السلام عليكم يا أخواتى
اليوم هاقولكم على طريقتى فى الفراخ الكنتاكى
هاتى فرخة واغسليها كويس
وقطعيها اربع والدبوسة تكون لوحدها
وبعدين افرمى بصلة كبيرة وضيفيلها ملح وفلفل وشوية كارى وبهارات
وبعدين قلبيهم على الفراخ وحطيلهم معلقة سمنة وحطيهم على النار وسيبيهم لحد ما الفراخ تستوى بس ماتتهريش
وبعد كده طلعى قطع الفراخ وتكونى مجهزة بيض مخفوق وطبق فيه بقسماط وضعى قطع الفراخ فى البيض وطبعا تكونى حطه للبيض شوية ملح وفلفل وممكن شوية كارى كمان بس صغيرين
وطلعى قطع الفراخ من البيض وحطيهافى البقسماط واضغطى عليها عشان البقسماط يثبت كويس وبعدين حطيها فى الفريزر نصف ساعة عشان التتبيلة تثبت فى الفراخ اكتر وبعدين طلعيها وحمريها فى زيت غزير ولما تحمر طلعيها على ورق يشرب الزيت وقدميها ساخنة مع الكاتشاب والمايونيز والبطاطس المحمرة
وبالهنا والشفا