الكراكيب الكراكيب وأه من الكرااااااااااكيب. شوفوا احنا تعبانين كلنا أد ايه بقالنا كام يوم فى تنضيف البيت . بس لو ده كله اتعمل وفيه كراكيب ..الله المستعان ..على فكره ثبت من دراسات كتير ان موضوع الكراكيب ده موضوع نفسى .أولا سببه أن أحنا ليس عندنا احساس بالأمان علشان كده بنحتفظ بحاجات كتير يمكن نحتاجه فو وقت من الأوقات وطبعا ده مابيحصلش. بدليل قومى دلوقتى على اآي مكان مكركب وشوفى آخر مره مديتى ايدك فى المكان واخذتى حاجه من اللى انتى يمكن تحتاجى لها.وهاسيبك انتى تردى. ده السبب فى الكركبه .. أما نتيجة الكركبه فتوتر وأحباط وعصبيه وأنتى موش عارفه ان السبب الأكوام الكتيره اللى بنمشى نتكعبل فيها فى البيت. عصبيتك مع أولادك. عصبية أولادك مع بعض. عصبية جوزك معاكى ومع الأولاد سببها الكراكيب وأكيد ساعات بيعلق تعليقات احنا ممكن نقول عليها سخيفه بس بصراحه عنده حق. ايه سبب الحاله النفسيه اللى بتعملها الكراكيب. أولا شكلها وحش أوى. وبعدين دايما تعطيكى احساس انك مهما نضفتى البيت موش بيبان عليه. ثالثا التراب اكتر مكان يتجمع عليه الكراكيب. رابعا وده المهم ان الكراكيب بتعوق مسار الطاقه الموجوده فى المكان مما يترتب عليه الشعور بالصداع والخمول والأحباط. طب ايه الحل ؟أقولك أهم حاجه علشان يكون الموضوع سهل عليكى تعاملى مع كل مكان منفرد بمعنى بلاش أقول يااااااه هاأروق ايه ولا ايه كده موش هنعمل حاجه.....أختارى اى ركن مكركب وركزى فيه فقط وكونى صريحه مع نفسك فى تقرير انتى محتاجه الحاجات دى ولا لأ ولو آه محتاجها فى ايه. وبعد أد ايه . وهل احتياجك يستاهل انك تضحى براحتك النفسيه علشان يمكن تعوزيها بعد سنه ولا أكثر. طيب على فكرة الشىء المهمل عندى وعندك فى ناس كتير بيحلموا بربعه. يبقى الحل أجمع الاشياء دى وبلاش تستهينى بيها على فكرة حتى الجرايد القديمه والكتب القديمه واى شىء ممكن تتخيليه. فى أماكن خيريه بتاخده منك وانتى مستريحه فى البيت . يبقى ضربتى كذا عصفور بحجر واحد. الحاجات دى اما تنفع ناس تانيه او بيعملوا عملية تدوير لهذه الأشياء وتدخل فى صناعة أخرى والعائد منها بيصرفوا بيه على المحتاجين. يبقى روقتى البيت وكسبتى ثواب.
