بلح الشام

[ام عبد الرحمن وعمر]

 

السلام عليكم ورحمة الله وبركاته هاقولكم النهاردة على طريقة بلح الشام
اولا: 1كوب دقيق ،1كوب ماء ،1معلقة كبيرة سمنة ، 1بيضة ،فانيليا
ثانيا: يقدح السمن ويوضع عليه كوب الماء الى ان يغلىثم نضع الدقيق مع التقليب السريع عشان مايكلكعش ونسيب العجينة تبرد
لما تبرد نضع البيضة والفانيليا ونعجنهم فى بعض كويس وبعدين نشكلة بقمع بلح الشام ونحمرة فى زيت غزير ولما يبدأ لونه يصفر نطلعه
ونحطة فى الشربات بس نتأكد انه استوى
مقادير الشربات:
2كوب سكر 1ونصف كوب ماء شوية ليمون لما يغلى ويبدأ يتقل نطفى علية
وياريت نكون عاملين الشربات الاول قبل بلح الشام بكام ساعة عشان يبقى بارد لان المفروض ان بلح الشام هايبقى طالع سخن
فانحطه فى شربات بارد عشان بلح الشام مايطراش ويفضل ناشف وقت طويل

[أم البراء]

جزاكِ الله خيراً الحبيبة أم عبد الرحمن
ويمكن استبدال السمنه بالزيت
على هذه المقادير يكون الزيت كوب إلا ربع على ما أذكر
بارك الله فيكِ وجزاكِ خيراً على وصفاتكِ الجميله

[ام عبد الرحمن وعمر]

وجزاكى مثله يا أم البراء يا حبيبتى وأكيد بطريقتك هايطلع أحلى طبعا

[سماهر المدينه]

السلام عليكم ورحمة الله وبركاته

سلمت يداكي ام عبد الرحمن وعمر على بلح الشام واطلب من الله العلي القدير(ان يجمعك وابنائك مع الصالحين ويجعلكم أصلح الصلحين)

[ام عبد الرحمن وعمر]

جزاكى الله خيرا يا أختى سماهر المدينة والله انى أحببتك فى الله

[أم مُعاذ]

جزاكِ الله خيراً

[ام سهيله]

السلام عليكم ورحمة الله وبركاته جزاكى الله خيرا اختى ام عبد الرحمن وعمر الله يبارك لك فيهما ولاكن اختى انا بعمل بلح الشام بس ما بيطلع زى الجاهز ياترى ايه السبب

[ام عبد الرحمن وعمر]

بصى يا ام سهيلة اولا ممكن يكون انك بتحطى بلح الشام فى الشربات والشربات لسه سخن ده بيخلية يطرى
ثانيا لو عايزاه يبقى ناشف وما يطراش بسرعة ممكن تحطى شوية نشا فى الدقيق وانتى بتعملية بارك الله فيكى