Untitled-2
 

 
 
 
العودة   منتديات الحور العين > .:: المجتمع المسلم ::. > رَوْضَــــةُ الأَخَــــوَاتِ
 
 

رَوْضَــــةُ الأَخَــــوَاتِ خاصٌّ بالأَخواتِ فقط ! ويُمنع مُشاركة الرجال نهائياً! .

 
 
أدوات الموضوع انواع عرض الموضوع
  #1  
قديم 04-04-2011, 11:12 PM
الصورة الرمزية أم عبد الله
أم عبد الله أم عبد الله غير متواجد حالياً
كن كالنحلة تقع على الطيب ولا تضع إلا طيب
 




افتراضي تفريغ حلقة (مش عادي)لفضيلة الشيخ هاني حلمي

 

السلام عليكن ورحمة الله وبركاته

أولاً :إن أحوال المسلمين هذه الأيام -خاصة النساء -إلا من رحم ربي اصبح

شيء مزعج من أول التسيب في اللباس الشرعي ....إلى ما لا نهاية ،
-نسأل الله لنا جميعا أن يسترنا فوق الأرض وتحت الأرض ويوم العرض عليه.

وجدت بعض السلاسل والحلقات الموجدوه لعدد من الشيوخ الأفاضل
بارك الله لنا فيهم وجزاهم عنا خير الجزاء تمس وتعالج كثير من الظواهر
الموجوده في مجتمعاتنا الإسلامية والعربية والمطلوب منا جميعًا:

1- المساعدة في تفريغ وتنسيق الحلقات (ومن تستطيع تخبرني بذلك)؟

2- النشر مطلوب نقل كل الحلقات المفرغه على أوسع نطاق ممكن ليكون جزء
عملي لتصدي لمثل هذه الظواهر القبيحه (بمعنى ننقذ من يمكن انقاذه).

والآن مع أولى حلقات فضيلة الشيخ هاني حلمي من (سلسلة الزواج)
وهى منقوله من على موقعه مفرغه
جزى فضيلة الشيخ ومن فرغها خير الجزاء

___________________

محاضرة
للشيخ
هاني حلمي حفظهالله
أعوذ بالله السميع العليم من الشيطان الرجيم
بسم الله الرحمن الرحيم
إن الحمد لله نحمده و نستعينه ونستغفره
ونعوذ بالله من شرور أنفسنا ومن سيئات أعمالنا
من يهديه الله تعالى فلا مضلّ له ومن يضلل فلا هادي له
وأشهد أن لا اله إلا الله وحده لا شريك له وأشهد أن محمد عبد الله ورسوله
اللهم صلى على محمد وعلى آل محمد كما صليت على إبراهيم و على آل إبراهيم إنك حميد مجيد
اللهم بارك على محمد وعلى آل محمد كما باركت على إبراهيم و على آل إبراهيم إنك حميد مجيد
وبعد
فإنّي أسأل الله تعالى أن يجعل جمعنا هذا جمعا مرحوما وأن يجعل التفرّق من بعده تفرّقا معصوما
وان لا يجعل منّا ولا بيننا ولا حولنا شقيّا ولا محروما .
اللهم إنا نسألك الهدى والتقى والعفاف والغنى ، اللهم اجعل عملنا كله صالحا ولوجهك خالصا ولا تجعل فيه لأحد غيرك شيئا.
رَبَّنَا آتِنَا مِن لَّدُنكَ رَحْمَةً وَهَيِّئْ لَنَا مِنْ أَمْرِنَا رَشَدًا.

بدايةً، عايز أنبّه على ثلاث حاجات قبل ما نتكلم في موضوعنا النهارده:
أول حاجة: الكلام النهارده لو كان مش بيمسك شخصيا، لكن أكيد حَيْمسّ حد حواليك لازم تمد له إيدك وفرض عليك إنك تنهاه وتنصحه ، وتبقى من الذين قال عنهم النبي صلى الله عليه وسلم "طوبى لعبد جعله الله عز وجل مفتاحا للخير مغلاقا للشر، وويل لعبد جعله الله مفتاحا للشر مغلاقا للخير".
الموضوع إذا كان الحمد لله في ناس ربنا عافاهم من الوقوع فيه، لكن تقريبا محدّش بعيد عن مقدماته.
ثاني حاجة: برده موضوعنا النهاردة مش بيتكلم عن ظاهرة خطيرة تمسّ بلد بعينها، فالعالم كله يعاني الأمرين من هذا الموضوع الخطير .
إحنا النهاردة عايزين نشوف حلول واقعية لأزمة مجتمعات ، عايزين نحط إيدينا في إيدين بعض ونشوف علاج واقعي لهذه المشكلة الخطيرة .
ثالت حاجة
: أنا ربما يندى الجبين و استحى من ذكر بعض الأمور التي سترد في هذه المحاضرة، لكن أنا كنت بين خيارين: إما إن احنا نتكلم بصراحة واقعية ،وإما إن احنا نحط راسنا في الرمال . وكان الخيار إن إحنا نتكلم بصراحة ونفتح هذا الموضوع الشائك وهذا الملف الخطير الذي يهدد مجتمعات المسلمين النهاردة.



محاضرتنا بعنوان :
" مش عــــــــــــــادي"


وأصْـلها إستبيان وصلني عن أحوال الشباب اليومين دول. وتوقفت عند كلمة بنت صغيرة كانوا بعض الناس أعطوها بعض المحاضرات تسمعها. فقالت يا جماعة انتم بتتكلموا مع مين، احنا في زمن ثاني غير اللي انتم بتتكلموا عنه ده خالص. قالت باللفظ: " يا جماعة الزنا النهارده عادي"
عشان كده النهاردة أنا بقول:

"
لا،الموضوع مش عادى"

لما البنات في سن 15 سنة,،السنة في بعض المصايف الواحدة تسأل الثانية هو إنتِ بكر ولاّ لأ؟يبقى مش عادي
لما أحد الأخوة يذكر لي، زوجته شغالة في القصر العيني وتخصصها نساء وتوليد ،وتقول إن الشئ الطبيعي اللى مبقاش مستهجن إن كل يوم ترد علينا بنات في سن صغير تعاني من إنها ليست عذراء و جاية تكشف و معاها والدتها ويخرجوا بالعار و الفضحية، لغاية م الدكاترة بقى الشئ بالنسبة لهم عادى.
لما بنت غير مصرية مسكوها في بيت من بيوت الدعارة فسلمها بوليس الأداب للجامعة اللى هى بتدرس فيها على اعتبار إنها مش مصرية، فبعثت إدارة الجامعة لأبوها عشان يستلمها,،الراجل بيقول، المسئول اللى في الجامعة، إن أنا روحت جايب ناس وحاطتهم في كل دور ومستني الطلقة، يعنى أول ما هقوله بنتك كذا كذا مستنين انها هيسيح دمها دلوقتي فخايفين... فيكون الموقف قدام الناس كلها :الأب يبص لها ويقولها باللفظ كده :"عشان لما أقولك تختاري جامعة الناس فيها يعرفوا يقدروا حريتك تبقي تسمعي كلامي "
يبقى مش عاديفي بعض البلاد لما الزنا يبقى يوصل انه يبقى في العلن . الشباب بيحلفوا لي إن في حفلة مغني من المغنيين في أخر القاعة كانوا اثنين بيزنوا والناس بتهشّهم وكل واحد في التّوَهان.
يبقى مش عاديلما يقولوا لي في الاستبيان إن في زنا بيتعمل في البحر
"يبقى مش عادي"

لما يبقى في أكتر من 14 ألف قضية إثبات نسب قدام المحاكم والنبي صلى الله عليه وسلم كما روى الإمام أحمد وحسنه الألباني يقول: " لا تزال أمتي بخير ما لم يفشو فيهم ولدُ الزنا، فإذا فشا فيهم ولد الزنا أوشك أن يعمهم الله بعذاب "
يبقى مش عاديلما تخرج علينا دراسة أجرها المجلس القومي للسكان و الجامعة الأمريكية بالقاهرة أشارت إلى إن عدد حالات الزواج العرفي فى مصر تزيد على 400 ألف حالة سنويا .وزواج عرفي :زنا مقنّع
يبقى مش عادي
والله
الزنامش عادي

الله سبحانه وتعالى يقول :"وَلاَ تَقْرَبُواْ الزِّنَى إِنَّهُ كَانَ فَاحِشَةً وَسَاء سَبِيلاً ". (الإسراء)
وأخبرنا النبي صلى الله عليه وسلم أن انتشار الزنا من أشراط الساعة. يقول النبي صلى الله عليه وسلم والحديث فى الصحيحين :" إن من أشراط الساعة أن يُرفع العلم ويظهر الجهل ويفشو الزنا ويُشرب الخمر ويُذهب بالرجال وتبقى النساء حتى يكون لخمسين امرأة قيم واحد"
الموضوع مش متوقف فقط على الفعل الشنيع ده لأني عارف وقبل ما أجى عارف إنّ ده هيتردد في أذهان الحضور : "انت جاى تقولنا الكلام ده ليه؟عشان كده انا قُلت فى البداية إنه إذا كنت أنا مش بخاطبك إنت شخصيا بس بخاطب حد فى دايرتك. دايرتك دي يعني واحد من معارفك، واحد فى عيلتك ،واحد من أصحابك . والله أنت ملزم أمام رب العالمين بدعوته .و أُخاطب الذين قد يقعوا فى مقدمات الزنا لأن النبي صلى الله عليه وسلم سمى هذه المقدمات زنا. يقول النبي صلى الله عليه وسلم والحديث فى الصحيحين:" إن الله كتب على ابن أدم حظه من الزنا، أدرك ذلك لا محالة ( كل واحد سيُصاب) فزنا العين النظر و زنا اللسان المنطق والنفس تتمنى وتشتهى والفرج يصدق ذلك او يكذبه".
عندك زنا العين النظر
النهاردة ،عدد المواقع الاإباحية بالآلاف. أحد الاحصائيات بتقول إن 63 % من المراهقين يرتادون صفحات وصور الدعارة ولا يدرى أولياء أمورهم شيئا عما يتصفحونه على الانترنت. وان اغلب المستخدمين للمواد الاباحية تتراوح اعمارهم ما بين 12- 17 سنة .والصفحات الإباحية تمثل بلا منافس أكثر الصفحات انتشارا وبحثا وطلبا على الانترنت.



