الله أكبـر - الله أكبـر إتفتح باب الجهاد يا إخوه من لها ؟ بس إقلع عين الجمل الأول :)

[جود واي إن لايف]

 

الله أكبر الله أكبر إتفتح باب الجهاد يا أخوه هيا بنا .




الموضوع فعلاً عنوانه لا يخالف محتواه .. ولكن

تراه يخالف محتواه لمن حصر الدين في بعض الصور التي هي من الدين أيضاً ولكن يوجد منها صور كثيرة ..

بإختصار .. حتى لا أطيل .

الفتره الي فاتت .. والحاليه ..

فيه خمول غير طبيعي .. وفيه كسل قوي جداً في كل شيء بداية من العبادات والمعاملات ..

تحس بالبلدي كده

( ان الحياه بقت دلعه ) ملهاش طعم ..

ولو لقيت طعم ..

هيكون طعم الانهزاميه طعم الذل واشياء أخرى كثيره ..

وده ليه اسباب كتير ..

انا مش جي أكذب عليكم واقول محدش يزعل يا جماعه واحنا كويسين وبخير والاسلام قادم والحركات دي ..

اكيد الواقع بتاعنا فيه اشياء تزعل ..

لكن ده طبيعي جداً

فهي سجن المؤمن !!!

عايز ايه حضرتك لما تكون في سجن ..

نجيب واحد يزغزك ويقولك إضحك ..

طبيعي هيكون فيه اشياء تزعل ..


لكن فيه شيء مهم حابب اوضحه ..


عرفت مؤخراً ان الجمل عينه .. ترى الاشياء كلها ضخمه ..

لانه لو شافك بحجمك الطبيعي ممكن يفعصك ..

ايه الي يخليه زي ما الناس بتقول ( ينخ ) لصاحبه .. لانه شايفه أكبر منه بكتيييييير .. فعينه كعدسه ممكن تقول ( مُكبره ) للاشياء


بالظبط كده :

يبقي الجمل نخ لصاحبه لما شافه كبيييييييييييييييييييير ( أكبر من حجمه ) ولو كان شافه بالحجم الطبيعي كان ممكن يدهسه في الارض .


هي دي الفكره .. للاسف كثير من المسلمين ومش هبالغ لو قلنا ( إننا إحنا أهل الدين ) معظمنا ركب عدسات لاصقه ( لانسيز ) من ماركة نزلة السمان ( منطقه في الهرم مشهوره بالجمال )

كتير مننا ركّب لنفسه هذه العدسه المكبره .. فشوفنا أعدائنا بحجم أكبر من حجمهم وعشان كده بدءنا ( ننخ ) ليهم ..

أيها الجمال

أقصد أيها الاخوه :


مين الي ركب لينا العدسات دي ؟

مش هكذب عليكم .. واقول اعدائنا ..

هم صحيح بدؤها كفكره وكمخططات أنهم يشغلونا بأشياء تافهـه عشان نكون تافهين وبعدها يبدؤا يعملواحملات اعلاميه

( قد ايه هم متقدمين وقد ايه هم متفوقين منظمين وقد ايه هم مهذبين ) ولحد ما وصل علينا وقت .. قلنا فيه .. امتا بلدنا تكون زي بلاد برا . )


فهتلاقيهم مثلاً في برامجهم يجيبوا ازاي الطفل الصغير أخترع الجهاز الفلاني وانه عقبري في الكمبيوتر والبرامج الفلانيه .. وان هناك في الشركه الفلانيه الموظفين ممكن يقوموا يلعبوا فيديو جيم في وسط العمل لانهم بيأدوا الي عليهم ..


وفي المقابل تلاقي التلفزيون عندنا يجيبلك العيال الصغيره بتلعب في المجاري .. ويقولك احنا بنطالب السيد المسئول إنه يوفرلنا علبة الفول !!



ويجيبلك في الجرايد انهم اخترعوا الصاروخ الفلاني وتلاقي في قناه الجزيرة ( الوثائقيه ) بتشرح قدرات الطيارة الفلانيه وازاي الجندي بتاعهم بيدرب وهكذا ..



