بيحصلك الهبوط مع المجهود ولا من غير مجهود ؟؟؟
بتفطرى الصبح كويس ولا زيى بتنزلى من غير فطار؟؟ :)
كمان فيه ادويه تانيه بتاخديها ولا مفيش ؟؟
وعلى فكره فى ناس عايشه بضغط دم منخفض و مش عندهم مشكله مش بيحصلهم هبوط ولا دوخه
لكن مدام فيه هبوط وضربات القلب مش منتظمه يبقى
اولا لازم تروحى لطبيب متخصص فى القلب علشان تطمنى ان السبب مش من القلب
(طبعا الدكتور هيعمل اشعه ورسم قلب علشان يطمن ان القلب سليم )
وممكن يطلب منك تحللى هيموجلوبين وسكر
وحضرتك متقلقيش مش معنى انه طلب تحاليل او فحوصات ان لازم يكون فيه مشكله
الفحوصات دى للاطمئنان فقط فلا داعى للقلق او التوتر اطلاقا
معذرة أختي سااثقل عليكِ بالسؤال ما هى اسباب الهبوط الحاد للضغط وازاي اتجنب حدوثه
لا ابدا انا تحت امرك
الهبوط فى الدوره الدمويه والدوخه ليه اسباب كتيره
1-ممكن يكون نتيجه توتر عصبى او قلق
2- ممكن يكون نتيجه عمل مجهود عنيف والانسان مش واكل كويس
فالسكر بينخفض فى الدم فيعمل هبوط
3- ممكن يكون مشكله فى القلب ومع المجهود القلب مش بيقدر يضخ الدم بكفاءه فيشعر المريض بهبوط وصداع فى دماغه لان الدم مش عارف يوصل للمخ
4- ممكن نتيجه نقص الهيموجلوبين
5- ممكن يكون نتيجه نزول الدوره الشهريه
(نتيجه فقد كميه كبيره من الدم )
حجات كتير ممكن تسبب انخفاض الضغط فلازم الاول نعرف السبب وعلى اساسه نعرف نتجنب حدوثه ازاى
بس عامه نصائح بسيطه للهبوط
علطول معاكى ملبس علشان لولا قدر الله حسيتى بهبوط وانتى ماشيه تعرفى تتصرفى
الفطار وجبه اساسيه وهيا اللى بيعتمد عليها نشاط الجسم طول اليوم فاللى مش بيفطر معرض لحدوث الهبوط مع المجهود حتى لو هو سليم مفهوش حاجه
نبعد عن التوتر والقلق قدر الامكان
لو الوزن زائد نخففه حفاظا على القلب