و شوف إنت لو لقيت في صحيفة عملك إنك مكتوبلك زَنا بِعَينه..
يمكن بعض الشباب لا يفهم هذا المعني كويس، يتصور إن الزنا إلي هو الفعل أن يزني الرجل كما يصنع مع إمرأته أن يجامع الرجل المرأة. لو كدا يبقي هذا زنا وهو ده المصيبة السوداء ، مش يس كدا ، النبي-صلي الله عليه و يسلم يقول: زنا العين النظر، زنا الأذن الإستماع، زنا اليد البطش.

إمسك إيدها: زنا!!
قعد يتكلم معاها كلام خارج: لسانه يزني وأذنه تزني.
يبقي الأمر مش عادي. ياجماعة المصيبة إن محدش حاسس بخطر الموضوع اليومين دول. مع استمرأنا للمعاصي ،خلاص شوية بشوية بقي عادي.
الأول ماينفعش تنظر علي واحدة متبرجة ، ماينفعش واحدة متبرجة تخرج في شارع تبقي دياثة. شوية بشوية تخرج و تخرج كاسية عارية والّي في البيت مابيقولهاش انت خارجة كدا ليه ،وعادي !
الأول يقولك لا لا لا، لغاية الأمور دي يقولي "أنا ليّا و لايا و أخاف عليهم" ..وشوية شوية :"ما كل الناس بتعمل كدا" ..

طيب حللي مشكلتي ،انت جاي تقولي انهاردا حرام حرام ،طيب اعمل ايه ؟ حتجوز ازاي؟ وأنا شاب و عندي شهوة حصرفها ازاي ؟وعندنا تسعة مليون ما بين عانس وما بين مطلقة و أرملة ، في بلدنا لوكان تعداد البلد خمسة و سبعين مليون يعني انت بتكلم في شريحة تمثل حوالي 20% من البلد يبقي ايه الوضع؟ لازم نبقي عارفين احنا رايحين فين، وأنا والله العظيم من باب حرصي عليكم وحبي ليكم كلنا أصحاب ذنوب و معاصي وإذا كنا مش حنمد إيدينا لإيدين بعض يبقي السفينة حتغرق بينا كلنا.
انا انهاردة معاك علشان نتوب من الذنوب فيا من ربنا عفاك: خد بإيد أخوك ، ويا من وقعت ورجلك وقعت في الوحل :الفرصة قدمنا علشان كلنا نتوب.
أول خطوة
عايزين نعرف خطورةالزنا و انا مش جاي أقولكم الكلام المحفوظ. أنا حقول لكم كلام من واقع أفواه الذين وقعوا في هذه المصيبة الكبرى.


الزنا يا جماعة يوجب مقت الرب،الزنا نجاسة،الزنا ذل,،الزنا سبب لللأمراض النفسية الخطيرة، الزنا سبب لطواعين العصر من إيدز و خلافه، الزنا سبب لسوء الخاتمة ،الزنا سبب لشدة العذاب في القبر و شدة العذاب في النار..كل الكلام ده بعتته واحدة وصّلتلي الموضوع علي الإيميل عن طريق وصية وقالت أحكي للناس تجربتي بس أرجوك ماتبينش ممكن أبقى مين..
قصتها بتقول يعني إيه زنا..

خلونا نحكي قصتها من كلامها ونشوف يعني ايه زنا؟


هي قالت:إن البداية مافيش رقيب في البيت .بتعبيرها:
انا البنت المرحة الي كل الناس بتحبها، انا جميلة خفيفة الدم مافيش قيود ،اي حد ممكن يدخل البيت الأب مسافر طول الوقت، الأم هي الي شايلة الحمل.

دخولني مدرسة مختلطة وكان الوضع فيها فظيع لأبعد حد .أمهات صديقاتي مطلقات ؟: عادي. الزوجة بتخون زوجها ؟ :عادي. المدرس والمدرسة بيزنوا في غرفة الموسيقي؟ عادي.
رحت لأمي مرة من المرات وقلتلها:
ـ هو فيه ايه يعني لو كان عندي ولد يبقي صاحبي؟ ردّت قالتي:
ـ كلهم صحابك. قالت لها:
ـ لا، في واحد بالذات يعني اكثر منهم شوية. قالت لها :
ـ لا، انتم مع بعض ماشي انما يكون لك صاحب خصوصي لالا كدا قلّة أدب.



بتقول: طبعا انا ما قتنعتش. صحابي كانوا يروحوا يصحبوا مع الشبان ويروحوا ديسكوهات ويرقصوا سلو والأمهات و الأباء عادي.
طبعا ماحدش كان بيدق علي اللبس. ألبس مكشوف، ألبس فوق الركبة، انزل في المصيف بملابس البحر قدامهم :عادي .

المنطق الي انا اتعلمته، الي انا اتربيت عليه، ان الراجل و الست ما فيش فرق بينهم الواحدة تعمل اي حاجة بيعملها اي راجل ما فيش مشكلة، بس المهم ما دمتي متربية وبتعرفي تخدي موقف يبقي عادي.
ممكن زوج خالتي و ابن خالتي يسلم علي و يقبلني: عادي.
انا كان عندي خمسة عشر سنة وابن خالتي خمس و عشرين سنة وكان ده ممكن يحصل وانا في سن المراهقة وقدام أهلي وعادي.
أركب مواصلات واتعرض لمضايقات ومعاكسات : ايه المشكلة؟


يسيبوني انزل بعد الساعة 12 انزل اجيب جرايد ومجلات :عادي.
يفتخروا ان انا بعرف ارقص في افراح العائلة وطبعا البس لبس عاري :و أيضا عادي.

ممكن اسافر لوحدي مع اصحابي و ممكن هما يسافروا و يسيبوني لوحدي في البيت: عادي. كان لي قريبة كنا نلعب مع بعض وممكن نغتسل مع بعض ووصل الأمر إني اتعلمت منها ـ وأنا آسف في التعبير و آسف في الصراحة في ذكر هذه الأمور ـ اني اتعلمت منها العادة السيئة.
من صحابتي اتعلمت الصحوبية. كلهم بيصحبوا وأهليهم عارفة.
ممكن يسافروا مع أصحابهم والحياة ظريفة ....

البداية : تصاحبي؟ لالالا ،انا مش بتاعة الكلام ده، انا مش بَصاحب .
هو في يا بنتي حد انهاردا ما بيصاحبش؟؟ ايه الهبل الي انت فيه ده ؟؟ دا فلان و فلانة كانوا متصاحبين و اتجوزوا . و احنا بنتصاحب عشان في الآخر حنتجوز .
هو، اول واحد عرفته. مسك ايدي علي طول. كان الأمر بالنسبة له عادي، أما انا فبكاء و هو قال لي هو انت متخلفة؟؟ احنا لازم نخرج لوحدينا مش مع الناس!! لما اتكلمت مع اصحاب السوء ان الولد الفلاني كان عايز يمسك ايدي وان انا اول ما عمل الحكاية دي بكيت، قالوا لي بدل يا خايبة ما يعمل كدا مع حد تاني انت ابسطيه عشان دي احاسيس يا بنتي ،عادي !!
بدأ يعرف بنات عليا وانا كنت بَغير ،ولما كنت بَقول لحد من اصحابي كانت تقول انت الغبية انت التي اعطتيله الفرصة انه يعرف عليكي، يعني كنتِ مش عارفة تملي عينيه.
بتقول انا اتحجبت في اولي ثانوي وخلعته عشانه. وبتقول والله انا حاسة ان ربنا عاقبني علشان هو ادّاني و انا فرطت فيه علشان هذا الذئب الخبيث.

بعدين، سمحت له يمسك ايدي ،وامتدت العلاقة شئ في شيئا.
الّي كنت فاهماه، ان طالما انا محافظة علي نفسي ومش هتوصل المسائل إلى الزنا يعنى يبقى أي حاجة قبل كده مش خطيرة، ده كان مفهومي في الأول.

بعدين أقنعني إنه مش حيعمل حاجة غلط وانه سيجامعني من غير ما أفقد بكارتي.
لكن في مرة من المرات حسيت أنى سُـلبت أعز ما تملكه البنت وفقدت شرفي. وطبعا بكون في وقت فاقدة فيه السيطرة على نفسي وهو كذب عليا :"ومحصلش حاجة، نتي اصلا كده من الاول".
أنا كنت بصدّقه على طول الخط، وفهمت فعلا إن أنا عندي مشكلة.
كنا نزني في بيتي وأهلي مسافرين أو نايمين ,كنت بعمل كده عشان حاسبة إني بحبه، و عايزة أوريه إن أنا البنت اللي مفيش قبلها ولا بعدها. كان عايزنى أشرب سجاير و أنا كنت بكره ريحتها أصلا بس شربتها عشانه.
رحت للدكتورة عشان أعرف أنا بنت ولا لأ. قالت لي إنتِ عندك تهتك في غشاء البكارة , بتقول حسيت إن الدنيا اسودت في عينيا. بتعبيرها باللفظ: "حاجة تقرف ومهما كان أهلي مش صح ماكنش يستهلوا مني إني أبقى خاينة". كنت بحس دايما إن أنا في المكان الغلط وده إحساس على طول يلازمني.
بعد فترة الذئب الخبيث صارحني بالحقيقة وقالي طبعا إنتي مش بنت .وكانت المصيبة إن بعد شوية اكتشفت إني حامل.عمري ما كنت أتخيل إن ممكن أكون حامل. حكيت لواحدة صاحبتي حسسيتني إن الموضوع عادى وكل الناس كده، ومش بس عملت كده دي ساعدتني وجابت لي اختبار حمل وعرفت إن أنا حامل في أسبوعين . بتقول :"والله عذاب في عذاب". بدأت أعمل تمارين عشان أجهض نفسي لكن للأسف فشلت. مش تتصوروا والله كانت أوحش فترة في حياتي.أنا البنت المرحة اللي أهلي كلهم بيحبوها. بقيت عايشة كرب وغم وهم ,رُحت سافرت بدون علم أهلي ورحت الإسماعيلية عشان أعمل عملية إجهاض. لقيت نفسي وسط بنات الدعارة. طبعا موقف في منتهى القذارة .وعملت العملية.