المخطط كبير واكيد كلنا فاهمينه ..

الي يضايق بقا اننا احنا كمان بقينا نساعد في تحقيق المخطط ده .. بالانهزاميه والكسل وتضخيم الباطل وكلنا مركبين العدسات الجمليه ..

ومستصغرين نفسنا ..

يا اخوه ايه احساسكم .. ؟


لما تقروا الاية دي :

" إن الله يدافع عن الذين امنوا " [الحج : 38]


حد مصدق ؟

ليه مستصغر نفسك ..


مش هطول عليكم ..

الموضوع النهارده مختلف ..

وهدخل في الموضوع مباشرة ..

بس إدفع الاول :)


صلى الله عليه وسلم


الموضوع وما فيه ..

انا رسمت رسم بياني صغير .. عايز أوضح بيه الفكره ..

الرسم انا خليته من غير أرقام خالص عشان محدش يقولي اني بحدد شيء معرفوش ..

وبقول قبل ما حد يعترض ده رسم بياني تقديري ..


















الرسم ده بيوضح ايه ..

لو إفترضنا ان أهل الخير باللون الأخضر ..

وأهل الشر باللون الأحمر

والعوام باللون الأصفر

واللون الأبيض ( المنافقين ) مش الابيض الي حول الرسم لاء الي جوا المنحنى هتلاقيه جوا الرسم في النص بالظبط مش هتلاقيه باين وهيكون قليل

لانهم موجدين في كل مكان ربنا يعافينا واياكم.




طيب النسب دي ليه كده ؟


انا مثلاً كنت فاكر لو أهل الأرض 1000 واحد أنا كنت فاكر 100 كويسين وبنحارب ضد ال 900 الباقيين ..

لاء طبعاً ..

طيب واحد تاني يجيي يقول .. ( ياعم بطل أحلام ) اذا كان المسلمين لسا محصلوش ثلث أهل الارض .. فما بالك بالملتزمين منهم قد ايه من الناس ؟


هقولك .. ان اللون الاصفر الي اقصد به العوام .. مش أقصد عوام المسلمين فقط .

فالرسم البياني ده تقدر تطبقه علي المسلمين بس وعلي العالم ككل .



لو المسلمين بس :

يعني هيبقي الاخضر اهل الخير من المسلمين .. والاحمر أهل الشر من المسلمين
والاصفر عوام المسلمين ..

ولو حبينا نطبقه علي العالم كله :

هتلاقي الاخضر بردوا أهل الخير من المسلمين .. والاحمر أهل الشر من المسلمين ومن غير المسلمين ...

اللون الاصفر والعوام من المسلمين وغيرهم ..

ايه ده ؟

هو ممكن يبقى واحد مش مسلم لكنه مش من أهل الشر ومش معادي للدين ؟

أقولك طبعاً

" لا ينهاكم الله عن الذين لم يقاتلوكم في الدين ولم يخرجوكم من دياركم أن تبروهم وتقسطوا إليهم إن الله يحب المقسطين [الممتحنة : 8]

يعني في فئه صحيح كافره لكن لا تحاربك في دينك


طيب ,,,


معناه ايه الكلام ده


معناه

أن زي ما في فئه مؤمنة صابره تعمل لهذا الدين .. وأقصد بأهل الخير في الرسم البياني هم الذين ( يعملون للدين ولنصر الدين )

وأقصد باللون الاحمر ( يعملون للصد عن هذا الدين )


فزي ما في أبطال وهبوا نفسهم وحياتهم وأموالهم لخدمة الدين الاسلامي ,, ( وأحسب أهل المنتدى منهم )

كذلك فيه ناس وهبوا وأخلصوا ( لمعتقدهم ) وقدموا انفسهم وأرواحهم واموالهم فداءً للصد عن هذا الدين وللدفاع عن الشيء الي بيعتقده ..

عايز أوصل يعني في الاخر ان الحرب ... قوية وفيه ناس في الوسط ( عوام ) هم الغنيمه وفيه منافقين في النص شويه هنا وشويه هنا ..



