[هبـه اللـه]

اولاً شكراً طبعاً لسعة صدرك وأداء النصيحة بالأسلوب الجميل ده يا قمر
و كويس ان عمرو خالد كان بالنسبة لك سِلِّمة صعدتي بيها وارتقيتي الى مستوى أعلى وهو العلماء الكبار والشيوخ الأفاضل وجميل انك شايلة هذا الفضل منه وهو هدايتك ( بعد فضل ربنا طبعاً وهو الأساس )
تاني حاجة عندي بعض التعقيبات
يعني لو انا مثلاُ جيتلك في فترة عدم التزامك وقولتلك صلي واقرأي قرآن واتحجبي وقومي الليل وصللي السنن كلها وصومي اتنين وخميس ولا اقولك صومي صيام سيدنا داوود عليه السلام يوم أه ويوم لأ واعملي واعملي وسوّي ، بالله عليكي مش لو شددت عليكي في الأول كده وانتي لسه معندكيش روحانيات عالية توصلك لكل ده هتنفري اصلا من الدين ولا لا ؟
طيب الكلام ده انا بقوله ليه ؟
انا دخلت على اليوتيوب وشوفت كلام عمرو خالد في مسألة الحجاب لما بيقول : مش لازم تتحجبي النهاردة بس ارجوكي لازم تلبسي حلو من النهاردة....... ( الجملة ناقصة اصلاً بس لما هتقرأي الكلام اللي جي ان شاء الله هتعرفي تكملتها )
خليكي معايا واحدة واحدة .. اولاً دي كانت محاضرة مدتها 90 دقيقة تقريباً وطول المحاضرة كان بيتكلم عن فضل الحجاب وعقوبة تاركه وهكذا
المهم كان بيقدم عدة نصايح للبنات انها تتمسك بيها وأول ما جه على مسألة الحجاب ( ودي الجملة المقصوصة من المحاضرة ) قال : انا مش عايز أحط عليكوا لود (load ) زيادة وان كان يااااريـــــت اللي جاهزة تتوكل على الله ، لكن اللي هقدر اقولهولكوا ابدأي الخمسة دووول
وبعدين ذكر بنت من اسكندرية كان لبسها وحش اوى اوى وقال يا بنات انتي ممكن تكوني مش محجبة لكن اوعي تكوني بتلبسي وحش اوي لأن غضب ربنا انك مش محجبة يختلف تماماً على غضبه انك بتلبسي وحش
وقال حديث الرسول صلى الله عليه وسلم :"صنفان من أمتى لا يدخلون الجنه ولا يشمون رائحتها وان رائحة الجنه لتشم من مسيرة خمسمائة عام ، ( وبعدين قعد يشرح في النقطة دي وقال ان في صنفين هيدخلوا الجنة متأخر أوي أوي أوي وان مش معناها انهم مش داخلين لكن هيدخلوا متأخر اوي اوي اوي ومش هيشموا ريحتها )
وبعدين قال طيب مين الصنفين دول ؟ قال الصنف الثاني (الخاص بالمحاضرة): " نساء كاسيات عاريات (( قال : احنا مش بنتكلم على اللي مش محجبات ، في مش محجبة بس محافظة على نفسها أرجوكي خليكي منها لأن النوع الثاني هو ده المقصود وهتتأخر أوي )) مائلات مميلات (( بتوقع شباب )) رءوسهن كأسنمة البخت المائلة "
وقال بصوا النبي بيقول ايه ، الكلام ده يخوف يا جماعة ، وقال انا مش عايزك تتحجبي بس ارجوكي البسي كويس ثم أعاد مرة اخرى قول النبي صلى الله عليه وسلم " لا يدخلون الجنة ولا يشمون رائحتها وان رائحة الجنه لتشم من مسيرة خمسمائة عام "
وقال مش لازم تتحجبي النهاردة بس ارجوكي لازم تلبسي حلو من النهاردة عشان مفيش داعي تبقي من اصحاب الحديث ده