هي بتقول: أنا ساعات دلوقتي بسمع آية بتخبط جوايا. بحس إن الآية دي بتألمني أوى لما بسمعها: "وَإِذَا الْمَوْؤُودَةُ سُئِلَتْ * بِأَيِّ ذَنبٍ قُتِلَتْ" (التكوير)
بتقول: أنا بشعُر إن ربنا هيسألنى عن النفس اللى أنا قتلتها.
مش كفاية زنا كمان قتل. وللعلم احدى الإحصائيات بتقول في 50 مليون عملية إجهاض بتتعمل في العالم سنويا.
بعدين طبعا الأستاذ فر بجلده وسابني. وأنا بقيت مش عارفة أعمل إيه يتقدم لي عرسان عشان يخطبوني وأنا طول الوقت برفض ما يقيتش عارفة أقول لهم إيه؟ بدأت أوافق وبعد شوية أقول له لو سمحت أنا عايزة أكلمك في موضوع. وأحكي له اللي حصل وللأسف الشديد يتقلب الإنسان اللي جاي يخطبني وقاعد يتفنن في جمالي يبقى حيوان بشرى يبتدي يتحرش بيا. ولما أقول له ليه؟ وازاى؟ يقولي انتي هتعمل لي فيها الخضرة الشريفة.
بتقول أنا من ضيقي بقيت خلاص متفرقش. فبقيت اسلم له نفسي ورجعت تاني للزنا والموضوع إتكرر بدل المرة مرات .قلت مفيش فايدة، قلت إنتي مفيش حد حيحترمك، عمرك ما هتبقي انسانة، كنت بَشعُر( بص كلامها ) إن العاهرات أحسن منى. العاهرات بفلوس إنما أنا أقذر منهم أنا ببلاش. فكرت في الانتحار عدة مرات قُلت أروح لدكتور نفسي . لكن من الموقف بتاع الاجهاض خلاني أقول لو عرف هو الأخر أنا بعمل إيه يمكن هو الأخر يجي في دماغه انه يتحرش بيا .ماكانش في فكرة إلا عملية ترقيع فكرت في العملية وقُلت يمكن ترجع لي ثقتي في نفسي وأحس إني بنت.



بتقول والله الموضوع كان في منتهى المهانة. اللي في العيادة كلهم ناس مش كويسين. منظر الأمهات وهم جايبين أولادهم كان في منتهى القذارة. طبعا الموضوع مش قانوني فالعيادة تتدخلها تحس كأنك داخل وكر. الدكتور اللي عملي العملية هو نفسه كان إنسان مش محترم. كان بيتحرش بيا بأسلوب وحشي وكان بتكلم معايا في كلام في منتهى السفالة. وعملت العملية. و إتقدم لي واحد ما شاء الله عليه.
طبعا أنا لما عملت العملية كنت فاكرة نفسي خلاص أنا كده رجعت بنت و محديش هيعرف في فترة الخطوبة الولد اللي أنا كنت زنيت معاه كان بيطاردني عايز يتجوزني. أول ماعرف إني إتخطبت قاللي أنا مصمم إن أنا أتجوزك. الفترة بقت فترة صراع. حتى الفترة دي ما عشتهاش زى أي بنت في فترة الخطوبة . وكانت المأساة، ليلة البناء إكتشتفت و أنا بين إيدين جوزي إن العملية فشلت. أنا مقدرش أوصف الشعور اللي أنا كنت عليه في الوقت ده. أنا كنت حاسة إني بتذل لإنسان لا راح ولا جيه. يا ترى هيفضحني؟ يا ترى هيطلقني؟ يا ترى هيقول لأهلي؟ يا ترى هيفضح اللي ربنا ستره عليا سنين طويلة ولا حيستر عليا وبعد كده يذلني؟ وتكون المعاملة في منتهى السوء.
بتقول سبحان الله ستر عليا ولم يكلمني في أي حاجة وأنا متأكدة إنه عارف.

ـــــــــــــ
أنا بقى تعقيبي حاجة من إثنين : يا إما كما تدين تدان، فهو عوقب من جنس عمله ،أسأل الله تعالى ألا يكون كذلك. يا إما الأمر التاني إنه راح سأل ولو جيه سأل أي حد هتقوله إستر عليها وطالما ربنا منّ عليها بالتوبة.
بس بالله عليكم يا رجال قولي لو إكتشتفت ليلة بناءك حاجة زى كده ,وسترت على زوجتك تعيش عامل إزاى؟ كل ما تبقى مع مراتك وإنت حاسس إنها كانت لغيرك، ويا ترى بتفكر في إيه؟ ويا ترى هي كانت بتعمل إيه؟ تبقى عايش إزاى؟

ــــــــــــــ

بتقول: العقوبة مأساة في علاقتي الزوجية مع زوجي.
بتقول: أول حاجة أنا ماحسيتش إن زوجي أول واحد لمسني، و دي في حد ذاتها كانت في منتهى العذاب .
بتقول:عمري ما حسيت بالمتعة زى ما كنت بحس قبل كده,. دايما أنا حاسة إن أنا مش مبسوطة أنا بحاول اصطنع عليه إن أنا مبسوطة معاه. لكن في الواقع أنا بكدب عليه, ليه؟ عشان العذاب اللي أنا عايشاه كل ما زوجي يمسني وأنا بقارن بينه وبين اللي كنت بزني معاهم ، وللأسف دايما الخواطر دي بتجي لي و مش قادرة لغاية النهاردة حتى بعد ما قُلت خلاص واستقمت مش قادرة أنسى الماضي.
طبعا بتقول المتعة اللي بتحس بيها أي زوجة أنا محرومة منها. زوجي أحيانا وهو معايا بيسرح، أنا بحس إنه بيجاهد نفسه، يتجاهل انه عارف أنا كنت عاملة إزاى.
بتعبيرها: الراجل فطرته بتغلب عليه.
بتقول: لما تزوجت و عرفت اني حامل كان احساسي إن مش ده اول حاجة تمسك في بطني. و سبحان الله شعُرت بنعمة الحلال. الناس كلها بتباركلي و اقدر اقول لوالدي ان انا حامل.
بتقول :الشعور كان جميل لكن الحرام كان دايما بيعكر عليّ صفوي و بدل ما افرح زي اي بنت، كانت ذكرياتي في الحمل الاول دايما بتلاحقني.
بتقول: ربنا رزقني ببنت و انا خايفة موت ان انا اتعاقب في بنتي . فأنا لازم حبقى مع كل حركة حتعملها، و ده اكيد مش تربية، لاني لو ضيّقت عليها ده ممكن يسيب أثر سيء .
بتقول : أنا الآن اول حاجة : انا فاقدة لأحترام نفسي. أنا عندي قلة يقين في ربنا انو حيغفرلي الذنب ده بالذات. ده كلامها باللفظ. ذكرياتي بتلاحقني في كل وقت حتى و انا بعمل عمرة. كنت بفتكر الذنب و بأدعي للشخص الّي كنت وقعت معاه في هذا الحرام إنّ ربنا يغفرلي و يغفرله و يتوب عليّ.
قالت: انا عايشة حياة كلها تناقض. لا أنا عارفة ابقى مستقيمة و ملتزمة و لا انا عارفة ابقى انسانة منحرفة و عاصية. أنا كل ما اتعرف على حد كويس ابقى عايزة افضفضله و علشان كده بعثت الرسالة دي.
بتقول: انه صحيح ربنا سبحانه و تعالى رزقني بالزواج و الاولاد و الفلوس لكن انا عاملة زي الّي بيرقصو على السلالم ،لا أنا ملتزمة و لا انا من الفجار.
هو ده الزناوهوده إلّي مش عادي


الزنا اكبر الكبائر عند رب العالمين. و الكبائر دي الخطوط الحمراء إلّي بيعدّيها بيتقصّ. يعني ان ربنا بيعامل الناس بثلاث طرق:
الطريقة الاولى: تعمل الذنب، تاخذ فوق دماغك. الذنب يخلص مرة واحدة. الرجل قبّل إمرأة فشجّت رأسه. هو ماشي ضرب في الحيطة دماغه اتفتحت. فذهب للنبي صلى الله عليه و سلّم و دمه يقطر على جبهته . قال: "هذا عبد أراد الله به خيرا عجّل له عقوبته في الدنيا".
الاسلوب الثاني: امهال، و العقوبة أشدّ. يعني انت عملت الذنب و ما حصلش عقوبة ،و عملت ذنب و ما حصلش عقوبة و ربنا بيقول " لَّيْسَ بِأَمَانِيِّكُمْ وَلا أَمَانِيِّ أَهْلِ الْكِتَابِ مَن يَعْمَلْ سُوءًا يُجْزَ بِهِ وَلاَ يَجِدْ لَهُ مِن دُونِ اللّهِ وَلِيًّا وَلاَ نَصِيرًا " (النساء).
لا بمزاجي و لا بمزاجك و لا بمزاج حد. ابن القيم يقول "مجنون من يظن انه اذا فعل معصية أنه لا يعاقب" إلا في حالة و حدة : تتوب من قريب. تعمل الذنب تتوب في الحال. تلحق فسك ، يبقى ما فيش فترة للعقوبة. إنما لو تبت من بعيد ، ذنب و راء ذنب وراء ذنب ، على الاقل عقوبة نفسية. يبقى هناك عقوبة اشدّ مع إمهال.