يا اخوه انا مش بتكلم عن أعداد ولا حاجه .. بس الي بيشتغل للدين الاسلامي مش قليل زي ما احنا فاهمين ..

اذا كان مشترك في فرسان السنه بس بتاع 70 الف واحد .. ده غير المنتديات التاني غير الاخوه الي مش بيدخلوا نت اصلاً

وكمان الي بيشتغل للصد عن الدين مش كتيير جداً زي ما احنا حاسين ..

ساعة بيجي احساس لينا .. يخلينا نفتكر ان كل الدنيا بتصد عن الله وان كل الدنيا بتحارب الدين .. ان شاء الله الموضوع مش كده خالص ..

كل الفكره اننا مركبين العدسه ..


بالاضافه ان اهل الشر .. ليهم بعض الامكانيات الي ممكن تكون وصلت الفكره دي لينا ..


* بعض الامكانيات فسهل انه يوصل لمركز مرموق وسهل انه يحصل علي المال من هنا ومن هناك ..


ازاي ؟

بالرغم من أنك في حرب ,, الا انك عندك أخلاق في الحرب .


ومش أقصد بكده انك متقطعش شجره ولا تقتل طفل .. الكلام ده في الجهاد في أرض المعركه تحت ظل السيوف .

انا بتكلم عن حربنا دلوقتي الي احنا فيها دلوقتي حالاً

ربنا أمرك بالجهاد بس

قالك عشان أساعدك لازم تسمع الكلام ..

والدليل ..

" إن الله يدافع عن الذين آمنوا "

يعني عشان تنال دفاع ربنا .. لازم تكون من المؤمنين وعشان تكون من المؤمنين يبقا تنفذ الي ربنا امرك بيه ..

دلوقتي . أهل الشر معاهم اسلحه كتير انت متقدرش تستخدمها حتى ولو كنت تقدر تجيبها .. زي ايه ؟

يعني مثلاً

يقدروا يسخروا من نبيك .. انت متقدرش تعمل العكس

يقدروا مثلاً يكذبوا في شغلهم ( زي زكريا بطرس ) , لكن انت حرام عليك تكذب .

يقدروا يعملوا فيديوهات واغاني فيها موسيقي انت متقدرش تعمل اي شيء فيه موسيقا.

يقدروا يعملوا اشياء يجذبوا بيها الناس .. سواء حلال او حرام .


يقدروا يمثلوا افلام ومسلسلات ( وبالفعل ده حاصل ) يجيبوا فيها متبرجات واغاني ,, أنت متقدرش ( واقصد بمتقدرش المقدره الشرعيه ) لانه حرام عليك

يقدروا يدفعوا رشاوي انت متقدرش

يقدروا مثلاً يقولك بص واحده محجبه وبتزني ويجبلك صورتها .. او منتقبه وبتعمل كذا .. انت متقدرش تعمل العكس لانه لا يجوز ليك انك تظهر نصرانيه بتفعل وبتفعل ..


يعني في دينهم لا حدود طالما هيفضحك ..
لكن انت العكس . الحدود الشرعيه ( تطبق عليك كمسلم ) وعندنا الغاية لا تبرر الوسيلة


ومن الكلام الي فات ده .. انت بتحس انهم كتيييييييييييييييير وانهم بيعملوا اشياء كتير ..

لا والله ..


بعد الي قولته ده ..

آلا يطمئن قلبك ..

( إن الله يدافع عن الذين آمنوا )

آلا يطمئن قلبك


" ليبلغن هذا الأمر ما بلغ الليل والنهار ، ولا يترك الله بيت مدر ولا وبر إلا أدخله الله هذا الدين ، بعز عزيز ، أو بذل ذليل ، عزا يعز الله به الإسلام ، وذلا يذل الله به الكفر "


آلا يطمئن قلبك

" قال موسى لقومه استعينوا بالله واصبروا إن الأرض لله يورثها من يشاء من عباده والعاقبة للمتقين [الأعراف : 128]

المهم تكون مصدق !!


