[الشافعى الصغير]

 

صورة جماعية

كتب هيثم دبور
أدان يدن ونتجمع
ومدفع يدوى ويسمع
وبنسمى
وبيننا حلم بنعيشه
قميص يومى بكراميشه
وأكل أمى!!
وآه لو دقت أكل أمى
وأنا سفيف..
لكن ف اللمة ببقى غول
ومع ذلك تملى بقول
أنا ف الأكل مابفكرش
وبشرب ضحكة ف عنيكو بشراب الورد
وبقى دا بيزداد عرض..
من الضحكة
يدور بيننا شريط سيما
لكام ذكرى..
وكام قعدة
بنتلاقى على غدوة
على عشوة
على القهوة
تكهرب ف الدماغ فكرة
تخوفنى
بخاف بكرة
بخاف لتكون آخر مرة
يجمعنا الرغيف والملح