العقوبة الاخطر، هي دي إلّي بتعدّي الخطوط الحمراء، هو ده إلّى يقع في الكبائر دي: الاستدراج. "سَنَسْتَدْرِجُهُم مِّنْ حَيْثُ لاَ يَعْلَمُونَ "
قدّام الناس :" يا عمّ ما هو عايش و مقضّيها و بيعمل و اش معنى يعني، ماهو مدّيلو فلوس و بيعمل و يسوّي".. بس هي قصّة وحدة: سوء خاتمة. هي كده، استدراج. يعطيه يعطيه يعطيه. إذا رأيت العبد يعطيه الله و هو مقيم على المعاصي فأعلم انما هو استدراج . هذا هو الخوف

حدّ مننا عايز طرقيقة من هذه الطرق؟؟ ربنا يعافينا و يعافيكم.
أول
حاجة: الزنا أكبر الكبائر. ربنا سبحانه و تعالى قال: "َالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَن يَفْعَلْ ذَلِكَ يَلْقَ أَثَامًا " (الفرقان)
القرطبي قال: هذه الاية دالة على أنّ ليس بعد الكفر اعظم من القتل بغير حق ثم الزنا. الكفر - القتل - الزنا. و الزنا بيجرجر في اجهاض و بيوصل للكفر. لأن السلف قالوا " المعاصي بريد الكفر" . فهو في الاول يجي يعيّط . أنا فاكر شاب (أنا كان عندي 17 سنة) و الولد كان بدأ يتردد على المسجد .
جالي ببكاء الدم: " أنا زنيت".
- .. زنيت؟؟
- حصل و جرى..
و بكى بكاء ما شفتوش في حياتي.
قمت خذتو في المسجد و صليت بيه ركعتين.الولد من أول ما بدأت من تكبيرة الاحرام لغاية التسليم بكاء غير طبيعي.
- قلت له "خذ بالك" ابليس حيعمل معاك حاجة ظريفة اوي، حيخليك تعمل كده ، وبعد شوية انت حتقرف نفسك : إيه يا عمّ، هو يعني انت اول و لاّ آخر .. ماهو الناس كلها كده.. و بعدين انت حتعمل إيه يعني.. حتقعد تجيب لنفسك كبت و احباط و يأس.. انت حتموت من عياطك ده..
- قلت له : خذ بالك .. حيسيبك شوية لغاية ما تزهق.. و بعد كده حيخش عليك من الحته دي: "و انت عمرك ما حتبقى انسان كويّس و خلاص رجلك وقعت في الوحل ..فعشها بقى.. ماهو ما يبقاش عذاب في الدنيا و عذاب في الآخرة ..إلّي تعرف تعملو إعملو".

-قال" لا"
و بالفعل راح اعتكف في مسجد و قعدلو شوية.. لكن "وَمَن يُرِدِ اللّهُ فِتْنَتَهُ فَلَن تَمْلِكَ لَهُ مِنَ اللّهِ شَيْئًا " للأسف، بعد شوية حصل إلّي قلتلو عليه بالضبط..
رقماثنين : الزنا سبب لعذاب الله و عقابه. فالنبي صلى الله عليه و سلم في الحديث الذي رواه الطبراني في الكبير و الحاكم في المستدرك و صححه الألباني : "إذا ظهر الزنا و الربا في قرية فقد أحلوا بأنفسهم عذاب الله"
إمّال إحنا العذاب الذي نعيش فيه من ماذا؟
ثالث
حاجة
: الزنا يمحق الإيمان و يحبط الحسنات . النبي صلى الله عليه و سلم و الحديث في الصحيحين يقول: "لا يزني الزاني حين يزني و هو مؤمن". و بيّن هذا المعنى كما في الحديث الذي عند أبي داوود و صححه الالباني قال: "إذا زنى الرجل، خرج منه الايمان . كان عليه كالظلّة، فإذا انقلع رجع إليه".
الايمان ده، عارف الثوب الذي يسترك ؟ينفع في البرد الشديد تخرج عاري؟ البرد الشديد هو الفتن.
الايمان طول ما انت لابسه، طول ما انت مدّفي ..طول ما انت قادر تعيش.. لكن لو سُلبت الايمان يبقى العذاب.
هو هذا ما يحصل : انّ الإيمان يُسلب.
رجل عبد الله 70 سنة ،عابد بني اسرائيل. المغيرة بن شعبة لمّا كان في سكرات الموت، كان يغمي عليه و يقوم كده و يقول " يا بني اذكروا صاحب الرغيف".
إيه القصة؟ رجل من بني اسرائيل عبد ربنا 70 سنة . فكان ينزل السوق بجيب أكله و شربه إلّي يقضيه شهر. نزل مرّة، الشيطان احتال عليه، و زين له امرأة، فوقع بها 7 ليالي. لكن هو عابد و احنا قلنا العبد مش معصوم، فبقى يعمل إيه في توبته؟ بقى يمشي خطوة و يسجد سجدة.

