يوميات طبيب امتياز ـ مراسلنا فى المستشفى ـ

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

هذا موضوع اتمنى ان يكون يوميا يرويه لنا مراسلنا فى المستشفى وسنحاول جاهدين ان ننقل لكم ما دار مع مراسلنا ولو عرفنا نجيب لكم اخبار اخرى هنجيب واهو يكون حاجة جديدة برده ينفرد بها مراسلنا لمن اراد ان يتابعنا
فى يوم 10 مارس وفى تمام الساعة التاسعة صباحا ـ طبعا اول يوم النشاط والحماسة الطلابية واخدة الجميع وواخدانى معاهم ـ الكل فى المستشفى وكل واحد بيشوف اتوزع فين
المهم مراسلنا طلع تخدير ـ اللى سمعناه ان مفيش غياب ولا حضور ـ بس اذاى نرجع من اول يوم مينفعش لازم نروح .
روحنا اوضة التخدير وتستلم بدلتك من واحد لسة معرفتش اسمه وتشوف ان داخل فين المشكلة ان اوضة العمليات اللى مراسلنا هيدخل فيها كانت زحمة ـ على حسب التوزيعة ـ طبعا الالتزام شعار منقدرش نروح نشوف غيره نروح اوضة تانية

* الحالة الاولى : دولى فى الخصية
نلاقى عيان المفروض متخدر ـ وهتعرفوا ليه قولت المفروض ـ دكتور كبير واقف ـ باشا ذى ما بيسموه ـ والتانى قدامه وهدوء تمام ولسة هيفتحوا بطن العيان العملية بتتعمل من البطن علشان يربط الوريد من فوق
طبعا مراسلنا مسبش الفرصة مهو فيه تربيزة الناس زحمة عليها وتربيزة لسة هتتزحم نقف على الفاضية
وبعيدن الناس جت تباعا
طبعا الناس اللى جاية بتسال مراسلنا الحالة ايه ـ المشكلة ان المراسل مسألش الباشا ـ ولقاه بيفتح بطن واول يوم بقى قولت هيشيل زايدة ـ ومش اقولهم بصوت واطى لا بصوت عالى ـ بس الحمدلله الباشا قالى لاء الحالة كذا وبذوق والله
وبعدين والباشا شغال العيان بيقوله براحة يا دكتور ـ قولت يبقى العيان متخدر نصفى ، رغم اللى اتقال ان الافضل كلى فى الحالات دى ـ تيجى تسال دكتور التخدير ـ ميردش ـ طبعا مش هتسأل الباشا ـ قولت برده مش هنسلم ومش هنمشى واقف واقف ـ بس قال للعيان غمض عنيك واعمل نفسك نايم ومتصدعناش بقى
شوية والباشا حن علينا واتكلم شوية بس والله كان مفيد طبعا ـ منقدرش نقول غير كده ـ
وبعدين بعد ما الباشا خلص لازم تقول كلمتين برده
كل واحد قال كلمتين تشجيع وشكر للباشا ـ بس طبعا مراسلنا الشريف لا يجامل ـ ممكن علشان متردش علينا فى الاول
ولكن الذكاء المصرى الدفين يخلى واحد يقول للباشا انت ليه عملتها كده معملتش العملية التانية ـ يقصد طريقة تانية ـ وعينك متشوف الا النور ـ معلش بقى نكتفى بهذا القدر علشان الرقابة والشغل اسرار يا سيد ـ وبكده تعرف ان لو حالة هدوء اياك انك تتكلم وتضيع الهدوء

