[الشافعى الصغير]

 

طبق اليوم

كتب على سلامة
ربع كوباية ميه م الحنفية
ده لو تيسر..
نص كيلو بصل
ومش شرط يتقشر..
وسنة ملح وفلفل أسمر..
ولو مفيش أسمر..
أى لون يعجبك..
يا عم اكتب ورايا
إحنا من أولها هانكشر..
شعار البرنامج إيه..
الطبيخ نفس
مش أكتر..
وتشهد علينا الحلل والبوابير..
إننا طبخنا وأكلنا لحم الكلاب
والحمير..
لا حد فينا مات..
ولا حد قال آى..
ولا حد وقع واتكسر..
والجدع بقى
اللى يعرف ليه..؟
وإزاى؟
أو يقدر يفسر..
معادنا الأسبوع الجاى..
مع حلقة جديدة م البرنامج..
لو كان لنا عمر..
وفينا روح..
نضحك..
ونبكى..
ونهزر..