واحد كبر ووعي عالحياة لقى نفسه ابن فلان وفلانة وهو دلوقتي في الإعدادية مثلا وأخوته فلان وفلانة وعلان وترتانة وساكن في القاهرة وأبوه شغال موظف حكومي وأمه كذلك أو قاعدة في البيت علموه الصلاة والصوم وعلى طول بيصوم رمضان من صغره ما شاء الله وعاشورا ويوم عرفة لكن الصلاة مش منتظم فيها قوي أو حتى مش منتظم فيها خالص!
أبوه وأمه عاوزينه يبقى حاجة لكن مستواه مش هيجيبها فقالوا خلاص يبقى حاجة تانية! والمهم يشتغل شغلانة كويسة بعد ما يتخرج ويعتمد على نفسه ويكون نفسه عشان يتجوز وإحنا معاه برضه قدر استطاعتنا وهكذا كبر وبقى شاب واتخرج واشتغل في كذا حاجة أو اتوظف بسرعة في أي مكان ياخد مرتب ثابت لا يكفي شيئا لكن أبوه وأمه ساعدوه واتداينوا وعملوا جميعات وهو اشترى حاجات تقسيط لحد ما اتجوز وخلف وعشان المسئوليات بتزيد فشاف شغلانة تانية بجانب وظيفته عشان يقدر يدفع الأقساط والإيجار ونفقات المعيشة المتزايدة ولو فرضنا إنه اتوفق لكل هذا فالعيال بتكبر ومصاريفها بتكبر وأمه وأبوه ماتوا وهو مسئولياته بتزيد سواء في البيت أو في الشغل لحد ما الحياة طحنته وشغلته ولقى نفسه كبر فجأة بقى حاجة وأربعين سنة أو عدى الخمسين وأولاده بقوا عرسان وعرايس على وش جواز فحس إنه عمل لمراته وبيته وعياله ومش عمل لنفسه حاجة أو مش استمتع بحياته كما كان يريد ومش يقدر يعمل حاجة إلا إنه يكمل كما هو لحد ما يموت وبكدة يكون أدى رسالته في الحياة إنه طحن نفسه عشان يعلم عياله ويكبرهم ويأمن لهم مستقبلهم أو عالأقل يكفي مصاريفهم لحد ما يتخرجوا وبعدين هما بقى ونصيبهم يكملوا
دي قصة حياة كثير جدا منا سواء جيلنا أو الأجيال السابقة
هنا بقى السؤال لو إنت أو انتي واحدة من دول
فين ربنا في حياتك؟!
فين سعيك للجنة في حياتك؟!
هتقولي ماهو انت شايف أهو عملت الي عليا وزيادة!
أرد عليك بأصل الموضوع وغايته وسبب وجودنا في الحياة وهدفنا الأساسي منها!
"يعبدون" "جنة"!
إنت لا عملت الي عليك ولا زيادة!
إنت على خطر عظيم جداً!!
أقولك ليه؟!
هجاوبك بمثل صغير
لو كلفوك بشغل عالكمبيوتر عبارة عن حسابات شركة مثلا ودة الهدف الأساسي ويمكن الوحيد من تعيينك بالشركة عشان تمسك لهم حساباتها وتظبطها وتطلع تقارير مظبوطة و....إلخ
تمام؟
حضرتك بقى استلمت الوظيفة وفعلا خلال ساعات عملك بتظبط الحسابات وبتعمل القيود والميزانية والوارد والصادر والفواتير والمخزن لكن مع الوقت بقيت تدخل في شغل شئون العاملين وقسم المشتريات وحتى عمال النظافة والبوفيه ودة كله على حساب الحسابات الي إنت أصلا متعين عشان تظبطها ومحدش طلب منك ولا من وظيفتك شئون عاملين أو عمال أو بوفيه!
لو تدخلك في كل ما سبق لحساب وظيفتك الأساسية وهي الحسابات ماشي لكن على حسابها لأ!
تدخلك وانشغالك بشيء غير وظيفتك الأساسية الي إنت جاي عشانها وعلى حسابها غلط وهتتحاسب عليه لأن طبيعي هتأثر في شغلك الأساسي وهتعك الدنيا وانت فاكر إنك بتخدم أو بتصلح أو إن دة أهم من وظيفتك الأساسية!
انت بقى مخلوق عشان تعبد ربنا وهدفك هو الجنة لو المثال السابق بتاع الشخص الي طحن نفسه في الحياة عشان عياله ومراته وحياته لو مش على حساب سبب وجوده ماشي لكنه بالفعل على حساب سبب وجوده وهو عبادة ربنا لأنه قصر في الصلاة ومش اهتم بتربية عياله ليكونوا سبب في دخوله ودخولهم الجنة كل الي اهتم بيه فلوس وأكل وشرب وتعليم دنيوي لا اهتم بتحقيق شهادة أن لا إله إلا الله بمقتضايتها وأن محمد رسول الله بمقتضياتها ولا اهتم بالحرص على إقامة الصلاة وتقوى الله في السر والعلن!
مش اهتم ولادوا صلوا ولا لأ ومراته محافظة عالصلاة ولا لأ ولا اهتم بتعليمهم ما يفيدهم في الآخرة قبل الدنيا ولا حتى حرص هو على صلاته ومصدر رزقه وتحري الحلال وعدم التساهل في الحرام!
هتموت و عارف إنك هتموت طب عارف وفاكر ومقتنع عملك هينقطع إلا من إيه وإيه وإيه؟!