* الحالة التانية : التهاب مزمن فى الثدى ـ كانوا بيقولوا كده ـ
وقفنا برده هنروح فين ـ انا حاجز اليوم كله وهلعب دور كمان ـ
والمرة دى قولنا هنعرف تخدير بقى حاضرين الحالة من الاول
دكتورة التخدير جت عايزة تخدر العيانة تحاول تسأل ـ بقاء الوضع على ماهو عليه ـ قولت مش مهم التخدير ـ
وجه باشا ـ بس المرادى على صغير ـ ولقانا واقفين من الاول قال يشرح وبصراحة كان تمام خالص
وبيكلم بثقة ذى الفل قولت فى بالى مش العجلة هتلف وهنفهم ـ قال الحالة كذا ومش هنستنى المعمل يقولنا هى سرطان ولا لاء الحالة واضحة
ابتدى وفتح وبعدين استخدم الدايثرمى وانت تشم احلى ريحة كباب بقى ـ هو بيعمل حرارة وذى الشوى كده ـ المهم الحمدلله شال ذى مهو كان واعدنا وكان رايح يقفل ساب اللى تحتيه يقفل هو فبيقولوا نستنى المعمل ـ قاله معمل ايه قفل قفل ـ انت تشوف حد بيكلم بثقة كده تعرف ان حاجة هتحصل وطبعا مينفعش تعترض لان موقف صحبك لسة فى بالك ـ تسكت احسن انت مشاهد فقط ـ
وفجأة بعد ما قفل يجى واحد تانى باشا تانى طبعا ـ ويقولوا اذاى تقفل الحالة طلع فيها ورم ـ سرطان ـ ولازم تشيل ولا اقولك خليها السبت بدال انت قفلت
وجه الباشا الاول وقال انا كنت حاسس بس كنت متفائل ـ وعجبى ـ
وبكده تعرف يقولولك تقفل تقفل متقفلش متقفلش ـ هو انت دافع حاجة من جيبك ـ

* الحالة التالتة : فتق فى البطن
وهنا جه باشا ـ اصغر ـ كل ما تتأخر الناس بتصغر الكبار يجوا الصبح ياخدوا وش القفص وخلاص
المهم مكنش معاه مساعدين لأنه لسة فى منتخب الشباب هيجيب منين قال يجيب واحد من الناشئين فكان مراسلنا واقف قالوا تتعقم ـ قال وماله هو انا دافع حاجة من جيبنا ـ
قالى اتعقمت قبل كده ، الشافية شعارى : لا ياباشا احنا اول يوم ، قالى مش مهم تعالى ، كان ذوق جدا بصراحة قالى اعمل ايه وكان متعاون جدا ـ قولت العجلة بدات تلف تانى ـ الحمدلله
وبعدين الحكيمة قالتلى اعمل كذا وكذا وكانت متعاونة برده
فتح البطن وانا مطالب منى افهمه رغم انه كان دور جديد عليا بس الحمدلله ربنا يسر الحال وهو كان متعاون ومتفاهم ـ متعرفش بقى هو كده ولا علشان ملقاش غيرى مجبر اخاك لا بطل ـ لا تدرى بس قبل منبتدى كان فى دكتورة اتعقمت ـ بس مراسلنا مش هيسب دور البطولة بقى ـ خصوصا ان كلنا امتياز وهو كان طالبنى ـ شكله كان بيقدر المواهب ـ وطالبنى بالاسم ـ هو مش لاقى غيرى بينى وبينك ـ
شال الفتق وظبط الامور وركبنا الشبكة الحمدلله وكان مطلوب منى اوسعله علشان يشوف فى بطن العيانة شوية بايدك وشوية بآلة لازم تتصرف بقى
والحمدلله لاول مرة ايدى كانت فى بطن عيانة ـ او عيان ـ لولا ستر ربنا عليا كنت سبته ومشيت بس طبعا الحمدلله ومكنش ينفع اسيبه وامشى الراجل وثق فيا وقدر المواهب اسيبه بعد فتح البطن ـ مش انا هذا الرجل ـ
والحمدلله العملية تمت على خير وفى الأخر سابلى غرزة ليا وغرزة للدكتورة التانية ومحدش دفع حاجة
وطبعا هنا لازم اشكره واسلم عليه ـ قدر موهبتى واختارنى وهو مضطر ـ يبقى اشكره من قلبى
وبكده نعرف حد يقولك حاجة تسمع كلامه ومتقولش لاء حتى لو متعرفش
انت فرجت كربته يبقى كربتك هتتفرج ان شاء الله وهو هيعاملك باحسن ما تتوقع
ونشكره مرة تانية على دور البطولة اللى ادهونى


وكفاية كده لانى روحت بعد الحالة التالتة
مش معقول هتفرج طول النهار بقى
وكمان رجلى وجعتنى انا واقف احتياطى حالتين
ونزلت اساسى فى التالتة ومكنتش مدرب كويس

وإلى لقاء فى الحلقة الجاية
وياريت متكنش زهقت من الموضوع
انا كتبته كمذكراتى وعلشان متخضش من اول يوم فى كتير اتخضوا

هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم

[أبو مصعب السلفي]

الله المستعان
لا أدري أأقول: أضحك الله سنك على طريقتك
أم أقول: إنا لله وإنا إليه راجعون على حال الأطباء -إلا من رحم ربي-!