ظلّ على ذلك طيلة يومه. لما فاق لنفسه بعد السبع ليالي بقى يمشي كل حته في الارض يروح ساجد فيها لعل هذه البقعة تشفع له . قعد على كده طول النهار لغاية ما تهالك تماما و وقع في وسط جماعة من الرهبان كان الراهب الكبير فيهم (كانوا 12 راهب) يرميلهم 12 رغيف. فالدنيا ليل، محدش شايف، رمي ال12 رغيف، لقى العابد رغيف في يديه و الّي جنبه ما خذش. الراهب إلّي جنبه بدأ يقول، إيه يا عم فين رغيفي؟ انت حتاخذ رغيف غيرك؟ و تركه و مشى.
التاني لم يأكل طول النهار، ونفسه ولو في حتة خبز، حاجة صغيرة بس يقدر يتقوّت بها. فلما عرف إنها مش بتاعته أعطى له الرغيف ولم يأكل منه وأصبح مات. فوُزنت سبعين سنة عبادة بسبع ليال زنا فرجحت السبع ليالي. ووُضع الرغيف أمام السبع ليالي فرجح الرغيف. فغفر الله له.
الشاهد فيها طبعا سبعين سنة شُغل يضيعوا بسبع ليالي. فالزنا يمحق الإيمان ويحبط الحسنات.
رابع
حاجة:
الزنا سلف ودين كما تدين تدان.
واحد من الشبان إتعرف على بنت وتحت أوهام الحب والغرام وحنتجوز و حنبقى أحلى زوجين في الدنيا، وعيش عيش العصفورة وإنت فاهم. وتحت مسميات أحلام الرومانسية المزعومة ،البنت شوية بشوية لانت معاه ووقعا في المحظور.
الولد، بعد ما وقَعِت في الزنا، وهو اللي موقعاها، احتقرها، دي رخيصة أوى.
اسمعوا يا بنات عشان ده كلام كل الرجال: مش ممكن وبقول الكلام ده على إنه مش زنا عشان محديش يفهم غلط بس بقول الكلام ده وبقوله عشان إحنا سنقوله في السلسلة اللي بنشتغل فيها الشباب والزواج ، بقول لكل واحدة عاقدة إياكي تمكنيه من نفسك لإنه بعد كده هيحتقرك،رخيصة على إنه هو اللي أغواها وعلى إنه هو اللي قعد يعمل من هنا للصبح. إوعى ترخصي نفسك.
البنت بتحكي بقى بتقول:
المشكلة إن أنا حملت ،فبدأ يتهرب مني. أنا كانت أخته صاحبتي من المدرسة وهو لما كان بيتهرب كان بيتهرب بأسلوب ظريف ،يعنى مش بيقولها روحي في ستنين ألف سلامة ، لا معلش والوضع وإنتِ عارفة وأنا بحاول والله وبجمع فلوس وعايز وأعمل: بيتهرب، وهو من جواه بيقول وأنا أيه اللي يضمن لي؟
المهم صحبتنا قاعدة تزنّ فوق دماغه هنتجوز امتى؟ هنعمل ايه؟ أنا بدأت أحمل أنا هسقط ؟طب انا هعمل إيه ؟ أجهض؟ ايه الموضوع ؟ شوف لى حل.
صاحبنا: دى زنانة اوى ،عايز اخلص منها. فكّر فى فكرة شيطانية. هو عنده شالية، راح قايل لصحابه اللي هم من نوعيته أنا جايب لكم حاجة بقى مفيش لا أول ولا بعد، تعالوا الشاليه عندي بكرة الساعة 4 عشان خاطر نقضى وقت ظريف.
كلّمها هي، قال لها افرحي ياستي انا كلمت أمي ومفيش أى مشاكل وهى عايزة تتعرف عليكِ تعالي بكرة الشاليه الساعة 4.
الخطة انه يعمل إيه؟ انه دول يغتصبوها وبعدين هو يدخل: إيه ده ؟إنتِ مين اللي عمل فيكِ كده؟ أنا مش اقدر صراحة أتجوز واحدة بصراحة إتعمل فيها الكلام ده ويهرب.
اللي حصل ،البنت وهى رايحة، أخوها وقع من طوله واشتد به المرض وأهلها أخدوه وراحوا بيه المستشفى. هي: أروح اقابل ام حبيبى ولا أشوف أخويا؟ وهقول لأهلى ايه مش هينفع اقولهم اى مشوار دلوقتى ،رفعت سماعة التليفون وكلّمِت مين بقى؟ اخته. قالت لها أنا الوضع كذا وكذا وانا خايفة اكلمه يقولى بعد ماعملت كل الكلام ده وخليت امى تسنناكي وبتاع ازاى ؟ فاجوكِ ممكن تروحى انتِ وتقولى لهم إن ظروف قاهرية حصلت لى وتاخدى لى معياد تانى، عشان انا مش قادرة اكلمه، البنت اخته جانب الشاليه فلا رفعت سماعة التليفون ولا بتاع قالت أروح.
راحت، الاساتذة كانوا مستنينها افترسوها واغتصبوها. جيه صاحبنا:
ـ هاااا يا شباب؟
ـ لا لا لا، احنا طوّلنا رقبتك
ـ لا بجد؟
رسم بقى الحبتين ودخل بقى عشان خاطر ازاى، فتح الباب لقاها اخته ، سكت واصابه ذهول ، ما كان منه الا انه خرج لعربيته وجاب مسدس وقتل نفسه.
كما تدين تدان
خامس
حاجة
الزنا بيقفل الأبواب المفتحة ليك من الرحيم الرحمن. ربك سيدك حبيبك مولاك ينزل كل ليلة فى الثلث الاخير من الليل. يقول النبي صلى الله عليه وسلم والحديث رواه الطبراني وصححه الألباني:"تفتح ابواب السماء نصف الليل فينادي مناد هل من داع فيستجاب له؟ هل من سائل فيُعطى؟ هل من مكروب فيُفرّج عنه؟ فلا يبقى مسلم يدعو بدعوة الا استجاب الله له الا زانية تسعى بفرجها او عشّار".( العشار اللى هو بياخد ضرايب ظلم ).
فالزانية وبالتالى الزانى طبعا، العاهر والعاهرة لا تفتح لهم ابواب السماء.
سادس
حاجة
: الزنا سبب لانتشار طواعين العصر. النبي صلى الله عليه وسلم فى الحديث الذي رواه ابن ماجة وصححه الألباني يقول:"لم تظهر الفاحشة فى قوم حتى يُعلنوا بها الا فشا فيهم الطاعون والاوجاع التي لم تكن مضت فى أسلافهم".
الايدز احصائيات الأمم المتحدة بتقول ان فى 14 ألف شخص بيصابوا بالايدز كل يوم، الايدز من سنة 80 لغاية 2005 حصد 27 مليون انسان، في عام 2005 بس كان عدد الذين ماتوا بسبب الايدز 3 مليون واحد، ناهيك عن 40 مليون شخص يعيشون مع هذا الفيروس وينتظرون الموت عاجلا او اجلا.
الزناسابعا
سبب لكثرة الموت، موت الفجأة. يا جماعة كثرة الموت. من اشراط الساعة والنبي صلى الهل عليه وسلم يقول حديث رواه الطبرانى وحسنه الألباني:" ولا ظهرت فيهم الفاحشة الا فشا فيهم الموت".
ابن القيم بيقول:"لما اختلطت البغايا بعسكر موسى عليه السلام وفشت فيهم الفاحشة أرسل الله عليهم الطاعون فمات فى يوم واحد 70 ألف".
ثامنا:
الزنا أحد أهم أسباب سوء الخاتمة
. أحد الشباب أصيب بالايدز فهو على فراش الموت بيقولوا له قول لا إله إلا الله قال لهم هاتوا لى صاجبتى ومات.
واحد تانى قصته برده معروفة كان متيم بعاهرة فى بانكوك وبيسافر لها في الاوقات اللى ينفع يسافر فيها. راح الأوتيل قعد يتصل عليها، لم تأتي. يتصل عليها لم تأتي. خلاص مش قادر يعيش من غيرها، اول ما جت سجد لها ومات، مات ساجد لزانية !
واحد تاني، اخ اعرفه، بيغسّل. بيقول: دخلت لقيته الراجل مِسمِرّ خفيف. أول ما دخلنا وبدأنا نغسلّ اورته بدأت تسودّ. وجهه بدأ يسودّ. الاسوداد بدأ يزيد يزيد لغاية ما وصل لسرّته. اسوداد فحم، انا اول مرة اشوف كده. اترعبت سيبت الغُسل وجريت. بسأل مين ده؟؟ قالوا لى اصل كان مات وهو بيزنى.
واحد تانى احنا رُحنا غسّلنا فى مشرحة زينهم، فحكى لى احد الناس هناك قصة من واقع الناس: الولد بتاع مخدرات وكلام من ده وهم عايشين فى بيت، يطلع ياخد الشقة اللى فوق، يجيب العيال ويقعدوا يشربوا، المهم جايبين شريط إباحي وقاعدين بتفرجوا. مرة واحدة النور اتقطع، العيال خدوا بعضهم ومشوا وصاحبنا سطلان. فشوية والنور جاه، وهو نايم مش دارى بالّى فى الدنيا.
كانوا قاعدين يتفرجوا على فيلم.
الأم من تحت راحت قالت لاخته اطلعى شوفى اخوكِ ده ملهوش حس ولا صوت. طلعت بصت لقِت القعدة والوضع والفيديو محطوط، شغلت الفيديو لقت فيلم اباحى ،صاحبنا قام ولقى اخته منفعلة مع اللى بتشوفه ، فقام زنا بيها.
الام ،لمّا عوّقو ،بعثت الأخ الأصغر.
"همّا فين بيعملو إيه فوق، انده لهم عشان عايزين ناكل".
طلع الولد لقى أخوه و أخته عرايا و بيزنوا. جاب سكينة و طعنه 36 طعنة في ظهره. الولد مات، البنت اتجننت و الّي قتلو اتحط في السجن.
آدي مخدرات و آدي زنا. ناهيك عمّا أعدّه الله للزناة في القبر. النبي صلى الله عليه و سلم في حديث طويل قال : رأيت البارحة (و رؤيا الأنبياء وحي) ، شاف إنّ رجلين خذوه و بدأوا يمروا بيه على كذا موقع ، ففي أحد المشاهد، قال النبي صلى الله عليه و سلّم: فإنطلقا فإذا بيت مبني على بناء التنور، أعلاه ضيق (عارفين القمع؟) أعلاه ضيق و أسفله واسع، يوقد تحته نار، فيها رجال و نساء عرايا، فإذا أُوقدت النار إرتفعوا حتى يكاد أن يخرجوا، فإذا أُخمدت، رجعوا مرة أخرى.
أخذتو بالكم من المشهد ولاّ لا؟ من فوق ضيق و من تحت واسع، قمع كده، من تحت نار، النار تقعد تطلع بيهم ، تطلع بيهم، تطلع بيه لغاية ما خلاص حيطلعوا من فوق، تروح هادية و نازلين من ثاني و هكذا.
فلمّا سأل النبي صلى الله عليه و سلم عنهم، قالا :" هؤلاء هم الزناة" هذا عذابهم في القبر.
أمّا العذاب في النار ، فالله سبحانه و تعالى قال: "وَمَن يَفْعَلْ ذَلِكَ يَلْقَ أَثَامًا " . إيه أثاما ده بقى؟ وادي في جهنم.
"يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا ".
إبن حجر الهيثمي في كتاب مهم تبقو تجيبوه ، اسمه "الزواجر عن إقتراف الكبائر" ، بيقول إنه: في جهنم وادي إسمه "جب الحزن" فيه حيّات و عقارب، كل عقرب منها بقدر البغل، له سبعون شوكة، في كل شوكة زاوية سُمّ ، تضرب الزاني و تُفرغ سمها في جسمه ،يجد مرارة وجَعها ألف سنة ، ثم يتهرى لحمه و يسيل من فرجه القيح و الصديد . هكذا في النار.
الزنا يحرمك الحور العين. النبي صلى الله عليه و سلم قال ، و الحديث في الصحيحين : "من شرب الخمر في الدنيا ثم لم يتب حُرمها في الآخرة" العلماء قالوا قاعدة : إلّي يمد يده على حرام في الدنيا يتحرم منه في الآخرة إلاّ إذا تاب. كل العذاب إلي احنا قلناه ده إلاّ إذا تاب.
طبعا عارفين ان الزنا يوجب الحدّ. الزاني البكر الذي لم يتزوج :100 جلدة و تغريب عام. المفروض يبعدوه عن البلد سنة علشان (خذو بالكم من المعنى ده علشان حنقولو في التوبة) ماهو الناس إلّي حواليه كل شوية حيفتكر إلّي كان بيزني معاها و أصحابه إلّي كانوا بيودّوه و مش عارف إيه، فالشرع قال إبعدوه سنة علشان الناس تنسى و هو يبعد عن الناس إلّي حواليه فيكون ده سبب لتوبته.
إذا كان ثيّب يعني إذا كان متزوج (سواء كان متزوج يعني على ذمته واحدة أو مطلق وحدة أو أرمل) عقوبته إيه؟ الرجم حتى الموت.
طيب لو ماكنش فيه بلاد تطبق الكلام ده نعمل إيه؟ يُستر على نفسه. يعني ما يروحش يقول. لا.
"سترتها عليك في الدنيا و أنا أغفرها لك يوم القيامة" ..
يا من وقعت في ذلك، و قولوا الكلام ده لمن تعرفون، بالله عليك بعد كده ما تحبّه تعمل إلّي يغضبوا.. هو يغار.. غيرة الله أن تُنتهك محارمه.. يبقى هو غيران و تسوجب بفعلك مقته و غضبه.. و بعد كده طالما سترت و تبت " وأنا أغفرها لك يوم القيامة" ..
يا جماعة فيه مسألة برضه مهمة الناس ما تاخذش بالها منها عايز أقول عليها حاجة، حكاية الافلام بقى: زنى و بعد كده: " لازم تصحح غلطتك.. اتزوجني .."
ما فيش حاجة كذلك..
ربنا قال إيه؟ :"الزَّانِي لَا يَنكِحُ إلَّا زَانِيَةً أَوْ مُشْرِكَةً وَالزَّانِيَةُ لَا يَنكِحُهَا إِلَّا زَانٍ أَوْ مُشْرِكٌ وَحُرِّمَ ذَلِكَ عَلَى الْمُؤْمِنِينَ " .. التوبة مش انهم يتزوجوا.. الذنب مش واحد زنى يبقى يعمل غيه؟ خلاص يتزوجها ، يبقى كده خلاص ربنا تاب عليه.. دي مش التوبة.. فيه ذنب قد كده لازمله توبة حقيقية.. مش هي دي التوبة .
إنما لو تاب و إنصلح حاله و خلاص إستقام و خلاص الصفحة القديمة دي إمحيها خلاص ، و هي كذلك ، حقا ، مش عشان " لا يا سيدي إنت تبت و أنا تبت ، بس نتزوج عشان الفضيحة" .. لا . لو كذلك ماشي.
الإمام أحمد نصّ على تحريم نكاح الزاني من أي امراة عفيفة إلا ان تقع التوبة ...
حرام إن همّا يتزوجوا .
" ده حيصلح غلطته يا شيخ؟" : ما فيش حاجة إسمها يصلح غلطته إلا أقبل ما يتوب..
طيب، إذا عُرف السبب بطل العجب.
خلّونا نقول في نقاط، عشان نحط و صفة العلاج. عرفنا أنه مصيبة سوداء و انه و انه و انه. طب نعمل إيه؟ حلّيلي المشكلة، ما حليتش المشكلة.
1
. أول حاجة يا جماعة نشوف ليه الناس بتوقع في هذا الجرم النهارده و ليه بقى "عادي" ، عشان نعرف نعالج إزاي .. أول حاجة،
رقة الديانة : ضعيف الإيمان. لمّا أقولك "لا تنظر إلى صغر الذنب و أنظر إلى عظم من أذنبت في حقه" .أصلك لو تعرفه قلبك حيتقطع عشان اتحرمت منه. قلبك يذوق المرار زي الأخت ماهي بتتكلم و تقول النهاردة يذوق المرار علشان في يوم من الايام عملت حاجة تستوجب غضبه. طبعا رقة الديانة و الجهل عن ربنا مظاهرها كثير جدا.