يبقى الصبر لوحده مش كفايه .. لازم ايه ؟

تلاقي في القرآن علي طول ... أصبروا وبس ؟

تلاقي " صبروا وعملوا الصالحات "

تلاقي " صبروا واتقوا "

تلاقي علطول " الذين آمنوا وعملوا الصالحات "


يعني مش كفايه أعمال قلبيه فقط .. لازم حركه ..

..

المثل الي كلنا حافظينه .. ( ان الجلابيه البيضا لو فيها نقطه سوداء ) أول شيء يلفت نظرك النقطه دي ..

لما تكون معزوم عند حد ويقدم ليك عصير برتقال .. لكنه مقدم الكوبايه ناقصه .. ولو بقدر بسيط جداً

اول شيء تفكر فيه ايه ( مين الي شرب البوء ده ) شوف الطفاسه :)

اقصد ان نقطه الحبر الاسود لو وقعت في لبن ممكن تسوده ..


فالظاهر في الشوارع ...

تبرج وغناء وسفور وقله حياء وشتم وجري علي الدنيا ..

تفتح التلفزيون .. تلاقي واحده بتعيط في خلف الاسوار عشان جوزها تاجر مخدرات وهي واطفالها بيتعمل فيهم كذا وكذا

تيجب القناه الي بعدها تلاقي واحد بيقول ان رغيف العيش بقا كذا

تجيب الي بعدها تلاقي واحد بيقول ان البنزين بقا كذا

تجيب الي بعدها تلاقي واحد بيقول ان الحديد بقا كذا

تجيب الي بعدها تلاقي واحد بيقول انه عنده اربعين سنه ولسا متزوجش ..

مره بفتح جريده .. فلقيت عنوان ( ان العريس والعروسه قتلوا بعض في ليله الدخله ) وكانوا من بولاق الدكرور


فقريت الخبر ... لقيته انه بعد ما الفرح خلص .. روحوا علي البيت .. وهم قاعدين بياكلوا ,, قالها هاتيلي كوبايه ميه قالتله هو انا شغاله عند أهلك قوم هات لنفسك .. كلمه منها علي كلمه منه .. مسكوا في خناق بعض .. راحت مسكتله السكينه .. فلما شافها مسكت السكينه فراح شالها ورايح علي البلكونه عشان يحدفها .. راحت هي ضربته بالسكينه وهو شايلها .. راح حدفها من البلكونه .. وتوتا توتا فرغت الحدوده ..

الي هموت واعرفه مين الي شاف الكلام ده كله .. وحكاه للجريده ؟

انا قلت في بالي أكيد أم العروسه كانت مستخبيه تحت السرير ..

والله لو فكرت كده في الحاجات الي بتتعرض علينا .. حاجات تحرق الدم .. بيسودوا الواقع بصوره رهيبه .

عايزين الناس تفضل محبطه ..

علطول في الافلام يجيبوا الغني لازم يكون حرامي .. مفيش غني محترم ؟

حاطين الناس في معادله سوداء ..

غني منحط , أو فقير بشرفك .


يوم ما المشايخ كلهم يتوقفوا تلاقي الاصوات ( من الاخوه ) خارجه تقول الدنيا دي كذا والحياه فيها كذا وكذا ..

ويوم ما المشايخ كلها ترجع .. ليه نفس الاصوات الي كانت بتحبط متتكلمش وتعلي الهمم ؟

وعلي هذا فقس .. اي مصيبه تحصل ..

تلاقي واحد زيي عامل سلسله عن بلاوي الاخوه .. هل كل الاخوه وحشيين ؟ كم في الميه من الاخوه بيحصل منهم مشاكل ؟ مقارنتاً بالي بيحصل ؟

ويقولك آدي الاخوه ياعم ..

وآدي الاخوات ياعم .