أنا عايزه أتكلم على حاجه مهمه أوى. زى ما كل شخض له رائحه مميزه . أيضا كل بيت له رائحه مميزه. وحيث ان ده موضوع يخص المنزل . انا هاتكلم عليه فقط. أنا لما قلت رائحه مميزه . والرائحه المميزه ممكن تكون حلوه وممكن تكون مش حلوه. وطبعا احنا هانتكلم على اللى مش حلوه. ايه اسباب الريحه الوحشه. هانبدأ بالمطبخ لو المواعين بتفضل فى الحوض كتير ولو بيفضل اكل مكشوف ولو باسكت الزباله مابيفضاش أول بأول ولوموش بأنضف السيراميك وخشب المطبخ لأن أبخرة الأكل بتلزق فيها وتعمل ريحه مع الآتربه. لو الوضع هكذا فى المطبخ يبقى لازم فى ريحه. نقطه مهمه بجد بتزعلنى أوى احنا بنصرف فلوس فى حاجات كتير ونيجة على حاجه كلام فاضى . لييييييه مايكونش عندة باسكت للزباله محترم واحط فيه الأكياس المخصصه ليه موش اجمع شوية شنط اشى موش عارفه منين علشان اكومها فى ركن وتلملى حشرات وفيه ستات بتغسل كمان الشنط دى وتبقى لخمه نفسها على الفاضى وبعدين ماتكونش على اد الباسكت يجى كل واحد معاه حاجه طبعا موش هايقعد كل شوية يفتم الشنطه . لأيستسهل وزى ماتيجى على الأرض فى الباسكت نفسه . اللى برضه في ستات ماحدش قالها ان الباسكت ده ممكن يتغسل زيه زى اى حاجه فى البيت. طبعا بيت المطبخ فيه بالشكل ده عمره ماهيكون ريحته حلوه؟
طيب احنا لسه فى موضوع الريحه اللى موش حلوه. الحمام لو لم اتبع كل وسائل النضافه اللى اتكلمنا عليها قبل كده .طبعا الريحه هاتبقى موش تمام. تعالى لغرف النوم أسباب الرائحه الغير طيبه. انى مابهويش الأوده باستمرار. انى موش باغير فرش السراير باستمرار وعايزه أقول ملحوظه صيف وشتاء لازم السرير يتغير على الآقل فى الصيف مرتين . فى الشتاء ممكن مره. على اعتبار حاجه ان فى ستات بتفرش بطاطين ماشي بس ده موش معناه ان البطانيه ماتتغسلش كل اسبوعين مثلا وممكن تستعملى نوعيه خفيفه علشان سهولة التجفيف اما فى الصيف ومع العرق لازمه تبديل فرش السراير ياحبذا يوم ويوم وخصوصا خصوصا أكياس المخدات.الفوط زى ماقلنا قبل كده الفوطه اتبلت يعنى لازم تتغسل ماينفعش انشفها وأرجع أستعملها تانى. تهويى البيت كله دى من الضروريات زى مابنهتم نبخر ونعطر يبقى لازم يكون ده على نضافه. . يكون الأساس نضيف وبعدين هنلاقى ريحه حلوه حتى من غير عطور ولابخور ولابارفانات. يارب يجعل بيوتنا عطره باذن الله.
والله يا بسومه والله انتى كنتى وحشانى جدا بس موضوعك ده انا حاسه انى دايخه وراكى فى البيت انتى بجد دوختيييييييييييييييييييييينى انا بعمل كدا بس موش كدا اوى يعنى انتى عالرفه انا اتعلمت الكلام ده من مين جزاها الله خيرا حماتى والله يا بسمه لن تتخيلى بتعمل كل اللى انتى بتقوليه ده بس موش شهريا لا اسبوعيا يعنى اقولك هى برغم بساطتها الشديده جدا مقارنه بسيدات متعلمات تعليم عالى هى منظمه جدا وبتكتب فى دفتر كل حاجه حتصحى الصبح حتعملها انتى عارفه مثلا عندها السبت ده يوم الثلاجه والاحد مثلا البلكونات بالحيطان بتاعتها والله العظيم بتصبن الحيطان والاثنين الدواليب تعمل تغيير فيها كل اسبوع والثلاثاء تحت السراير تقلبها خالص وترش فنيك وهكا اما المطبخ بقى لا تجعل له يوم ابدا عارفه ليه لانها كل يوم فيه وكمان بتعمل حاجه حتعجبكم اوى انا اتعلمتها منها بصى انتى مثلا بتغسلى المواعين موش كدا عقبال ما تغسلهم بتحط شويه ميه سخنه على البوتجاز وفيها ديتول وعقبال ما تغسل المواعين تروح تعمل البوتجاز والحيطه اللى حوالين ابوتجاز يوميا يوميا الحيطه اللى حوالين البوتجاز واللى حوالين الحوض بتتصبن جيدا وتتشطف والاهم بقى اللى حيعجبك اوى وهى بتعمل الاكل وبتسويه على النار بتفضى درفه من الدواليب كل يوم وتنضفها وتغسل البرطمانات والعلب من بره وترصهم تانى على النشف كل يوم درفه واحده بس وهى بتعمل الاكل بتلاقى المطبخ اخر الاسبوع ذى الفل من جوه ومن بره وموش حقولك على الحمام بتبقى واقفه بعد كل فرد ما يدخل بره الحمام مستنياه يطلع تخيلى هههههههه وماسكه الديتول والفرشاه وتطهر بعده وتهوى الحمام حتى الحيطان والارض موش حقولك بقى موش احنا مثلا بنغسل الغسيل يوم بعد يوم هى عندها الغساله الهاف وخرطومها بيطرد فى الاض عقبال ما الدور بتاع الغسيل يخلص تدعك الارض ببواقى الصابون المطرود وتصبن حيطه والبنو والحوض يوميا طبعا بصى انا اتعلمت منها كتير اصلى زوجى طالع زيها وكان محسسنى انى عشان نظافتى عاديه انى اكثر واحده موش نظيفه فى العالم ههههههههههههههه بس الحمد لله اتعلمت منها وبقيت برضيه شويه ادعيلى يا بسومه وبجد موضوعك تحفه تحفه تحفه
عايزه الفت نظركم لحاجه مهمه جدا.
