الأخوات الفضليات
دة اول طبق أقدمه لكن في المطبخ فقلت أدخل بحاجة جميلة وجربها عن نفسي كتيييييير
كلنا اكيد فاكرين ان كفتة الحاتي لها صنعه مختلفة و صعبه علينا
انا برضه كنت فاكرة كده
لكن ضحكت على نفسي كتير بعد ما عرفت انها سهلة للدرجة ديه بصى و خالى بالك لحسن مقاديرها كتتتتييييييير قوىىىى
بصوا بقي........
1- هاتي كيلو الا ربع لحمة كندوز مفرومة لو جبتيها صحيحة افرميها في المفرمة وشين ( معلش اصل ديه لغة الجزار و من ثم لغة الحاتي ) يعنى مرتين[
ماشي
- هاتى ربع كيلو لية ضاني ( اللى هى بتاعة الخروف ) و افرميه مع اللحمة
.... علي فكرة ممكن نحط رغيف فينو فرنساوي..نبله الاول ونعصره كويس ونحطه عالخلطة علشان تمسك..
للي يحب يعني وللي مش تحب بلاش
3- هاتى بصل وافرميه او ابشرية ناعم بالمبشرة بس مش هنحطه لآ هنعصره و نأخد الميه بتاعته بس
اوعوا تبشروا البصل في المبشرة في العيون الواسعة[
- هاتى ملح و فلفل اسود و بهارات و الاحسن تحطى بهارات السبع توابل
و هقولكم بتتعمل ازاى البهارات ديه بس فى الاخر
- حطى بقا اللحمة المفرومة هي و اللية على مية البصل و البهارات و الملح و الفلفل و سيبيها تتبل مع بعضها شوية حلوين
6- بعد كده هاتى الاسياخ بتاعك و صبعى الكفته.. و اشويها على الفحم ( ) أو صبعيها على قلم " بس مش تجيبى اللحمة عند سن القلم طبعا " و اشويها فى الفرن و فى الاخر هاتى حتة فحمه و ولعيها و بعد ما الكفته تستوى حطى الفحمة في السمن اللى نزل من اللحمة هتبقى عاملة زى المشوية على الفحم و تاخد ريحة الفحم
بس طبعا اللى تشوي على الفحم احسن
7- بعد ماتستوى حطيها في طبق مفروش ( بالبقدونس
و بالهنا و الشفا
لا تنسونا من صالح دعواتكن
هاتى كل حاجة من اللى هكتبها بكميات متساوية
- كسبرة ناشفة
- قرنفل
- قرفة ( يمكن الاستغناء عنها )
- كبابه صيني
- زعتر
- حبهان
- كمون
- ورق لورو
- جوز الطيب
- فلفل أسود
هاتى كميات متساوية منهم و يا سلام لو تجيبيها صحيحة مش مفرومة من عند العطار و تحمصيها الاول شوية على النار
و بعدين تحطيهم كلهم على بعض فى الكبه و تطحنيهم
على فكرة بنحطها على حاجات كتير يعنى مثلا اي حاجة مشوية بنحطها عليها فراخ لحمة اى حاجة
و كمان تتبيلة البانية و تتبيلة فراخ الكنتاكي و ممكن اى حاجة هنقليها بالبقسماط المفروم أو الدقيق نحط منها شوية على البقسماط و الدقيق دول بتبقى روعة
يالا بقا طولت عليكم
أم اليسر السلفية