تعالوا الي بيتكلموا عن الاخوات يجيي كده تعالي نحسبها

شوفلي كده مين الي بتلبس النقاب

1- واحده عامله عمليه في وشها ( تلبس النقاب ) ودي كانت عندنا في الكليه

2- الشاحتين دلوقتي بيلبسوا نقاب ( عشان بتوع الاحداث والتسول هيلموهم )

3- العاهرات دلوقتي الي عايزه تستخبى من أعين الناس ( تلبس النقاب )

4- واحده ابوها ملتزم ومش مربيها كويس .. وراسه والف سيف تلبس النقاب .. ماشي هتلبسه وبرا البيت بنشوف العجب العجاب

5- واحده جوزها صايع ولافف الدنيا وغيران عليها من أعين الناس فتلاقيه ملبسها النقاب وماشي جنبها بيعاكس او قاعدين علي البحر او بيشرب جنبها سجاير

6- واحده معندهاش لبس كتير ( وانا اعرف امثله علي كده ) فاسهل حاجه ملحفه بخميسن جنيه ونقاب ابو 25 جنيه وخلاص ..

..

7- واحده طلعت لقت أمها لابسها النقاب وفي ساعة صفا قالت تلبسه .. وبعدها تعمل الي هي عايزاه

8- واحده شايفه انها في النقاب عينها حلوه .. وبتلفت النظر فميش مشاكل لما البسه والبس عدسات ( لانسيز ) بس مش جملي ( معيزي ) بتاعة معزه يعني .

وهكذا ..

واقدر اقولك اصناف كتير . عكس الاخوه محدش بيجبروا علي اللحيه .

كل دي اصناف لابسين النقاب وان شاء الله هم دول الي بتصدر منهم كل البلاوي .. انما الاخوات الملتزمات زي الفل ان شاء الله بتقعد في بيتها وان نزلت عارفه الي ليها والي عليها ..

فمحدش يقعد يقولي فين الاخوات الكويسين ؟

موجدين بفضل الله .. بس الاخت الكويسه مش هتشوفها في الشارع ماشيه معلش في اللفظ بتتسنكح ( بتلف علي الفاضي والمليان )

وفي المقابل انا مش بقول ان الاخوه والاخوات زي الفل ومحدش فيهم بيغلط .. لكن نوازن والاخطاء نتصارح بيها ونصلحها


انا مش عايز أخلي الحياه وردي وفي الاخر نتصدم بالواقع .

لكن لازم موازنه بين الحق والباطل

مختصر كلامي الي فات ..

ان اهل الشر مش بالصوره الي انتم متوقعينها ومش بالضخامه دي .. ان كل واحد مش ملتزم فهو يعمل علي هدم الدين ..


الامام الاوزاعي لما دخل علي الطاغيه وهو لابس كفنه وعارف ان التاني سفاح وهيقتله .. ولما سأله الطاغيه أجاب الامام بكل الثقه , فسُئل بعد كده ازاي قدرت ترد كده .. قال ايه ؟


استحضرت عظمة ربي فرأيته أمامي كالذبابه !!!




فالشر ( الي بيعملوا ضد الدين) مش بالضخامه دي

و

زي ما هو موضح في الصوره .

طيب البلاوي الي في الشوارع واخلاق الناس دي كلها الوحشه ..

يا اخي دول ناس عوام .. عرف أهل الشر انهم يضحكوا عليهم

فتلاقيها بنت متبرجه وقاعده بتقرا في المصحف في رمضان ..

او تستغرب لما تشوفها بتعطي فقير صدقه ..

او انها مثلاً تاخد لقمه واقعه علي الارض وتحطها علي جنب .. وامثله كتير تدل ان فيهم خير . لكن مضحوك عليهم ..


الناس الي بقول عليهم أهل شر دول الناس الي بيعملوا جاهدين مبيتين النيه للصد عن الله وسبيله ..

فدول لازم نهزمهم ونقف ليهم ونتحداهم ونحاربهم .. بكل قوة .. وقتها هتعرف انك اقوي منهم لانهم مش كتير .. فهم قله .. كما ان أهل الحق قله ..





أمثله هؤلاء :

بعض النصارى الحاقدين هتلاقيهم عاملين مواقع هدم وردم في الاسلام مواقع بقا منها جنسي ومنها شتيمه ومنها كل شيء .


