[هبـه اللـه]

والله الواحد اتعلم كتير جداً من قناة أزهري - بفضل الله - ثم مجهوداتهم سواء كان وكيل وزارة الأوقاف الشيخ / سالم عبد الجليل اللي بعتبره في منزلة الأب لينا كلنا بجد وأسلوبه الهادي البسيط واللي بيلفت نظري انه ما شاء الله دايماً لما بيتكلم في مسألة فقهية بيكون منصف ويجيب أقوال الأئمة والعلماء مع الترجيح لكن مش بيتكلم ويقول اللي هو شايفه وبس ، وكذلك الشيخ خالد الجندي ربنا يكرمه وأسلوبه البسيط السلس الشيق الأكثر من رااائع في تفسير القرآن الكريم ما شاء الله ، وغيرهم من الدعاة زي الشيخ رمضان وغيره كتير لكن مش حافظة اساميهم

وأما بالنسبة لـ أ/ محمود سعد فمش معنى انه له تاريخ سيء في استضافة الفنانات و و و إلى آخره ، انه ممنوع يعمل خير ، فطول ما احنا عايشين وأنفاسنا بتخرج وتدخل لازم نعمل خير ، وأكثرية الناس والعلماء اللي كانوا علماء او دعاة مكانتش نشأتهم في الأصل دينية "طبعاً مش كلهم ولكن بعضهم" ولكن سبحان الله يشاء لهم بالهداية والتوفيق

وبعض الناس بحس انهم بيصنفوا المجتمع يعني مثلاً : فلان ده مش من حقه انه يحب النبي صلى الله عليه وسلم ومش من حقه يفكرنا بالنبي ، مش هو أصلاً اللي له الحق يتكلم في كده ومش هو اللي يكون قائم على قناة دينية!! ليه يا جماعة ؟ يعني هو الواحد لما ربنا يوفقه لاتخاذ خطوة او عمل خير ننقده ونبهدل فيه ، دحنا كده بنبينله رسمي ان المتدينين اخلاقهم وحشة ومعقدين وارهابيين وما شابه ذلك من الكلام الغير صحيح اللي وصّله لنا الاعلام ولا حول ولا قوة الا بالله..!

الواحد مهما عمل من معاصي بس فطرته من جوه ان كانت سليمه بتدفع لعمل الخير والقبول طبعاً من عند الله تبارك وتعالى وربنا يجعل اعمالنا كلها خالصة لوجهه الكريم

وأخيراً ، كما قال تعالى " انما المؤمنون اخوة " وليس " انما المصلون " فقط ! ، او " انما الملتحون " فقط ! ، او " انما المتحجبون " فقط ولكن كلنا لازم ناخد بإيد بعض ونرشد بعض وميبقاش في بيننا فُرقة لأن النبي صلى الله عليه وسلم كان بيعامل الناس كلها بحب وبخُلُق كريم وربنا سبحانه وتعالى قال " فبما رحمة من الله لنت لهم و لو كنت فظا غليظ القلب لانفضوا من حولك فاعف عنهم و استغفر لهم و شاورهم فى الأمر "

وعجبني جداً كلمة قالها الشيخ سالم عبد الجليل في قناة أزهري : قال : ان مش معنى ان بنت مش محجبة تبقى مش كويسة .. في بنات ممكن تكون محجبة واخلاقها مش كويسة وفي بنات ممكن تكون مش محجبة بس اخلاقها كويسة جداً ، وقال ان هي عبارة عن امتحانات في مواد كتيرة في الحياة .. يعني مادة الأخلاق ومادة الحجاب ومادة الصلاة و و و الى آخره .. ومش معنى انها فشلت في مادة وليكن الحجاب ( محتاجة بس خطوة ) ان المواد التانية اللي هي ناجحة فيهم احنا نسقطها فيها !!

هكذا في نظري أ/ محمود سعد

وربنا سبحانه وتعالى هو الحَكَم ، ولا يصح للعبد أن يعمل انقلاب - حاشا لله - ويحكم على الناس لأن الحكم لا ينبغي الا لله ، كمثل المواطن لا يصح له أن يخرج قرار جمهوري لأنه كده عمل انقلاب ووضع نفسه في منزلة رئيس الجمهورية فهذا يستحق العقاب

والله المستعان

وجزاك الله خيراً