عملت لوجود صدقة جارية أو علم ينتفع به أو ولد صالح يدعو لك؟!
هتموت وعارف إنك هتموت طب عارف وفاكر ومقتنع إيه أول حاجة هتتحاسب عليها إن صلحت صلح سائر عملك وإن فسدت فسد سائر عملك؟! وفي روايات إن صلحت فقد أفلح وأنجح وإن فسدت فقد خاب وخسر!!
هتموت وعارف إنك هتموت طب عارف وفاكر ومقتنع إن الصلاة دي مطلوب تكون تامة مش مجرد حركات وتمتمات ولو مش تامة فالملائكة بيدوروا لك عن صلاة تطوع يكملوا بيها صلاة الفرض المنقوصة منك أو كما قال صلى الله عليه وسلم؟!
هتموت وعارف إنك هتموت طب عارف ومقتنع إن إنت لو مش بتصلي أصلاً تعتبر كافر على رأي أكثر أهل العلم ويكفيك قوله صلى الله عليه وسلم(إن العهد الذي بيننا وبينهم الصلاة فمن تركها فقد كفر)!
مش إحنا بنتكلم عن تغيير حياتنا للأفضل؟!
مش إحنا بنتكلم عن سبب خلقنا وهو العبادة وهدفنا من هذه الحياة وهو الجنة؟!
إحنا منغرقين في مشاكل كتير إحنا نفسنا الي حاطين نفسنا فيها!
محدش قالك اتداين عشان تودي ابنك مدرسة خاصة!
مش مطلوب منك تجيب أحدث موبايل وشاشة كبيرة وانت على قدك فتعمل جمعية أو تستلف أو تتساهل في الحرام عشان تعمل دة!
مش مطلوب منك أصلا أي رزق من أي نوع ولا دي بتاعتك إنت بس بتسعى لكن مش يكون سعيك دة على حساب جنتك؟!
بتمر أحلى وأجمل سنين عمرك في شغلانة تانية وشغلانة بمرتب أعلى وتفضل شغال سنين عشان حاجة انت مش مطالب بيها!
انت مطالب بالعبادة بالجنة أي حاجة تبعدك عن دة أو مش بتصب في الآخر في الحاجتين دول يبقى ضياع وكارثة هتتحاسب عليها!
طب ماشي علمت وكبرت وجوزت ولادك وبناتك تمام وميت فل وعشرة
لما تموت بقى هتتحاسب على إيه؟! جوزت بنتك ولا لأ؟ علمت عيالك تعليم دنيوي ولا لأ؟!
وظفت إبنك قبل ما تموت ولا لأ؟!
هي دي فكرتك عن كلكم راع وكلكم مسئول عن رعيته؟!
ايوة أكل وشرب وملبس وبيت لكن دي ضروريات الحياة العادية فين بقى اهتمامك بالآخرة ليك وليهم؟!
ماهو لو انت اهتميت بالأكل والشرب والأمور الحياتية العادية دون الاهتمام بالأمور الأخروية من توحيد وصلاة وتقوى الله وأمانة وغيرها تبقى إنت بتهرج!
مش هينفعوك ولا هينفعك كل ما فعلته من أجلهم من أمور دنيوية لو على حساب الآخرة والجنة!
طب فين اهتمامك انت بدينك وتوحيدك وشهادة أن لا إله إلا الله وأن محمداً رسول الله؟!
ربنا خلقك للعبادة وأرسل لك خاتم الأنبياء والمرسلين ورسولك هذا ترك لك ما إن اعتصمت به لن تضل أبدا كتاب الله وسنة نبيه أو كما قال صلى الله عليه وسلم
اعتصمت وتمسكت بهما؟!
قرأت واتعلمت دينك حتى تعبده ووجهت أولادك وزوجتك لذلك؟!
عملت لأخرتك ولأخرتهم؟!
ولا زي المثال الي للأسف نسبة كبيرة (ويمكن أنا منهم لحد ما) الي ضربناه في الأول هو الي احنا ماشيين عليه والعمر بيجري والموت يقترب واحنا شغالين في الطاحونة الي مش بتخلص لحد ما نموت وكلها أعمال للدنيا وقليل منها للآخرة!.
قضية الرزق دي عاوزة موضوع لوحدها لكن هنا أحاول أن أوصل لكم أننا لسنا مطالبين بها وهي سبب لكثير وكثير من المشاكل والمنغصات وضياع الأوقات والجهد والعمر في حين أن أرزاقنا مكتوبة قبل مولدنا ولن نغادر هذه الحياة قبل أن نأخدها كاملة غير منقوصة!
والسعي لها لا يكون أبداً على حساب هدفنا وسبب خلقنا ولنعيد الآية ثانية
"وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ (56) مَا أُرِيدُ مِنْهُمْ مِنْ رِزْقٍ وَمَا أُرِيدُ أَنْ يُطْعِمُونِ (57) إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ (58) "
عاوز تغير حياتك؟!
افهم نفسك وافهم سبب وجودك في الحياة وافهم هدفك الأساسي هتلاقي حياتك بدأت تتغير تلقائياً!
هذا ما أدور حوله طوال الوقت!
ومازال الحديث يطول
فقط تابع لتغير حياتك ولتنقذ ما يمكن إنقاذه
فتغيير حياتنا ليست رفاهية ولا مجرد موضوع نقرأه
دي جنة أو نار!
تابع!
كتبه محمد وحيد الجمعة 11-8-2023م
|