فخد ضاني في الفرن مع أرز بالخلطة
المقادير:
• فخدة ضاني.
• كيلو فلفل رومي أحمر.
• 4 علب زبادي.
• 5 معالق صغيرة خل تفاح.
• كيلو رز.
• كوباية كبيرة زيت.
• 2ملعقة كبيره ملح.
• 2 ملعقة كبيرة عسل أبيض.
• 2ملعقة كبيرة بهارات.
• ملعقة صغيرة كاري.
• نصف كيلو بندق.
• كوباية كبيرة ماء.
• فلفل أصفر وأخضر مقطع قطعا صغيرة.
• ملعقة صغيرة فلفل أسود.
• قطعتان فحم.
الطريقة:
هاتِ الفخدة واخليها من العظم، بعد كده تبلي الفخدة بمزيج الخليط الآتي:
"الزبادي والملح والعسل والخل والبهارات والفلفل الأسمر"...
بعد ما تتبلي الفخدة بالخليط ده حطيها في الثلاجة لمدة يوم بعد كده طلعيها من التلاجة وهاتِ الفلفل الرومي الأحمر وقطعيه إلى قطع صغيرة واحشيها بيه، بالإضافة إلى باقي الخليط المنقوع فيه الفخدة...
بعد كده حطيها في الفرن وادهنيها بالزيت وسيبيها في الفرن لمدة ساعة أو ساعة ونصف أو لغاية ما لونها يبقى أحمر وتستوي...
بعد كده سخني قطعتين الفحم على النار لغاية لونهم ما يبقى أحمر بعد كده حطيهم على الفخدة وهي سخنة وغطي عليها علشان تحتفظ برائحة الفحم لأنها بتدي مذاق ورائحة رائعة.
بعد كده صفي الصوص النازل من الفخدة وضيفيه إلى الرز على النار وقلبي كويس وبعد كده ضيفي إليهم كاري وملح وميه وبندق وقلبيهم على نار هادية لمدة ربع ساعة أو لغاية ما تلاقي الرز استوى.
بعد كده هاتِ الفخدة وقطعيها شرائح وقدميها في طبق مع الرز ورشي من فوق شوية ملح وفلفل أخضر وأصفر للتجميل وبالهنا والشفا.
صينية اللحم في الفرن
المقادير:
• كيلو لحمة.
• 3 بصلات مقطعة شرائح.
• 3 حبات طماطم مقطعة شرائح.
• 3 فصوص ثوم مطحونين.
• ملح -كمون-ك***ة-فلفل أسود
• عود قرفة.
الطريقة:
اخلطي اللحمة مع الثوم والبهارات والملح بعد كده حطي في الصينية طبقة من شرائح البصل ثم طبقة من شرائح الطماطم وبعد كده حطي اللحمة عليها ثم باقي شرائح البصل والطماطم، وبعد كده
غطي الصينية بالورق الحراري وحطيها في الفرن على نار هادية لمدة ساعة أو لغاية ما تحسي إنها استوت.. وبألف هنا وشفا.
لحمة ضاني مشوية
المقادير:
• لحمة ضاني مقطعة مكعبات متوسطة الحجم أو "ريش".
• كوب كبير عصير طماطم.
• ملعقة صغيرة فلفل أسود.
• ملعقة صغيرة شطة حمراء ناعمة.
• 10 فصوص ثوم.
• ملعقة كبيرة خل أبيض.
• ملعقة كبيرة كمون مطحون.
• 1 حبة جوزة الطيب مبشورة ناعم.
• 1 بصلة كبيرة.
• فلفل رومي أخضر
• نص فنجان زيت.
الطريقة:
هاتِ اللحمة واغسليها كويس.
بعد كده جهزي تتبيلة اللحمة وهي عبارة عن "الزيت + الخل + الكمون +جوزة الطيب + البصلة + عصير الطماطم + الفلفل الأسود + الفلفل الأخضر + الثوم + الشطة" واضربيهم مع بعض في الخلاط...
بعد كده هاتِ صينية وادهنيها بالخليط ده وبعد كده ابدأي في رص اللحمة في صورة طبقات وبين كل طبقة وطبقة حطي خلطة التتبيل...
بعد ما تخلصي رص اللحمة حطيها وخليط التتبيل في التلاجة لمدة 3 ساعات، بعد كده خرجيها واشويها على الشواية الكهرباء أو الفحم.. وبالهنا والشفا.
