[مسلم]

جزاك الله خير يا اخ ابو عمر واسمع ياسيدي
******************************

تسلم ايده والله يعينه
اللى رماها دى البرطوشه
لو كعبها كان يفقع عينه
او يفتح راسه المهروشه
فيه كام ام بجزمه ف ايدها
نفسها تتقطع على راسه
زى ما قََطّع جسم وليدها
بغباوته وكتم انفاسه
فيه كام اب الغل ف صدره
والدم بيغلى ف شرايينه
وصاحبنا من شره وغدره
لشطانه بيدبح قرابينه
فيه كام طفل صبح متيتّّم
علشان هوه دبح له ابوه
والطفل المسكين بيكتّم
صرخته احسن لو سمعوه
يبقى الامر ساعتها يحتّم
دبحته راخر لو مسكوه
فيه كام واحد شد حزامه
على بطنه بيصرخ م الجوع
وده من جشعه فك زمامه
وبينهش فينا المفجوع
جزمة ايه تعمل ايه جزمه
فى الغيظ اللى ف دم الناس
لو يسببونا حتحصل ازمه
ولاحدش حيلاقى مداس
كله حيتحَدّف على صاحبك
والجزمه ماتفرقش معانا
لكن فَشْت غلنا تحبك
ماهو برضه اتسبب فى حفانا
لو كان دمه يسيح على وشه
زى ما سيح دم ولادنا
لو بالسيف م الرقبه نحشه
زى ما بيقَطّع اكبادنا
يمكن كانت تبرد نارنا
ويخف ف دمى الغليان
م الندل اللي هجم على دارنا
وبياكل لحم الغلبان
وانت يا جورج اهى جاتلك وكسه
والاجيال حتقول اهو بوش
اول واحد خلا الرؤسه
يتحَدِِّفوا بجزم فى وشوش

دكتور
عادل عيد