسب نوع السميد )
تبطن صينية مقاس 30 بالسمن ( خفيف )
تفرش العجينة بالتساوى وتزين بالمكسرات الموجوده ( فستق مجروش أو أنصاف لوز أو بندق )
وممكن من غير مكسرات خالص ( حسب الذوق وحسب الموجود )
تخبز فى فرن على درجة 350 أو متوسط الحرارة
ملحوظة : ضعى الصينية على الرف العلوى قدر الامكان عشان لاتكون غامقة من الآسفل ...
ثم تسقى فور خروجها بالشراب البارد ( مش من الثلاجة لكن يكون برد مش سخن )
وبالهنا والشفا

[مع الله]

very good

it is great idea

thanks Ragia

[أم معاذ]

اذا كان على الحلويات سهله بأذن الله


التورته

أناهكتبلكم طريقة عمل التورته وطبعا متجربة

أولا الكيكه الأسفنجية بالدقيق العادى

المقادير:

من كوب ونصف الى كوب وثلاثة أربع دقيق

معلقة مش مليانه بودر

كيس فانيليا

8 بيضات

كوب ونصف سكر مطحون

الطريقة

1- يضرب السكر المطحون مع البيض من ثلث لنصف ساعة حتى يصير العجين فاتح اللون وثقيل القوام

2-نضع البودر على الدقيق فى وعاء

3-يتم اضافة الدقيق المخلوط بالبودر على الخليط بس معلقه معلقة وتقلب فى اتجاة واحد يعنى كل ماتحطى معلقة دقيق على السكر والبيض تقلبى يمين مش مرة يمين ومرة شمال
والتقليب يكون بالراحة اوى عشان الكيكة ماتكلكعش

4- تبطن الصينية وتوضع فيها الكيكة لمدة نص ساعة
اول10 دقايق حرارة هادية مثلا 180 وبعدين على شويه مثلا 200

وبالهنا والشفا


التذويق
أبسط خامات ممكن تذوقى بيها


أولا :الكريمه

اشترى ثمن كيلو كريمة خام بدون سكر
وتضيفى عليها نصف كوب سكر مطحون
وتضيفى عليها ثلث كوب لبن وشوية ميه زيهم حسب الكريمة انتى عيزاها تقيلة ولا خفيفة لو خفيفة زودى ميه وتضرب بالمضرب حتى يصبح العجين متماسك

لوضع الكريمة

تشق الكيكة من النصف وتذوق من الداخل بالكريمة ثم تركبى النصفين وتغطى الوش والجوانب بطبقة كريمة

الذواق النهائى

ممكن بالفواكة أو الشكولاته

*لتذويق بالكنبوت المعلب (فواكة اخرى)

يقطع شرائح ويوضع فى مثلثات مثلا او على الجوانب على حسب رؤيتك التجميليه

* لتذويق بالشوكولاته
الشكولاته الخام تشترى تمن مثلا وتبشرية بسكينه مشرشرة وتنشريها مع (فرماسيل) ملون أو بنى وتعملى ورورد وتحطى عليها كريز أحمر بيبقى شكلة ناطق


الذواق مش مشكلة حسب رغبتك انتى


يارب تكونوا فهمتو وأى استفسار انا فى الخدمه

ملحوظه : تعملى الكيكة وتضربى الكريمة وتحطها تسقع متبقاش شيحه

فى يوم واليوم اللى بعد كده تذوقى عشان النتيجة تبقى افضل

[(أم عبد الرحمن)]

تسلمى ياأم عمار
بكرة الجمعة ومستنيين النتيجة
وماتنسوش تكثروا الصلاة على النبى ليلة ويوم الجمعة ....

[(أم عبد الرحمن)]

تسلمى ياحبيبتنا ياأم معاذ على التورتة

[أم البراء]

هيه اكله تعتبر من السلطات
مكوناتها بسيطه جدا وسهله (سلطه باذنجان)
2 حبه متوسطه باذنجان
ملح
فلفل اسود
قليل من قطرات الخل
معلقه كبيره طحينه
الطريقه
قومى بقلى الباذجان فى كميه من الزيت وبعد القلى قومى بنزع القشره الخارجيه لها ثم اهرسيها فى طبق
جهزى الطحينه بوضع كميه قليله من الماء عليها ثم اضافه الملح والخل والفلفل الاسود مع التقليب
ثم ضفيها على الباذنجان المهروس وقلبيها الى ان تتداخل المكونات مع بعضها
وقدميها بارده وبالهنا والشفا

[أم البراء]

ودى وصفه تانيه ايضا للباذنجان
(البابا غنوج)
المكونات
2 حبه كبيره باذنجان
1حبه فلفل اخضر مقطع مكعبات
1 حبه فلفل احمر مكعبات
1 حبه طماطم متوسطه مكعبات
1 بصله متوسطه مكعبات
ملح وفلفل اسود
الطريقه
تقلى حبات الباذنجان فى الزيت وقشر وتهرس فى طبق
ثم قومى باضافه جميع المكونات السابقه عليه وقلبيها
ضعى كل تلك لمكونات فى صنيه ثم ضعيها بالفرن لمده ربع ساعه
وتقدم بارده او ساخنه

وبالهنا والشفا يا حبايبى
وفى وصفه كمان بالباذنجان
بس المره الجايه ان شاء الله

[أم معاذ]

الأخوات الحبيبات

فين الأكلات الجميلة



؟!!!!!