على العموم
جزاك الله خيراً يا أستاذي
وشد حيلك عشان لما نيجي نقول -إلا من رحم ربي- تكون مندرج تحتهم

والحمد لله
..

[طالب النجاة]

جزاك الله خيرا ،

أنا بتهيألي أنتم أكتر الناس بتتأكد عندهم شكر نعمة العافية ، لان كل حاجة قدام عينيكم
لكن الذين ينظرون الى الجانب المادي.. قلوبهم قاسية

ما شاء الله مراسل بيجيب حالات كتيير،

[د. حازم]

الف مبروك ياهندسة على اول غرزة والحمد لله انك لم تجرح أيدك وانت ماسك الابرة والخيط
ياريت تخترع لنا ياهندسة ماكينة خياطة للجروح أو دباسة ندبس بها الواوا
وافتكر بكره يا هندسة لما تكون باشا وتشرح للناشئين تحت 25 سنة انك كنت فى يوم من الايام فى الامتياز
نفسى تسأل الراجل الاول ماذا كان شعوره لما فاق من البنج

[الشافعى الصغير]

جزاكم الله خيرا جميعا
وشجعتونى للمزيد من الصمود
النهاردة الحلقة شكل تانى ومكان تانى ـ انتظروها ـ
الف مبروك ياهندسة على اول غرزة والحمد لله انك لم تجرح أيدك وانت ماسك الابرة والخيط

مش بقولك فى الموضوع فوق الباشا كان بيرعى المواهب برده ليه نظره مش واخد اى حد

ياريت تخترع لنا ياهندسة ماكينة خياطة للجروح أو دباسة ندبس بها الواوا

موجودة بالفعل بس النفس اللى تشتريها
وافتكر بكره يا هندسة لما تكون باشا وتشرح للناشئين تحت 25 سنة انك كنت فى يوم من الايام فى الامتياز

لست هذا الرجل ـ مش بقولك طول الحلقة شريف وشفافية ـ مش ممكن اكون كده قول حاجة تانية

نفسى تسأل الراجل الاول ماذا كان شعوره لما فاق من البنج

مش لما يكون اتخدر اصلا علشان يفوق
قابلونى الحلقة الجاية

[أم عمر السلفية]

الله المستعان
لا حول ولا قوة إلا بالله

[أبو أنس الأنصاري]

في انتظار الخَضّة الثانية .
والحمدُ للهِ على نعمةِ العافية .

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

فى يوم 11 مارس وفى تمام الساعة التاسعة صباحا ـ لسة الحماسة موجودة وأحلام اليوم الأول بتراودنى والنشاط والحماسة الطلابية واخدة الجميع وواخدانى معاهم ـ خلاص بقى عرفت مكانى ورايح وكلى أمل ألاقى الراجل اللى لسة محفظتش اسمه بيقول مفيش بدلة ـ يقصد بدلة التخدير ـ قولت أدى اول صدمة بس برده مش هنسلم ونرجع الالتزام شعارى نتكلم مع الراجل مصر على موقفه مفيش بدل الدكاترة كلهم جم وكل واحد وشلته ،عدى علينا بكرة وتعالى بدرى ،قولت خلاص مش هنموت
بس مش هنروح برده ـ الحماسة تخلينى اقترح على الناس نروح مكان تانى ـ كله بلاش بقى
نروح مركز نضيف جدا بصراحة وهو مركز الاورام تدخل نضافة فائقة وتكيفات ونظام قولت الدنيا هتضحكلى بقى دخلنا جبنا البدل من عندهم والناس متعاونة جدا وبترحب بينا ـ قولت العجلة هتلف دخلنا اول اوضة مفيش زحمة ولا حاجة بقى نسأل العملية ايه الناس بتجاوب التخدير بيجاوبوا ـ قولت احنا فين اكيد فى حاجة غلط دول بيجاوبوا ـ