* أول حاجة الإختلاط الفاحش و الصحوبية.
النبي صلى الله عليه و سلم يقول" فأتقوا الدنيا و اتقوا النساء فإن فتنة بني اسرائيل كانت في النساء " . إبن عباس يقول :"لم يكن كُفر من كفر ممن مضى إلا من قبل النساء و سيكون كُفر من بقي من قبل النساء " .
تصدّق؟ النبيّ بيقلك ابعد و انت تقولّي " أنا ابن ناس، مش أنا إلّي أمد إيدي على الحاجات من دي، أنا برضه مؤدب و عارف". يا سيدي العزيز، السلف كانوا يقولوا لإيه؟ "لو انك اتيتني بجبل أُحد ذهب (يعني جيت انت كده و قلتلي بص الجبل ده أمامك ، ماتمدش إيدك عليه و خليه أمانة عندك عقبال ما جيلك، جبل ذهب، فلوس ، مليارات) يقول و الله لا أمدّ يدي عليه. و إذا ائتمنتني على إمرأة زنجية (سوداء) لا تُشتهى ، و الله لا آمن نفسي عليها. و دول السلف.
سعيد ابن المسيّب كان اعشى، بالليل يشوف بعين و العين الثانية ما يبقاش شايف بيها، فكان يمشي في طرقات المدينة و يقول: "إني أخاف النساء".
يا عمّ خايف بس إيه؟؟ طرقات مدينة إيه؟؟
لكم الله يا شباب !
آدي أول حاجة. أنا دايما أقول فيه قاعدة: إلّي حيتبني على معصية ربنا عمره ما يجيب الخير .. مش النبي قال: ما عند الله لا يُنال إلا بطاعته" .. طيب انت دلوقتي لما تمسك إيديها و تمشي معاها و تقولها كلمتين ، حلال؟؟ "و الله في ناس يتقول حلال".. ماهو عادي..
في شباب موصّلني في الاستبيان: بصّو بقى المنطق ، بصو هو يقولها و هي تقلّو :

" - لازم نبقى عارفين ان احنا بنعمل حاجة غلط، ماشي؟ آه يعني انا و انت عشان لو نسينا الفكرة دي ممكن تجيبلنا مشاكل بعد كده، يعني حنعمل حاجات كده وكده بس احنا غلطانين، مافيش اي مشاكل؟ آه يعني عشان تبقى واخذ بالك إنت من المسألة ".
حرام ولا مش حرام؟ حرام.
طيب انا عايز حلال، مش انت في الاخر خالص بتقول صُحوبيه حتجيب جواز؟ طب صحوبيه ربنا محرمها بالشكل د ه حتمشي ازاي؟

طب ياشيخ ما هما فعلا تزوجوا ؟؟
طب إنت بالله عليك، هم يرتكبون محرم فكيف يُنال به ماعند الله ؟؟؟ والنبي اخبرنا ان ما عند الله لاينال الا بطاعة الله.
عاوز اتزوج عشان اعف نفسي عشان ابقى مستقرّ، وكل ده ما ينفعش الا من سكة الحلال حتى يرضى الله ويكون بيت سعيد بمعنى الكلمه. عشان كده اسرار البيوت.
ومتزوجين امام الناس، ويمكن امام اناس من اسعد الازواج وهي بتقول ايه؟انا مش عارفه اعيش معاه، اسرار البيوت فلا تعلم ما في البيوت.
فلازم تبقى كده لأن: "َمن يَعْمَلْ سُوءًا يُجْزَ بِهِ" . يبقى حمشي غلط حيجيب غلط
لما الله تعالى يقول:" فَلْيَحْذَرِ الَّذِينَ يُخَالِفُونَ عَنْ أَمْرِهِ أَن تُصِيبَهُمْ فِتْنَةٌ أَوْ يُصِيبَهُمْ عَذَابٌ أَلِيمٌ"
أمر من ؟ النبي صلى الله عليه وسلم. النبي قال:" اتقوا النساء". ده امرُه .وانت لا تتقى وتقول انا جدع. اذن تصيبنّهم فتنة أو عذاب أليم.
ومن مظاهر قلة الديانه التى تسبب هذه الابتلاءات

*الخلوة: قال رسول الله صلى الله عليه وسلم:"لايخلون رجل بامرأه الاوكان ثالثهما الشيطان"
"التبرج والسفور وطالما هي محتشمه ومحترمه تلبس اللي هي عايزه تلبسه"
والنبي صلى الله عليه وسلم يقول: "ان شر نسائكم المتبرجات وهن المنافقات فالعنوهن فانهن ملعونات".
دي تعملي فيها ايه ؟وده والله كلام النبي .انا لااعقّد احد في عيشته. انا اقول هذا الكلام من حرصي عليكم. هو انا بفرض رأي وأقول ياجماعه البسوا الحجاب؟ ده رأي ولا ده دين؟ انت خارجه متبرجه ليه ؟ حره؟؟ لا لست حره انت امه لله عز وجل فما يأمر به الله تعمليه.
من الآخر، ما إنت شايف، على الأقل اهلها تركوها كده يمكن حد يشوفها ويتزوجها. نفس المنطق انت تبرجتي والتبرج كبيره من الكبائر طب يجيب جواز ازاي ؟
طب ماهي اتجوزت ياشيخ فعلا و يصّ عليها و اتجوزت من الآخر خالص؟
لازم كل ده يترك اثر لان اساس البنيان كان على خطأ فلازم حتحصل لهم حاجه في حياتهم الا انهم يستدركوا امرهم بالتوبه.
ومن قلة الديانه وحيكون سبب مهم جدا وايضا في العلاج:
*اضاعة الصلاه:
"فَخَلَفَ مِن بَعْدِهِمْ خَلْفٌ أَضَاعُوا الصَّلَاةَ وَاتَّبَعُوا الشَّهَوَاتِ فَسَوْفَ يَلْقَوْنَ غَيًّا". فجمع مابين اضاعة الصلاه واتباع الشهوات وطبعا مفيش اظهر من الزنا في اتباع الشهوات.
ومن قلة الديانة

*فساد التربيه والتنشئة :
فيا من لديك بنت ولأنها امانه في رقبتك :كلكم راع وكلكم مسؤل عن رعيته،من الأول نشئها صح، لاننا في زمن الاخوه قاعدين يسألوا ندخل بناتنا فين؟ صحيح فأنا من الان بفكّر في أسماء ادخلها فين؟ و هي لسه بنت شهرين. حتدّخلها إيه؟
اذا كان البنات وفي اماكن من المفترض انها تكون أماكن كويسه بيعملوا حاجات أنا مش عاوز اكشف اكتر من كده ، كفاية النهارده أنا نفسي متمرّر و انا قاعد أقول الكلام كلّه، فكفاية، لكن الكلام مفهوم. بيعملوا حاجات لا أحد يتصوّرها وفي إعدادي.
و بعدين؟ بنتك تقعد تربيها تربيها و بعدين حد من دول يلوّثها؟ و تعمل إيه دي؟ و ما نخليهاش تتعلم و تعرف و تسويّ؟ إزاي؟ حتعيش حياتها إزاي؟
فالله يكرمك، هذا جرم عظيم: عقوق الاباء تجاه ابناؤهم انه لايهتم ان يغرس في ابنه وابنته حلال وحرام. رب غاضب في السماء.
والمصيبة ،النبي صلى الله عليه وسلم قال في حديث رواه الحاكم وصححه الالباني:" ثلاثه لا يدخلون الجنه: العاق لوالديه والديّوث الذي لا يغير على اهله".
بقى راجل سايب بنته خارجة لابسة ميني-جيب و لاّ كات و لاّ سايبها تخش مول لابسة و لابسة و من غير .. ده اسمه إيه؟؟