وعلي الفضائيات بتاعتهم
وعلي البالتاك

كنت مره في غرفه نصارى .

فالادمن هناك بيقول لصديقه تعالي يافلان امسك مكاني عشان بقالي 36 ساعه قاعد ونفسي انام امسك مكاني هنام شويه واقوم أكمل مكانك ..

ايه ده !!


ايه الهمه دي ؟

مكسوف والله

ومش عارف اقول ايه

اكيد انتم فاهمين ..




وتلاقي اليهود بردو ليهم مواقع يتفننوا فيها في سحب أكبر قدر ممكن المسلمين ..


لولا اني هنشر الشر كنت قلت ليكم علي البلاوي الي اعرفها من مواقع يهوديه وغيرها ..

الله المستعان .

وتلاقي بقا من المسلمين صحفيين وممثليين فعلاً بيفسدوا في الناس وفي الاخلاق وبيعملوا جاهدين ..


بشريات علي الطريق :

عندك كم نصراني في بلدك مثلاُ في مصر . اخر احصائيه رسمية بتقول انهم اكتر من 15 مليون !!


ملحوظه جانبيه : ممكن ناس كتير تكذب الخبر بس بالفعل العدد كبير لسبب ان الكنيسه عامله مكافأه لكل مولود زياده وبتصرف عليهم وبتشجع زياده النسل المسيحي ( وده لان لو عدد زاد مبقوش أقليه ويكون ليهم حقوق كتيير ) المهم خلينا احنا في تحديد النسل



طيب كم واحده متبرجه من نسائهم ( النصارى ) ؟؟

ايه ده هو ده سؤال ؟

أكييييييييييييد كلهم متبرجات ومش كده وبس ده تبرج فاحش .


آدي رقم واحد ..

أن هتلاقي كتييييييييييير من المتبرجات والاغلب منهم نصرانيات اصلاً

· ياعم الشيخ سيبك من الي بشعرهم .. شوف المحجبات نفسهم عاملين ازاي ..

هقولك والله معمظمهم غلبانين ومضحوك عليهم .. وان شاء الله هنفصل في الموضوع ده بعدين .




من البشريات ايضاً

· ان سبحان الله في اشياء خير بتحصل لكنها مش بتنتشر زي البلاوي وده ملوش تبرير غير شيء واحد بس . اننا بنحب النكد .

شركة مصر للطيران ( أكيد معروفه )

مصر للطيران زمان كانت بتقدم خمور على الطيارات .. وتعدي من جنبيك المضيفه معاه شاي وقوه وحاجه ساقعه وخمره ..

ايه الي حصل ؟

حد عارف ازاي اتمنعت الخمور من طيارات مصر للطيران ؟

شيء بسيط خالص


الايمان بتاع الطيارين زاد شويه ..

فقرروا محدش هيطلع طيارة عليها خمره ..

متخيل قدر الخساره الفادحه .. الي ممكن الشركه تخسرها بسبب تعطيل يوم واحد مفيش رحلات ؟


وببساطه جداً اتمنعت الخمر ..

هل ده مش خير ؟

لما اتمنعت الخمور من جراند حياة .. مش ده حصل عشان بس صاحب الفندق ايمانه زاد ( شويه )


عندنا في الشركه .. في مشروع فقري ( بنك ) HSBC

الشركه عندنا تدفع غرامه 150 الف جنيه في اليوم الواحد لو المشروع اتاخر عارفين المشروع اتاخر قد ايه ؟ المشروع عامل لحد دلوقتي شهرين تأخير ..

عارف المشروع متأخر ليه ؟


عشان المهندسين كل شويه يتركوا المشروع ومنهم الي يرفض يشتغل في اصلاً غير المحاسبين .. مش بقول محدش رضي خالص .. لكن نسبه معينه من الناس بيتركوا المشروع وده بيأخره .

عارفين ده عمل ايه في الشركه عندنا ؟

هيقدر يطرد كل الي رفض ؟ ميقدرش .

هيعمل ايه ؟

قال مش هاخد مشاريع بنوك تاني ..
سبحان الله ..