ونبدى مع الحالة الاولى سرطان فى المثانة
والعيان كان كبير نسأل الله أن يشفيه وجميع مرضى المسلمين اتفرجنا وعايز تسأل تسأل والدكاترة واخدين راحتهم خالص وقفنا حوالى ساعتين والدكتور ـ والمرة دى مش باشا ـ بيقلولوا يا دكتور والكبير كبير برده
الدكتور عايز يسلك الورم الورم منتشر ،يقطع ويشوف برده مفيش امل ،والحالة متأخرة والدكتور اعلن ان العيان مش هيستفيد من العملية وحالته هتسوء أكتر
فكان قدامه اختيار يقفل تانى ولا يشيل والعيان يسوء
ساب العيان 10 دقايق يفكر وطلع برة ورجع قال المفروض فى الكتب اننا ممكن نشيل والعيان وحظه ولكن انا لو شلت وغامرت الحالة هتسوء العيان حالته سيئة جدا ومنتشر فى الجهاز الهضمى ومش هيستفيد وكده ممكن نشيل الليلة كلها نقفل احسن
بصراحة عجبنى قراره ـ رغم انى مش فاهم ـ ولكن قال مش هعمل نفسى بطل ونشيل والعيان يموت على التربيزة ومخفش على شكله ولا حاجة ـ قال نقفل والعيان يمشى على علاج اشعاعى افضل ـ وبالفعل الدكتور قفل ونسأل الله ان يشفى مرضى المسلمين
والحالة خلصت بعد ساعتين ونص تقريبا بس طبعا كان كل شوية جرس انذار للحكيمة عدى الفوط خلى بالك من الفوط ـ انتم عارفين بقى برامج التوك شو مش هتسبنا لو نسينا الفوطة وكأنهم فاكرين انها ملاية ميعرفهوش انها ذى الشاشة
وبكده نتعلم ان مصلحة العيان اولا برده متعملش بطل والعيان يموت منك
يافرحتى شيلت الورم والعيان مات

الحالة التانية : أخد عينة من الغدة اللفاوية من تحت الأبط
دكتور جه يعملها بس كان صغير شوية اداله البنج الموضعى وفتح ،ووهو شغال العيان بيتالم ادى بنج تانى و5 دقايق والعيان بيتالم ويصوت تانى
متعرفش بقى العيب فى العيان هو اللى فايق اوى ولا العيب فى البنج هو اللى مضروب واكيد طبعا العيب مش فى الدكتور
بس اللى ضايقنى بصراحة الدكتور كان بيكمل والعيان بتتالم جدا والناس تقوله اديله بنج يقوم مدى بعديها هو مكنش سامع ،العيان كان شوية وهيقوم من اللى شافه
انا عن نفسى قارنت بين الحالة الاولى والحالة التانية قولت لازم لو مش بتعرف متعملش بطل ومحدش مولود متعلم نتكلم واحدة واحدة هى مش بالدراع
وكفاية كده لانى روحت بعد الحالة التانية
مش معقول هتفرج طول النهار بقى
وكمان رجلى وجعتنى انا واقف احتياطى الحالتين
ونويت اشوف حل لرجلى ان شاء الله
وإلى لقاء فى الحلقة الجاية
وياريت متكنش زهقت من الموضوع

هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية

[أم عبد الرحمن السلفية]

ما شاء الله .. تبارك الله .
حلقات ماتعة .
ونسأل الله أن يعافي جميع مرضى المسلمين .
جزاكم الله خيراً, ووفقكم الباري لما يحب ويرضى .