والدياثه تحرّم عليه الجنه. عادي، البنت الصغيرة تلبس أيّ لبس عادي. و يبقى البنت عندها 9 أو 10 سنين و ستبدأ تبلغ مبلغ النساء و تظهر عليها علامات النساء :فرحانين بيها ويقولوا خليها تحس بانوثتها ! عادي انها تتشبه بلباس الكافرات و المغنيات و عاملة زي المغنية فلانة إلّي طالعة عاملة كذا في الفيديو كليب. و مين هي بقى إلّي بيحتفوا بيها و يتتعمل ليها أحسن عروض و كلام؟ الماجنة فلانة و العاهرة فلانة .ودول اللي الناس بتقلدهم .
ومن تشبّه بقوم فهو منهم، فهل تحب ان تحشر معهم؟
ومن الاسباب طبعا

*الصحبه السوء:
وصحبتنا قالت انا لم اعرف سكة الزنا ولا سكة الصُحوبيه ولا سكة العادة السيئة الاّ من الصحبه السوء، وربنا يقول: " َيَوْمَ يَعَضُّ الظَّالِمُ عَلَى يَدَيْهِ يَقُولُ يَا لَيْتَنِي اتَّخَذْتُ مَعَ الرَّسُولِ سَبِيلًا * يَا وَيْلَتَى لَيْتَنِي لَمْ أَتَّخِذْ فُلَانًا خَلِيلًا (الفرقان)
ساعتها يوم القيامه حيقول يارتني ما كنت اعرف فلان و يارتني ما كنت اعرف فلانة.
وطبعا من الاسباب
*الاعلام الفاسد
نت دش فيديو تليفزيون كاميرات الموبايل الان و المجلات الخليعة والموضوع معروف مش محتاج تفسير اكثر من ذلك.
عايز احطلك لك حاجه يمكن تِغِير، اسمع كده:
بروتوكل حكماء صهيون: انهم سيعرضون العلاقات الجنسيه في ضوء الشمس كي لا يبقى في نظر الشاب شئ مقدس.
الاول، يضع له لقطة في فيلم وبعد شويه اللقطه تكبر وبعد شويه عادي، عيونه ألفت هذا المنظر واصبحت عيون خائنه تخون الله عز وجل.
فخلاص. يعملوا كده حتى لا يبقى في نظر الشباب شئ مقدس، حلال حرام مادقش عليها بقى ! ويصبح همه الاكبر غرائزه الجنسيه.
اسأل اي واحد ماشي في الشارع انت بتفكر في ايه ؟
هو ده اللي في الدماغ وده اللي يبشتكي منه الشباب وبيشتكي منه الناس ويتصلوا ويقولوا انه مش قادر ينسى الحاجات اللي كان بيشوفها قبل كده. ويقول يصبح همه الأكبر غرائزه الجنسيه وعندئذ تنهار اخلاقه.
فأنا بقولك بالله عليك ما تشمتّ عدو الله فينا.
ومن الاسباب

* الاخطاء الاجتماعيه

بسرعه كده كغلاء المهور، اِثقال كاهل الشباب بالطلبات. الولد عايز يتجوز، فداخلين يقولوا له :"اصل بنت عمها جاء لها ووووو فأنت كمان تجيبلها"
والكلام للأباء :خفّف عليه. ان من يُمن المرأه تيسير صداقها.
وامتناع الاولياء،البنت عاوزه تتزوج ومش قادره تقول والاب يقول لازم تكمل دراستها والبنت بتعاني ومش قادره تتكلم وابوها يصمم لازم يكون معاها شهادة كذا انا تعبت في تربيتها قدّ كذا.
نقول له: خليها تُستر عشان انت في زمن فتن.
وفيه ناس العكس، يخليها تشتغل و البنت بتصرف و مش عايز يجوزها علشان تساعد في مصروف البيت. او يجوزها غير كُفؤ اي حد والسلام بشرب او ما بيشرب مش مشكله ما دام معاه وميسور.خذ.
المرأه تمتنع عن زوجها في فراش الزوجية و تعلّمه الأدب علشان خاطر تملي عليه. وتلعنها الملائكه ويلعنها رب السماء فيبدأ يمد يده للحرام.
الرجل يهمل زوجته ولا يدخل عليها السرور بكلمه طيبه، ما خلاص قلنا كل حاجه ويعاملها كالبعير.
والنساء تبكي..
تركت لي اخت رساله على الانسر ماشين عشان تعرف تتكلم. فقالت: "انا مش حيوانه، أنا مش كده، مش ممكن يبقى التصرّف كده، هو بيعاملني كده ليه ؟" .وعندك من هذا للصبح.
نسبة الطلاق وصلت لـ5 مليون والعنوسه 4 مليون، فكل هذا الكلام لازم له حلول اجتماعيه، الحكومات مش حتحل المسائل دي.
في حاجات لازم إجتماعيا نتجاوز عنها. جالك والراجل يقدر يفتح بيت ويمشى الدنيا وإنسان على دين .إذا جاءكم من ترضونه دينه وخلقه فزوجوه.
نعالج بقى في نقاط برده سريعة وصفة العلاج:
ببساطة جدا ربنا قال إيه ؟ " إِلَّا مَن تَابَ وَآمَنَ". لاحظوا الآية ، لم يقل :وعمل صالحا، قال:" وَعَمِلَ عَمَلًا صَالِحًا فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمًا"، " وَمَن تَابَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا ". عارف الآية بتقول إيه؟ بتقول توبتين مش توبة واحدة.
مش واخدين بالكم؟ قال في الأول خالص اللي يتوب وبعد كده قال اللي يتوب يبقى ربنا يتقبل توبته.
جاب الموضوع المرتين ليه ؟ أصل هما مش توبة واحدة توبة عن الزنا بشكل خاص, وتوبة عامة لكل مقدماتها، وكل الذنوب اللي إنت ممكن تكون بتمد إيدك عليها.
أولا عشان أتوب صحّ، اللي أنا بحكي فيه بقالي ساعة ده، انك تحس بالخطر، فتخاف، فاللي إيده إتمدت ولا بيشاور عقله ولا ولا ،لو تاب صح.
ياريت كل واحد بيسمعني وله علاقة مع واحدة حتى لوكانت علاقة بمسمى الناس علاقة بريئة ،لو بجد الكلام اثر فيه وعرف يعني إيه خطر اللي انا بتكلم عليه، وأنا عارف النفس البشرية مش من السهل إنها تستسيغ الكلام ده،ياريت دلوقتي حالا نمرتها يتخلص منها، ولو ربنا سبحانه وتعالى عرف صدق نيتي حيديني بس على رضاه، يايريت كل حاجة تفكره بالذنب يتخلص منها، اللي عنده على الكمبيوتر أفلام وصور وشايلها، اللي بيدخل على مواقع إباحية يحلف على نفسه يحلف على نفسه والله يارب والله يارب ما تتمد إيدي لشئ يغضبك عني تاني.
لو إنت عايز تتوب ، لو الكلام أثر فيك هى دى التوبة، الإقلاع الحقيقي عن الذنب ، عن كل مؤديات الذنب. تعاهد ربنا معاهدة صادقة.
ممكن تحط قدام الذنب لو وقعت فيه عقوبة لنفسك.مثلا إيه، انا قُلت فى درس "بدون حرج" بتاع العادة السيئة، قُلت إن في أحد الأخوة قال يارب كل يوم أعمل فيه الذنب ده أصوم 11 يوم حتى انا قولت اشمعنى 11 يعني، بس المهم هى طلعت منه كده، قال عملتها مرة اتنين تلاتة صومت33 يوم وبعد كده رُحت الحمد لله الحمد لله ربنا تاب عليا.
أرسل لي الاخ في درس الخميس الماضي الرسالة دي ، قال فيها :
إن أنا كنت سمعت درسك وكنت حاضره في حكاية ال 11 يوم وبتاع وفعلا حلفت على نفسي وأنا قاعد صادق، بس الموضوع صار إن أنا بقى عليا 484 يوم ، ما هو كده غيه يعني لو حسبتها 44 مرة ، فهم 484 يوم ، فبيقول والله يا شيخ وبرده مش يأست من نفسي، وذات ليلة، أنا هقرأ لكم كلامه بالظبط، كنت أمارس هذه المصيبة القبيحة وكنت خايف جدا، وعارف إن ربنا يراني، بعد ما خلصت اغتسلت وقُمت وأنا محتقر نفسي، فقُمت اصلى ركعتين قيام لأني كنت سمعت إن اللي يتوضا ويصلى بعد المعصية تغفر له إن شاء الله، وسجدت وبدأت أبكي، وأقوله يارب ازاى ترضى عني، بيقول والله يا شيخ بعد هذا الموقف حسيت إن أنا شايف ربنا، بقلبي يعني، و بكلمه والله حاسس إن أنا شايفه وسبحان الله والله من الموقف ده إتغيرت 180 درجة ومن ساعتها يا شيخ الشهوة راحت تماما مني، وبقت المعصية دي بطلتها تماما، ياشيخ غض البصر بقى من أسهل الحاجات عليا، ربنا فتح لي أبواب في طلب العلم مش كنت احلم بيها، ربنا فتح عليا في حفظ القرآن، فتح عليا فى العبادات ابتديت أشتغل في قراءة القرآن، كل يوم بقيت أقرأ 3 أجزاء من القرآن في اليوم، بصوم الحمد لله يوم ويوم عشان أخلص ال 484 يوم ، أهي توبة صادقة.
احنا بقي عايزين التوبة الصادقة دي أي حاجة حط لنفسك عقوبة ، تاني حاجة عايزين توبة عامة. انتم أخدتوا بالكم من كلامها هي بتقول إيه؟ "أنا مش حاسبة إن أنا ربنا هيغفر لي الذنب ده أبدا" ، وده أخطر حاجة قالتها شوفوا كل اللي قالته كله مصيبة ، أنا في رأي أخطر حاجة قالتها دي ، لأنها يائسة من رحمة الله ، لازم نتوب كلنا من سوء الظن بالله ، ومن اليأس من رحمة الله سبحانه وتعالى.
يبقى أول حاجة عايزين توبة صادقة من الزنا، وتوبة عامة من كل مقدمات الزنا كل الذنوب نفسها، يا رب يا رب خذ بيدي وناصيتي إليك أخذ الكرام عليك، يا رب تُب علينا جميعا الآن توبة ترضى بها عنا.
تاني حاجة قال آمن مش ينفع توبة بس أنا كده بطلت مش هعمل الذنب ندمت والله خلاص. مش ينفع توقف، مفيش حاجة اسمها توقف، يا إما يزيد يا إما ينقص ، المطلوب إيمان، طب أجيبه إزاى ده؟ إعرفه. طب أعرفه إزاى؟ إتعلّم. أتعلم إزاى ؟ إتعلّم عقيدة وإعرف أسماء وصفات وإحضر دروس ومن اللحظة دي أغير منهج حياتي ، عشان الإيمان يتزرع في قلبي، افهم الشفرات، ربنا بيبعث لي رسالة إزاى أترجمها جوايا، و شوف نعمته ، شوف كرمه ، شوف رحمته، شوف أد إيه حلمه عليا عملت الذنوب دي كلها وسترني، فأحبه، فلما أحبه ، الإيمان يغذي قلبي ، هو ده الإيمان هو ده بقى اللي يقويك على الطريق، لما يبقى قلبك موصول بالرحيم الرحمن.
طيب رقم ثلاثة قال" وعَمِلَ" ولم يقل "صالحا". قُلنا وعمل عملا صالحا. إيه المطلوب؟
عمل فذ. يعني إيه؟ عمل فذ يعني عايز حاجة تعملها عمرك ما تحلم إنك تعملها، زي إيه؟ تصدق بصدقة عمرك ما تحلم إنك تعملها. حاجة لله تُؤثره بيها.صدقة، إيه كمان؟
أنا عايز بقى إنت دلوقتي عملت ذنب أو إيدك أتمدت لشئ من هذه الذنوب و بصيت لحرام علمت كذا أو والعياذ بالله وقع فى هذا الذنب، النبي قال قانون حلو أوي قال إيه؟
"إذا عملت سيئة فإعمل بجنبها حسنة السر بالسر و العلن بالعلن".
عمل عادة سيئة يعمل قدامها حسنة في السر، يتصدق سر، يعمل حاجة كده بينه وبين ربنا، يصلي ركعتين في السر. السر بالسر، والعلن بالعلن.
عمل حاجة قدام الناس جهر بالمعصية وقال أنا كنت بتاع بنات وأنا مش عارف إيه يعمل قدامها ،يعمل إيه قدامها؟ يُجوّز مسلمة.
طب أنا مش معايا فلوس؟ حتى لو 10 جنيه بس تبقى سعيت فى تزويج إمرأة زي ما كنت سبب في إغواء واحدة يبقى إنت سبب في إعفاف واحدة. ويا ريت بقى يبقى بجد إنك تقدر تعمل حاجة تكون ليها وزن يعني فعلا تساعدها مساعدة حقيقية، عشان ده قدام ده. يوم ربنا يقولك زنيت؟ تبقى فى حاجة في رصيد الحسنات تقول وعفّ إمرأة، تمام كده.
حاجة من الحاجات اللي بتتعمل حفظ القرآن. أحد الشباب طلع فى بلد من البلاد وراح مع شلة الأُنس وبيقول كده الشيطان عمره ما قالي روح إزني لأ طبعا قالي روح إتفسح وأقضي حياتك والدنيا جميلة وفيها إيه يعني ومفيش مشاكل أخدت بعضي وروحت، شوية شوية حطوا صحبة السوء قدامي: إيه يا بني هتعمل لي فيها درويش ياعم تعالا ها ها ها ها.وقع مع واحدة زنا بيها. بيقول لما زنيت ـ الولد متربي بيقول ـ والله العظيم حسيت إن حاجة فى ظهري زي اللفح وليها مرار كده في قلبي وبتأياه وجالي شعور إن أنا حيوان، وبقت حاجة في وذاني بتقول لي حُرمت الحور العين ، المعنى ده خلاني من جوايا "لأ أنا مش هعمل كده، وكل شوية أفتكر لو وقفت قدام ربنا وقالي زنيت هقول له إيه" ، بيقول خدت قرار إن أنا لازم أرجع لربنا صح ، عاهدت ربنا على الحج فى السنة دي وبالفعل رُحت حجيت، وبفضل الله عز وجل إلتزمت إلتزام حقيقي، الولد بقى صام اثنين وخميس ثلاث أيام من كل شهر، بدأ يلتحق بمعهد قرآن حفظ القرآن كاملا ، ده كان زاني، حفظ القرآن كاملا، وفي يوم جمعة كان بيعتكف ما بين العصر والمغرب عشان يتحرى ساعة الإجابة، قُبضت روحه. دخلوا عليه وهو في الغسل والله بيشع نور.
ليـــــــــه لأ؟