كل ده ليه ؟

عشان بس ناس ايمانها بقا عالي شويه ؟


كل الناس الي فاتت دي ايمانها ممكن يكون بقا عالي بسببك او بسببي !!!


فلان ابتسم له

فلان نزل درس واعطاه له

فلان صدق معاه في الحديث

فلان وقف معاه وقفه كويسه

سبحان الملك ..



في النهايه يا اخوه هي حرب .. وعدوك والله ضعيف ..


وربنا معاك


ناس كتير تظن ان الايه دي مش في صالحنا

وهي :

" إنه يراكم هو وقبيله من حيث لا ترونهم إنا جعلنا الشياطين أولياء للذين لا يؤمنون [الأعراف : 27]

والكلام في الايه عن الشيطان .

انه يرانا ونحن لا نراه ..

ناس كتير تظن ان ربنا اعطي للشيطان ميزه ..

لانه عدونا وشايفنا واحنا ازاي نغلبه واحنا مش شايفينه ..

صح ؟ مش ساعات بنحس انها ميزه للشيطان ؟

غلط طبعاً

من رحمة ربنا بينا اننا منشوفش الشيطان بصورة الحقيقيه

لو شوفت ضخامة عدوك .. وشكله القوي القبيح هينخلع قلبك اصلاً

يعني لو الشيطان حب يوسوسلك في الصلاه وقعد قدامك وانت بتصلي بشكله القبيح .. وقعد يتنطط زي الاهبل قدامك .. انت وانت بتصلي مش هتنزل عينك من عليه اصلاً


فمن رحمة ربنا اننا لا نرى الشيطان ..

لانك لو شوفت الشيطان كبيييير ازاي .. هينخلع قلبك ..

فعدم رؤيتك ليه شيء يقويك .. وربنا اعطاك سلاح . لو قولته وإنت مصدقه يفعل الافاعيل بهذا اللعين بس تقول ( أعوذ بالله من الشيطان الرجيم ) المهم تصدق .. او بمعني اصح ( تؤمن بالغيب )


يبقي يا اخوه عدوكم كالذبابة لا تروا له حجماً ولا تكبروه أمام أنفسكم وامام الناس

والنااس بفضل الله بتستجيب ولو بعد حين فلا تيأسوا فقط أصبروا

فقط (اصبروا وصابروا ورابطوا واتقوا الله لعلكم تفلحون [آل عمران : 200]

ولكن فقط أعملوا كما امركم الله فــ (إن تنصروا الله ينصركم ويثبت أقدامكم )

[محمد : 7]


ملحوظة : لا يظن أحد ان عشان اهل الشر معاهم اسلحه كتييير يبقي هم هيأثروا في الناس اسرع واكتر ..

دي نظرة سطحيه دنيويه جداً للامور .

يا اخوه معاكم ربنا ,,

مش عارف ايه تاني ..

لو تظن انك هتنتصر بقوه او بشكل جميل منسق او بكلام حلو مهندم لبق .. يبقي انت بتحلم ..

ولا القنوات الفضائيه ولا اي شيء مهما كانت الصوره نقيه ومهما كان الصوت واضح وكان الديكور جميل وكانت المؤثرات قويه .. الناس لن تستجيب الا بعد تقدير الله وان يكون المتكلم نفسه صاااااااااااااااااااااااااااااادق .. ومخلص لله . وحاله مع الله يكفيه .




حد فهمني ؟

[أم عمر]

ماشاء الله
نسأل الله أن يجعله فى ميزاكم
جزاكم الله خيراً ونفع بكم

[طالـب الجنة]

لى عودة يا جود واى لأقرأه بتمهل
جزيت خيرا

[طالـب الجنة]

يا جود واى توهتنى الله يهديك
خاصة طريقة السطور دى ***
بالله لخص لنا مرادك حتى يتسنى لنا فهم الموضوع ولا أنا اللى مش مركز علشان كده مفهمتش ولا ايه

[أم الزبير محمد الحسين]

جزاكم الله خيراً