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

فى يوم 12 مارس وفى تمام الساعة الثامنة والنص صباحا ـ المرة دى نازل بدرى بقى عايز احجز البدلة قبل ميخلصوا وكلى أمل وتفائل كعادتى لقيت الراجل اللى لسة مش عارف اسمه بيقولى بالسلامة بح ـ مفيش عمليات النهاردة رغم هو اللى قايللى تعالى بكرة بدرى الساعة 8 ونص ، النهاردة أجازة قولت فى بالى والله انا مكنتش عايز انزل بس هى الحماسة اللى عملت فيا كده قولت للى معايا احنا نروح وخلاص ناخده اجازة وادى جزاء سماع الكلام
لولا الأصحاب بقى ـ يقنعوك تروح مكان تانى واحنا نزلنا وحاجات من دى ـ والضمير يتكلم ساعتها قولت خلاص يلا
نروح مكان تانى نلاقيه بالسلامة بح برده ـ شكل الخميس اجازة مش رسمية ولا العيانين جم ولا الدكاترة جم ـ العيانين عندهم خبرة بقى ـ قولت يبقى كده ملناش نصيب النهاردة وبكده نعرف انك لو مش عايز تنزل متنزلش ونصيبك مش هيخده غيرك واجرى يا ابن ادم جرى الوحوش غير رزقك لم تحوش ـ وخد دى من عندى بقى ـ وياتشوف العيان يا متشفهوش
وكفاية كده لانى روحت بيتى أولى بيا
مش معقول هلف على كل الاقسام بقى
وكمان رجلى لسة بتوجعنى
وناوى اشوف حل لرجلى ان شاء الله
وإلى لقاء فى الحلقة الجاية
وياريت متكنش زهقت من الموضوع

هى الكتابة بفلوس يعنى
انا هريحك بكرة ، بكرة اجازة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية
ويارب العجلة تلف

[هجرة إلى الله السلفية]

بارك الله فيك

ومتابعة معك يوميات طبيب امتياز

رغم المآسي

رغم الاهمال

رغم قسوة الكبار



وناوى اشوف حل لرجلى ان شاء الله

نصيحة لاتفكر اطلاقا في الجلوس علي سرير المرضي لأراحة قدميك فلن تستطيع اقناعهم انك لست مريضا وانك تستريح فقط الا بعد ان ينزعون الزائدة علي اقل تقدير...

[الشافعى الصغير]

نعم صامدون صامدون رغم الصعوب ـ قصدى الصعاب يعنى ولكن وزن البيت بقى ـ
جزاكم الله خيرا نصائح غالية منكم
ويحضرنى فى نصيحتكم الكريمة ما دار امام عينى فى تحضير الحالة الثانية : التى كانت تشكتكى من التهاب مزمن فى الثدى ـ
يسألوها اى واحد تقول الشمال ، يعيدوا السؤال تجاوب برده ، متاكده يا حاجة ، تقول آه ، طيب ارفعى ايدك اللى نحيتها تعبانة ترفع الشمال
فالحمدلله اتاكدوا فى الاخر والدكتور اتاكد قبل ميفتح برده ماحنا عارفين الأخطاء ساعات بتتعمل العملية فى الناحية السليمة ـ ونطلع نفتح الملف على الفضائيات وكله يسترزق المحامى يشتغل والمذيع بشتغل والعيان يطلعه بتعويضوكله بيقسم مع العيان بقى ـ وكل فى مصلحة الزبون ولا حد فاهم حاجة

استنونى بكرة إن شاء الله بيوم جديد من يوميات طبيب امتياز لسة ملتزم فى الحضور وصامد صامد

[د. حازم]

ياهندسة بلغ مهندسين التخدير يسألوا العيان هل معتاد على شرب القهوة وبعدين يسألوا فى أذنه بشويش "ياكابتن انت بتأخد حاجة على القهوة مع الشلة" لان العيب ليس فى البنج ولا فى مهندس البنج العيب فى الشاى ابو حليب الذى يشربه العيان على القهوة مع الشلة
وبعدين حكاية أفتح قفل من غير التكملة ياهندسة بلغ الباشوات ان العيانين بنى ادم من لحم وعظم وعنده احاسيس ومشاعر وليس فأر تجارب نفتح ونشوف وبعدين نقفل لان الاسطى الباشا مشغول فى مستشفى الباشوات فى الشارع بجوار المستشفى وفعلا صدق من قال ضحينا بالجنين والام من أجل جيب الباشا

[الشافعى الصغير]

ماشاء الله نصايح غالية بس هو لو بيشرب شاى بحليب بيقول من الاول
انت عارف اللى داخل فى عمليه بيعترف مش ضامن هيقوم ولا لاء
نسأل الله لهم الهداية
العيب مش فى التخدير العيب فى العيانين بقوا مفتحين وفايقين زيادة
ومسالة انه يقفل بعد مافتح ولقى ان العيان مش هيستجيب او أضرارها اكتر ،انا مع التقفيل ،طبعا انا مش هعمل بطل والعيان يضر علشان شكلى ـ مش أجى اكحلها اعميها يعنى ـ انا عن نفسى احترمته

