[الشافعى الصغير]

 

البنت بنتى

كتب على سلامة
حنينة وآخر لماضة..
غصب عنها
بقت بليدة فى التاريخ
وغصب عنها برضه
شاطرة فى الرياضة..
بنت أبوها
بس لما يبكى أخوها
تبقى أم..
وتبقى أخت..
وتبقى دادة..
ولما أخاصم أمها
بتستلم هى القيادة..
تيجى جنبى وتلاغينى
كأنى طفل
وأمى قاعدة بتدادينى
بابا تشرب شاى معايا
ولاّ أحكى لك حكاية
حضرتك..
قهوتك مظبوطة
ولا تحبها سكر زيادة..
ولما تقلب كل حاجة
فى كل حاجة
كلنا نضحك ونرجع
نملا تانى البيت سعادة..