وبعدين بالمايه وننقعهم شويه بالمايه والخل طبعا مع تنضيف اي بقايا او شعر وخلافه
ودي صورة الكرشه
انا قطعتها مربعات صغيره عشان هربطها بعد كده بالممبار
علي شكل فيونكات
ودي صورة الممبار
طريقة غسل الممبار
نقطعه حتت صغيره بالمقص حسب ما تحبي
وتحت الحنفيه ننضفه من بره وبعدين نقلبه ونشيل بالسكينه الطبقه الي جوه وبعدين نغسله كويس بالملح الخشن والدقيق وننقعه شويه بالخل
الاول نجيب كل قطعه من الكرشه ألي علي شكل مربع ونتنيها ونربطها بقطعه من الممبار شبه الفيونكه
اسفه نسيت اصور الخطوه دي بس هتشوفو صوة الشكل النهائي
ونشيل الباقي من الممبار علشان نحشيه بعد كده
نغلي ماية علي النار ونحط فيها الكرشه والكوارع ونغليها غلوتين ونشل الريم كل ما يظهر وبعدين نصفيها ونكب الماية
في حله تانيه نكون غلينا ماية ونحط فيها لحمة الراس ودي صورتها وهي نية ومعاها قطع من الطحال
وتغلي غلوتين مع ازالة الريم كل مايظهر وبعدين نصفيها ونرمي الماية
نجيب حلة الضغط ونضع فيها ماية نظيفه ولما تغلي نضع الكوارع والممبار واللحمه وكل الي غليناه الاول
ومعاهم بصله صحيحه متقشره
ولما تغلي نشيل الريم ونضيف توم كتير مهروس وملح وفلفل ابيض وهيل ومستكه
ونغطي الحله ونسيبها علي النار حوالي ساعه وبعدين نفتحها بعد ما نطفي وكل البخار يتبخر ونشيل منها الكرشه والطحال والكوارع لأنهم هيكونوا استووا
وبعدين نقفلها تاني عشان لحمة الراس تكمل سوا لمدة ساعه الا ربع
وبعدين نطلعهم في صينيه بالشكل ده
نرجع لباقي الممبار
نعمل الحشو
نقطع خضره (كزبره +شبت +بقدونس) ونغسل رز
ونقطع بصل وكله مع بعض
نعصر طماطم ونضيفها عليهم ونضيف نعناع ناشف وملح وبهارات وفلفل
نقلب الحشو كويس ونحشي الممبار وبعد ما نخلص نغرزه بالشوكه علشان مايتفكش في السلق ونخلي بالنا مانزودش الحشو
نحضر صلصة التحمير
معلقة زيت علي النار ومعاهم توم مفروم ولما يتحمر نزود شوربه
ومعلقة صلصه ونسيبهم يغلو شويه
ونحط منها علي وش اللحمه والكوارع والكرشه وندخلها الفرن تحت الشوايه
ونحضر العيش بتاع الفته
نقطعه قطع صغيره ونحط عليه باقي صلصة التحمير وندخله الفرن يتحمص
نحضر الرز للفته نغلي كوب شوربه مع كوب ماية ونضع عليهم كوب رز مغسول ونظبط الملح والفلفل ونوطي النار لحد ما الرز يستوي
صلصة الفته معلقة زيت علي النار ومعاها توم مفروم ولما يتحمر نزود معلقتين خل ونسيبها دقيقتين تغلي وبعدين عصير الطماطم وملح وبهارات لحد ما تتسبك
نرجع للمبار نغلي ماية علي النار ومعاها ورق لوري نحط عليهم الممبار وبياخد تقريبا 45 دقيقه وبعدين نطلعه ونحمره في الزيت ونحمر الطحال ونحطهم علي طبق التقديم وهنا الصوره معاهم فيونكات الكرشه
نطلع العيش بتاع الفته ونحط عليه الرز ونزود كبش شوربه
ونضيف اخر حاجه الصلصه بتاعة الفته
ودي صورة اللحمه والكوارع بعد خروجها من الفرن
ودي صورة الشوربه بتاعة الممبار
وهمممممممممممممم
ودي الصوره كامله
اتفضلو بالف عافيه علي قلوبكم
وصفة مبتكره *كوارع ,,فته,, ممبار ,, لحمة راس >>> كله من مطبخي وبالصور
العرض العادي