ضحينا بالجنين والام من أجل جيب الباشا

طيب ما الأسهل نضحى بالأم والجنين علشان الأب يفرح ويتجوز تانى

واستنونى الحلقة الجاية فيها مفاجأت اكتر ورجلى وجعتنى أكتر ربنا يستر عليا

[د. حازم]

لو ممكن نلخص اليوميات ونعرضها فى حلقات بك اصبحنا
وحقك محفوظ ياهندسة المكسب يتقسم بالعدل بينا
انت 0.1 % والعبد الفقير لله 99.9%

[الشافعى الصغير]

وحقك محفوظ ياهندسة المكسب يتقسم بالعدل بينا
انت 0.1 % والعبد الفقير لله 99.9%

كده ولاهندسة ولا حصلنا حضانة
بقى ده العدل بتاعكم ـ وبنعيب على الناس ـ
انا اتصدمت ، وعلى العموم انا مذكراتى ملك الجماهير العريضة ولا اسعى لمقابل مادى ـ الكتابة مش بفلوس ـ انا بكتب للجماهير فانا منهم وهم منى
مش ادور على 99.99% ، عنوانك غلط يا هندسة
أنا الشريف لا كذب لا اسعى للتربح وعمرى مفكرت فى الفلوس كفاية الجماهير
زعلتنى ( كنت تخليها 90% ليا و10% ليك كنت افكر ) شايف الكرم بتاعى برده الكرم مش بالكلام احنا افعال
وانتهز الفرصة قبل ما دور النشر تاخد المذكرات
استنونى فى الحلقة الجاية

[أم الرميساء !!]

ما شاء الله .. أعانكُم الله ويسر أموركم ..
أسأل الله أن يشفي مرضانا ومرضي المُسلمين ..
جزاكُم الله خيراً ، ونفعَ بكُم ..