ده الذنب الوحيد اللي ربنا قال يبدل فيه السيئات حسنات الزنا.
كريم أوي محتاجين نحبه والله ،يبدل ده كله ويبقى حسنات؟ أه والله، يبدل السيئات حسنات؟ والله.
يبقى
إنت لازم تغيرحياتك

سيبك بقى من شلة السوء احنا محتاجين صحبة في التوبة عشان التوبة تبقى نصوح وتبقى ثابتة، محتاج تغير شيلتك، محتاج تعرف ناس صالحين.
طب ورواسب الجاهلية؟

والله الرواسب اللي احنا خايفين منها دي إن هيقعد يعيش فى الماضي و و ووو.
لما قلبك هيتملي النور بتاع الإيمان ده ، هيبدل كل الرواسب بس محتاج زي ما كنت عملت ذنوب كتير محتاج برده تصبر عشان القلب يطهر خالص ومش تستعجل إنه يطهر في يوم وليلة.
عايزك يبقى ليك ضبط في موضوع الصلاة، القرآن شفاء ورحمة ، الذكر الحصن الحصين ، القيام.
الراجل كان بيسرق في النهار وبيقيم بالليل. النبي قال "ستنهاه ما تقول" ، يمكن ركعتين في الليل تحافظ عليهم يغيروا مسار حياتك. الصيام خصاء أمتي..
عشان تقفل عن نفسك هذا الأمر الخطير ، حافظ على توبتك بصحبة صالحة إشغل نفسك ، إشغل نفسك.
يا جماعة عايزين تاخدوا روشتة تلخص بعد ما أقول كل الكلام ده كله؟ كلمة واحدة:
لو بقيت صاحب قضية وشايل همّ ، همّ دينه، هم رضاه ، بس إنت ترضى

كل ما تتحرك :يارب بس إنت ترضى، مش مهم أي حاجة تانية لو دى بقيت جوه ، لو دي بقيت حياتك ، مش ممكن يتركك لنفسك.
يا حي يا قيوم برحمتك نستغيث اصلح لنا شأننا كله ولا تكلنا إلى أنفسنا طرفة عين، عشان تبقى من الذين يظلّهم الله بظلّه. رجل دعته إمرأة فقال إني أخاف الله. عشان تنجا من كل كرب.
عارفين قصة أصحاب الغار؟ الراجل كان خلاص هيزني بالمرأة فلما قالت له إتق الله ولا تفض الخاتم إلا بحقه ، خاف ربنا، بقت دي مثقلة أوي للميزان فادّخرها له، فبقت فرجة لكل كرب ليه .

همسة
فيأذنك:

بالله ما تسوّد وجه النبي يوم القيامة!
ترضى النبي وجه يتكسف ويسود وجه لما تقف بين إيدين ربنا؟؟
يخجل النبي صلى الله عليه وسلم أنك من أمته ؟؟

حديث قال: "إني فرطكم على الحوض" (أنا أول واحد هبقى عليه) وأُكاثر بكم الأمم فلا تسودوا وجهي".
بالله ما تسوّد وجه حبيبك النبي صلى الله عليه وسلم.
وإسمع نصيحته .قال:
"
يافتيان قريش ياشباب لاتزنوافإن من سلِم له شبابه دخل الجنة"

أرجوكم المحاضرة دي حاولوا توصلوها لكل من تستطيعون ، رجائي إن كان يصح أن يكون لي رجاء عندكم ، وبالحب اللي بيني وبينكم أطلبها منكم عشان نقفل أبواب المعاصي دي، عشان نلقى الله عز وجل واحنا عملنا أي حاجة. تقول إن إحنا حاولنا يا رب نقفل أبواب الشر ونفتح أبواب الخير، فيا رب أُعذرنا إن كنا مش قدرنا نعمل اكتر من كده.
أسأل الله تعالى أن يتقبل منا ومنكم وأن يأخذ بأيديكم إليه أخذ الكرام عليه إنه وليّ ذلك والقادر عليه ، سبحانك اللهم ربنا وبحمدك نشهد أن لا إله إلا أنت،نستغفرك ونتوب إليك ،

اللهم صلي على النبي محمد وعلى آله وصحبه وسلم.

الشيخ هاني حلمي (منقول بتصريف )


قريبًا إن شاء الله الحلقة القادمة تفريغ(علاقة بريئة )

هل من مشتركات في تفريغ الحلقات القادمة ؟؟؟؟
رد مع اقتباس
 

الكلمات الدلالية (Tags)
(مش, الشيخ, تفريغ, حملي, حلقة, عادي)لفضيلة, هاني


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


منتديات الحور العين

↑ Grab this Headline Animator


الساعة الآن 09:00 PM.


Powered by vBulletin® Version 3.8.4
Copyright ©2000 - 2024, Jelsoft Enterprises Ltd.
.:: جميع الحقوق محفوظة لـ منتدى الحور العين ::.