من الأسباب الرئيسيه لاضاعة وقت ستات كتير هى التليفون.
بدون ماتحسى تلاقى الوقت سرقك فى مكالمه واحد وانتى ماخلصتيش اللى وراكى.
بصى ياستى مهم أوى ان يكون عندك بيتك وأولادك من الأولويات يعنى هما الأول وبعدين اى حاجه تانيه.
ماترديش على التليفون طول ماأنتى وراكى حاجه.
والمحيطين بيكى مع الوقت هيتعودوا على كده وهيحترموا وجهة نظرك.وبعدين بنفس المعيار موش هاأتصل بحد لمجرد ان أنا فاضيه .
ولو فرض واتصلت بواحده صاحبتى او حتى اختى. لازم اتأكد ان جوزها موش فى البيت وانها موش مشغوله بحاجه. لاضرر ولا ضرار.
الحوائط أولا لو فيه أماكن معينه معرضه أكثر من غيرها للبقع نتيجة ان فيه أطفال أو أماكن معينه تلاقى جميع أفراد الأسره مثلا تركن على هذا الجزء بالذات أو تسند عليه .
المهم الأماكن دى تتغسل كويس وتتشطف كويس وتتجفف كويس. نيجى لباقى الحوائط موش معنى انها موش مبقعه بعنى نضيفه أقل حاجه هتكون فيها تراب.
تجيبى جردل فيه ميه وشوية مسحوق صغننين أوى علشان موش تضطرى تجففى وتبلى الفوطه وتعصريها كويس وتكونى واقفه على السلم مع الحرص وتطولى أبعد حاجه وتمسحى كويس وتشطفى الفوطه ولما تلاقى الميه أتوسخت غيريها.
وكده ولا بلبلتى الدنيا ولاحاجه.
أفتكرت ألفت نظركم لحاجه.
كلنا بنجيب كرتونة البيض.
أول ماتروحى تفضيها فى الحوض وتغسلى البيض كويس أوى وتجففيه وتحطيه فى علبه فى التلاجه وتتخلصى فورا من كرتونة البيض لأنها بتكون مليئه بالطفيليات وحاجات موش كويسة.
تانى حاجه كرتونة الحليب نفس الشىء رصيه فى رف المطبخ وترمى الكرتونه .
كرتونة الميه المعدنيه.
وحدث ولا حرج عن أنبوبة البوتاجاز للى لسه ماعندوش غاز لازم ترشيها الأول كويس بره الشقه .
وبعد شويه تتغسل كويس وتسيبيها تجف وبعدين تستعمليها. لانها أهم عامل من عوامل وجود الصراصير فى البيت.
ربنا يعافينا ويعافيكم منها.
ملحوظة : البوتاجاز من غير فويل بيكون انضف كتير من وهو عليه لان الستات طول ماالفويل شكله نضيف من فوق هى متخيله ان الحياه بمبى .
بتشليه بتلاقى حاجات لو هى شايفاها اول بأول هتعرف تنضفها , بس حبيت اقول بلاش فويل
العرض العادي
