كفته حسن باشا بالصور روعه

[أم مُعاذ]

 

الوصفة دي عرفتها واعتمدتها علي طوووووول لان مكوناتها سهلة ومتوفرة في كل بيت وبدعي لصاحبتها علي طول
وطعمها جميييييييييييييييييييييييييل وبتعمل علي السفرة منظر جامد والي يشوفها يقول انها متعوب عليها مع انها بسيطة جدا
طبق فخم وينفع في العزايم

المقادير:
لحمة مفرومة....حسب عدد افراد اسرتك
بصل مفروم...حسب كمية اللحم
بطاطس مسلوقة ومهروسة جيدا
بقدونس
2:3 م ك معجون طماطم مذوب في شوية ماء مع ملح وفلفل
قطعة زبدة
ملح فلفل بهارات

بالنسبة للبهارات انا عندي بهارات بتعطي الاكل طعم خرافي بضيفها مع كل الاكل تقريبا(ورق لورا وحبهان وفلفل) بطحن كله وبحفظه في علبة





اول شئ نخلط اللحم مع البصل المفروم والملح والفلفل والبهارات والبقدونس وممكن تضيفي شوية بقدونس او بيضة بس انا مبضفش غير البهارات والبقدونس
ونبهر البطاطس المسلوقة المهروسة كويس ونضيف لها قطعة زبدة






وبعدين نمسك قطعة من اللحم المفروم نشكلها علي هيئة طبق بس حجم كبير مش صغير عشان بتكش في الفرن انا بعتذر جدا اني مصورتش الخطوة دي بس ايدي مكنتش نضيفة وكنت لوحدي
وعشان الخطوة تكون سهلة عليكي شكليها في الصينية علي طول مش علي ايدك
يعني كانها كورة بس مبططة من القاع ومفتوحة من فوق عشان نضيف البطاطس كانها طبق زي طبق الشوربة بالظبط
ولو حسيتي انها مش ثابتة مش مشكلة خالص هتمسك في الفرن كويس ان شاءالله
وبعدين ناخد قطعة بطاطس ونكورها ونضيفها علي قطعة اللحمة الصورة هتوضحلكم





هنا كمان اضفت الصلصة وحطيت معاها شوية بصل وبهارات
وممكن تعمليها من غير صلصة اللحمة هتنزل دسمها وعلي وش البطاطس نضيف شوية زبدة وممكن اي نوع جبن شيدر او موتزاريلا او رومي





ندخلها الفرن علي 180 او 190 حتي تستوي

وهنا بعد النضج............استوت وبقت زي الفل والصلصة اتسبكت وخدت من دسم اللحمة


























وتقدم مع الارز الابيض




وبألف هنا علي قلوبكم


وعلي فكرة سبب التسمية انها طبق تركي وشكل اللحم مع البطاطس يشبه لشخص كان اسمه حسن باشا وهو لابس الطاقية التركية عشان كدة اسموها حسن باشا
منقول

[أم البراء]

بارك الله فيكِ يا أم معاذ
تم نقل الموضوع

[راجيه عفو الله السلفيه]

ما شاء الله الوصفه جميله تسلم ايديكى ان شاء الله اجربها
جزاكى الله خيرا

[أم هارون السلفية]

ما شاء الله ..
راااائعة يا حبيبة .. جزاكِ الله خيراً

[ام المؤمنين عائشه]

جزاكِ الله خيراً