[أم عبد الله]

السلام عليكم ورحمة الله وبركاته
(الغضبانه )
مع تصحيح وإضافة أختي في الله
هجرة إلى الله بارك الله فيها .
مين يا ترى هى الغضبانه ؟!
عندنا في مصر لما الواحده بتزعل من زوجها بيقولوا
أصلها غضبانه في بيت أهلها أو زوجها مغضبها في بيت أهلها
أو غضبانه في بيت أبيها لو ها نتكلم باللغة العربية !!!

طيب تعالوا نسأل أنفسنا في حاجه اسمها غضبانه في بيت أهلها
في الشرع ؟ وهل هذا حل في الواقع أم حللنا المشكلة بمشكلة
أكبر تعالوا نشوف مع بعض لحد النهاية ؟

هاأقولك يا أختاه : في حد لما بيزعل بسيب بيته معقووول
ده لو حد عنده بيت وفي مرة كان مخنوق وراح يقعد عند الجيران
الناس هاتقول عليه مجنون طبعا أكرمكم الله عزوجل .

هاتقولي هو ده بيتي لاء مش بيتي طيب لحظه من فضلك
تعرفي مين اللي قال إن بيت الزوج هو بيتك تعرفي؟
ياترى مين؟ الله جل جلاله من فوق سبع سموات قال
إنه بيتك أيوه والله ربنا قال كده في القرآن الكريم :

قال الله تعالى : {يَا أَيُّهَا النَّبِيُّ إِذَا طَلَّقْتُمُ النِّسَاءَ فَطَلِّقُوهُنَّ لِعِدَّتِهِنَّ وَأَحْصُوا الْعِدَّةَ وَاتَّقُوا اللَّهَ رَبَّكُمْ لَا تُخْرِجُوهُنَّ مِنْ بُيُوتِهِنَّ وَلَا يَخْرُجْنَ إِلَّا أَنْ يَأْتِينَ بِفَاحِشَةٍ مُبَيِّنَةٍ وَتِلْكَ حُدُودُ اللَّهِ وَمَنْ يَتَعَدَّ حُدُودَ اللَّهِ فَقَدْ ظَلَمَ نَفْسَهُ لَا تَدْرِي لَعَلَّ اللَّهَ يُحْدِثُ بَعْدَ ذَٰلِكَ أَمْرًا} الطلاق (آية:1)

شوفتي ربنا جل جلاله في القرآن قال(بيوتهن)
وهذه من أحكام الطلاق الزوجة تعتد في بيت الزوج

طيب هاتقولي انا مش ليا كرامة هاقول عندما تخرجي
من بيتك بتساوي نفسك بي الزوجة التي تأتي بالفاحشة المبينه وهى (الزنا)
عياذً بالله، فأين الكرامة إذن في الخروج من بيتك.وبعدين شكلك حايكون ازاي لو لم يأت الزوج لمصالحتك ويقول زي ماخرجت من البيت من نفسها ترجع من نفسها وساعتها كرامتك حتكون فين!!!! والا الشيطان حايخليكي تتمادي ومترجعيش لبيتك ؟!
واين انتي من قول الرسول صلوات الله وسلامه عليه في وصفه للمرأة الصالحة

(التي إنْ غضبت أو أغضبت قالت لزوجها : يدي في يدك لا أكتحل بغمض حتى ترضى عني )
وبعدين بصراحة ازاي الزوج والزوجة يقبلوا
إن مشاكلهم تبئى فرجه لكل من هب ودب سبحان الله!!!
انا بتعجب من الناس دي بصراحة وفي ناس تانية ممكن يصل
الأمر بينهم في مجلس الصلح الى سباب وشتائم أمام الناس
هو يقول دي ست نكدية وهى تقول دا رجل مجوعني !!!
وبعد الفضايح اللي على الملأ بينهم قال إيه يصالح الزوج
زوجته بعد كل المصائب دي !!!!!مش مكسفين من نفسكم بالله عليكم!!!

خلاصة القول: مفيش حاجة اسمها غضبانه في بيت أهلي ده
حل غير وارد يعني مش موجود هو ده المستحيل بعينه.

والحل: المشاكل تتحل داخل البيت وبلاش فضائح يا مسلمين بقى .

والسلام عليكم ورحمة الله وبركاته.

وللحديث بقية إن شاء الله إن قدر الله لنا ولكم اللقاء
والبقاء .