موزة بالفريك
المقادير :
• نصف كيلو لحم موزة خال من العظم.
• نصف كيلو فريك.
• نصف ملعقة صغيرة مبشور جوزة الطيب.
• ربع ملعقة صغيرة فلفل.
• 2 ملعقة كبيرة سمن.
• بصلة.
• عود كرفس.
• فص حبهان.
• مكسرات محمرة.
• طماطم مشوية.
الطريقة
اسلقي الموزة وضيفي إليها أثناء السلق بصلة مقطعة أربع تربع وعود كرفس وفص حبهان قبل ما اللحمة تستوي بشوية ضيفي إليها الملح لما تلاقي اللحمة استوت شيليها من "الشوربة" وحطيها في مصفة..
في الفترة اللي فيها اللحمة بتستوي هاتِ الفريك ونقيه وبعد كده انقعيه في شوية ميه بعد كده هاتِ صينية وحطيها على النار وضيفي إليها شوية سمنة والفريك وقلبي الفريك في السمنة لمدة خمس دقائق بعد كده ضيفي إليه الشوربة وشوية بهارات وملح وسبيه على نار هادئة لغاية ما يستوي.
بعد كده رشي على لحم الموزة المسلوقة شوية بهارات وملح وحمريها في السمنة.
بعد كده حطي الفريك في طبق التقديم وحطي فوقه اللحمة المحمرة وللتجميل شوية مكسرات والطماطم المشوية على جانب الطبق وبالهناء والشفاء.
فتة العيد
وعلشان العيد يبقى عيد يبقى لازم نعرف طريقة عمل الفتة، أنا عارفة إن كل الناس بتعرف تعمل الفتة بس حبيت أقولها علشان أكون فعلا قدمت أشهى أكلات عيد الأضحى لأن العيد مش بيكون عيد إلا بطبق الفتة.
المقادير:
• كيلو لحم ضأن مقطع بالعظم وياريت يكون "لحم الكتف"
• نص كيلو رز.
• ماء ساخن.
• بصلة كبيرة ومقطعة قطع صغيرة.
• 2 فص حبهان.
• ملعقة قرنفل.
• 6 فصوص ثوم مهروس.
• رغيف خبز محمص.
• نصف ملعقة صغيرة مبشور جوزة الطيب.
• عود قرفة.
• ورقة لاورا.
• ملح.
• كوباية كبيرة عصير طماطم.
• ملعقة كبيرة سمن.
• ملعقة كبيرة صلصة طماطم.
• ملعقة خل أبيض.
الطريقة
اسلقي اللحمة الضاني وضيفي إليها عند السلق بصلة وورقة لاورا وفص حبهان وملعقة القرنفل والملح وسيبيها لغاية ما تستوي
أثناء ما اللحمة بتستوي هاتِ الارز واغسليه وبعد كده هاتي الصنية اللي هتعملي فيها الأرز وحطي فيها ملعقة ونصف سمنة وبعد كده ضيفي إليها الرز وقلبيه على النار لمدة خمس دقائق بعد كده هاتي ميه وضيفي إليها شوية ملح وبعد كده ضيفيها للرز وسيبيه على نار هادية لغاية ما يستوي....
بعد كده هاتِ بصلة وقطعيها قطع صغيرة وحمريها في السمنة لغاية ما تلاقي لونها بدأ يميل إلى اللون الأصفر ضيفي إليها التوم مع التقليب لما تلاقيهم لونهم بدأ يكون ذهبي ضيفي إليهم كوب عصير الطماطم والصلصة وسيبيهم على نار هادئة لمدة 10 دقائق بعد كده ضيفي إليهم قليلا من "الشوربة" وسيبيهم على النار لمدة ربع ساعة.
بعد كده هاتِ صينية وقطعي فيها الخبز وضيفي إليه شوربة اللحمة وسيبيهم لمدة عشر دقائق علشان العيش يتشرب من الشوربة.
بعد كده هاتِ طبق كبير وحطي فيه الأرز والخبز وحطي فوقيهم دمعة الصلصة اللي أنت عملتيها ومن فوقها اللحمة..
اكلات عيد الاضحي( كل عام وانتم بخير)
العرض العادي