لمشاهدة المقطع المقصوص اضغط هنا
انتي فهمتي يا قمر الفئة المخاطبة هي ايه ؟ بيكلم بنات تقريباً مش ملتزمين بالمرة .. والموضوع باختصار قدملهم عدة نصايح وفي الآخر قال مش عايز اتقل عليكوا او احملكوا فوق طاقتكوا لكن ابدأي بالخمسة دول وبعدين هو شايف انها مش محجبة وعايز يعدّل على الاقل من طريقة لبسها كبداية ومع انه في اول المقطع قال يااااريت اللي جاهزة تتوكل على الله
( وفعلاً في ناسي كتير ومن ضمنهم واحدة صحبتي قالتلي انا عندي في البيت موافقين على النقاب بس انا حالياً معنديش روحانيات عالية وحاسة اني لو لبست النقاب هقلعه ((وده معنى كلمة جاهزة او مش جاهزة))) ده بالظبط اللي هو عايز يوصله
وهو عشان بيتكلم بعفوية زايدة وعشان بيتكلم بلغة الشباب علشان يقدر يوصلهم الناس هاجمتوا
حاجة تالتة يا قمر مش معنى ان في واحد مش ملتحي يبقي خلاص نحكم عليه انه مش كويس ولا نبص للملتحي ونحكم عليه من ظاهره انه هو ده التمام علشان ده مش مقياس يا جميل وربنا الأعلم بالنوايا والبواطن واللي في النفوس ولا ايه رأيك ؟
ومش احنا ( مهما روحنا او جينا احنا عباد والله أعلم احنا عباد ولا عبيد عند ربنا ) اللي هنحكم على الناااااااااااااااس لأن ربنا هو الحَكَــــــم
حاجة رابعة يا قمر انتي قولتيلي ( ينفع نسيب كلام ربنا ونقول قال عمرو خالد ) يا بنتي احنا مسبناش كلام ربنا ولو كنا هنفهم كلام ربنا من دماغنا يبقى لازمة الدعاة او العلماء ايه ؟ منا ممكن اقولك يبقى محدش يتكلم في الدين خالص ما كلام ربنا موجود .. بس المقصود يا قمر مين اللي هيفهمنا الكلام ده .. هتقوليلي مش عمرو خالد اللي هيفهمنا كلام ربنا وهو بيضل الناس والشباب بتسمعه عشان عايزة اللي على هواها والكلام ده ..
بصي يا قمر الآية اللي بتقولك "وما أرسلنا من رسول إلا بلسان قومـه ليبيّــن لهم " هو ده فعلاً اللي لمسناه في عمرو خالد هو محدد الفئة المخاطبة اللي هي الشباب فبيتكلم بلغة بسيطة وعفوية يوصل بيها الدين للشباب ( زي ما قولتلك كده سِلِّمة نصعد بيها لحد ما نرتقي للأحسن )
يعني هضربلك مثال احنا مثلاً او اى حد عموماً لما هنيجي نكلم طفل صغير تفتكري ممكن نكلمه كلام كبار ميفهموش ؟ ولا لازم ننزل بعقلنا ويبقى زي الطفل وممكن نعملله اراجوز كمان عشان الطفل يتجاوب معانا .. صح ؟
هو ده اللي انا اقصده ، ان انجذاب الشباب لعمرو خالد مش عشان هواهم انما عشان بيقدملهم الدين بطريقة مبسطة
وانا واحدة من الناس اللي بسمع فئات كتيرة من الشيوخ وسبحان الله اصلاً مش بسمع كتير لعمرو خالد يعني هو برنامجين او تلاتة اللي تابعتهم لكن في ناس تانية وعلماء كبار الحمد لله بفضل الله بسمعلهم والشيخ محمد حسان صاحب مسجد عندنا في المنصورة ومعهد اعداد الدعاة وكنت ممكن اخرج من المعهد واقولك ان الناس كلها بتقول على المعهد ده بالذات انه متشدد جداً وفي معاهد تانية متساهلة في بعض الأمور مش عندنا ومع ذلك الحمد لله مكملة عادي بفضل الله وحده
فالموضوع مش موضوع بنسمع اللي على كيفنا او بنمشي على هوانا ( وان كان في ناس كده ) لكن نعوذ بالله ان نكون منهم ، وعايزة اقولك ان عندي واحدة صاحبتي وأنا زيها بالظبط وبدون ذكر اسم الشيخ بس هو بيعطي درس كل خميس في مسجد معين وله جماهيريه كبيرة جداً ولكن حضرناله كذا مرة ووالله يا بنتي كنا بنخرج مش فاهمين حاجة ومعدناش بنحضر ويمكن لو عرفتيه تستغربي
اما موضوع الموسيقى حلال فأنا دورت على اليوتيوب ملقيتش غير مقطعين والاتنين عمرو خالد بيقدم فيهم اتنين منشدين وأنشدوا بالموسيقى لكن ما شوفتش عمرو خالد بيفتي ويقول المعازف حلال يا جماعة ، هتقوليلي اومال لما الناس تشوف الكلام ده هيفهموا ايه ؟ هقولك الله أعلم اصلاً دي مسألة فقهية والبعض يقول انها حرام بالاجماع والبعض يقول انها اصلاً مسألة خلافية والموضوع اصلا فيه فتوى فمش احنا اللي هنتكلم فيه
لمشاهدة المقطع

اضغط هنا
نكمل بعدين ان شاء الله عشان تعبت
الله المستعان