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

فى يوم 14 مارس وفى تمام الساعة التاسعة صباحا ـ لسة راجع من الأجازة وبقول يأهلا بالعمليات ـ روحت فى معادى ولسة بدور على الراجل بتاع البدلة قولت أحسن اروح المراكز المحترمة وتكييف ونظام وبدلتك موجودة وفندقة ـ انا المرة دى اللى سبته ـ روحت شوفت الليستة قبل ماأدخل وظبت نفسى على الحالة اللى داخلها ـ لقيت صمت رهيب مبيقطعوش غير صوت التكييف قولت مش مهم واقف واقف العملية كبيرة والفرجة لبليل
الحالة الاولى والوحيدة : سرطان فى البلعوم وممتد زى ماهنشوف واخد المرئ ومتفسح فى البطن ـ ربنا يحفظنا ـ
الباشا الكبير كل شوية يجى يدى التعليمات المفروض سايب اللى تحتيه يشف الرقبة والمفروض كان هيتشال الزور ويتركبلها وصلة من الامعاء ـ ده كان المفروض ولكن المفاجأت معانا مبتخلصش وهنشوف ـ
الدكاترة اللى تحت الباشا شفوا الرقبة وكانت الامور ماشية تمام قعدنا نتفرج ساعتين ونص على ازاى هما بيفصلوا كل جنب من الرقبة، وكان فى فاصل ،ان العيانة بتصحى ،ولكن بتحصل فى احسن العائلات نامت تانى وكل الامور مستقرة
لغاية لحظة فصل البلعوم والزور اللى فيهم الورم وطبعا مكانوش متوقعين المفاجاة بعد فصل البلعوم والزور نسأل الباشا ونديه ولا نفصل على طول ، كالعادة افصل افصل ـ انا قولت فى بالى هما ازاى هيقدروا يرجعوا كل حاجة زى ماكانت انا لو مكانهم همشى لسة صغير بقى وقولت لو العيانة فاقت هتموت من شكلها ربنا يعافينا ـ مش هتلاقى رقبتها اصلا وكلها مقصات وبعدين حطوا الفوطة على الرقبة وسابها وراحوا للباشا ويريحوا ربع ساعة بعد 3 ساعات من الشغل المتواصل تخللهم سؤال لينا انت عارفين الحالة ايه ـ طبعا انا شوفتها فى اللستة فسكت لانى مش فدائى بصراحة والهدوء كنز لا يفنى ـ فواحد فدائى قالهم سرطان وهو ناسى انه واقف فى مركز اورام ـ المشكلة انه كان مضايقهم ـ فعينك ماتشوف الا النور تك تك تك على اللى اتقاله واللى سمعناه والشغل اسرار يا سيد والرقابة معانا بقى ـ قالوا يتسلوا علينا بقى واحد واحد جم عندى ـ قوتله طبعا ياباشا الحالة كذا وانت بتعمل كذا ـ ولولا ستر ربنا كنت حصلت صاحبنا فالحمدلله على اختراع الليستة ودى نصحتى :مش عارف متتكلمش مع حد اكبر منك ومتعرفوش
المهم رجعوا بعد الريست وفتحوا البطن وعايزين يطلعوا الأمعاء ويخدوا حتة منها لقوا الورم منتشر فى البطن ومش هينفع يعنى لو كنا استنينا مفصلناش الزور والبلعوم كان احسن ـ بصراحة مش عارف بس هما لفوا ورجعوا وقالوا هنقفل نعمل فتحة فى الجلد للعاب وفتحة فى بطنها تاكل منها ـ وربنا يشفيها ـ والعملية اللى كان مقرر لها 6-8 على كلامهم بقت 4 ساعات تقريبا ومكملتش علشان هما قفلوا لأن مش هينفع الوصلة الخطة اللى كانت هتتعمل للعيانة وربنا يشفيها
وطبعا الباشا الكبير مجاش علشان دوره اتلغى فى العملية فالحمدلله على نعمة الصحة وانا كنت واقف علشان اشوف هيلموا الرقبة ازاى والبطن ـ بصراحة انا لاول مرة احس ان العيان فى العمليات بيتعامل معاه كأنه مش عايش ـ شغال برحتك ومفيش آه ـ طبعا بيعكر صفو الهدوء لو واحد اتكلم مش فى وقته او العيان حب يصحى غير كده ولا الدموع
وبكده نستفيد بلاش تفصل قبل متجهز اللى هتوصل به وتتأكد انه هينفع ـ ده رأى من غير دليل علمى ـ ده اللى حسيته انهم مكنوش متوقعين انهم مش هيوصلوا فاكرينها عملية كاملة وكنا هنتعزم معاهم على الغدا بس الظروف بقى
تانى حاجة اياك تتكلم مع حد متعرفوش ولو اكبر منك خصوصا لو مش عارف وحتى لو عارف متتكلمش ـ الهدوء الهدوء ـ كنز لا يفنى ومش هيعرف قيمته غير اللى يتكلم

وكفاية كده لانى روحت بعد الحالة
مش معقول هتفرج طول النهار بقى
وكمان رجلى وجعتنى 4 ساعات وزيادة واقف
ونويت اشوف حل لرجلى ان شاء الله
وإلى لقاء فى الحلقة الجاية
وياريت متكنش زهقت من الموضوع


هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية مفاجأت غير متوقعة بجد

[د. حازم]

الحمد لله الذى تتم بنعمته الصالحات ثم ام بعد
لقد اوجعتنى وذكرتنى بوالدتى رحمها الله وجعلتنى اشك ان هناك اهمالا غير عاديا ربما تسبب فى وفاتها حيث اجرت قبل وفاتها عملية فى ابسط من هذا
اما العملية التى كتبت عنها عملية نسبة نجاحها بسيطة جدا حتى لو اجراها المعلم مصطفى معبد لان حركة البلعوم حركة انقباضية حتى ينزل الطعام الى المعدة اما حركة الامعاء فهى حركة دودية وكل مسخر لما خلق له وفى أحسن الاحاول فأن المريض ينام على سرير خاص بزاوية تقترب من 90 درجة حتى لا يخرج الطعام من المعدة واذا كان المريض رجل فان البيت ينقلب رأسا على عقب لان راجل البيت انكسر ويحتاج الى من يعينه اما اذا كانت انثى متزوجة فتلك طامة لان الزوج يكتشف انه مطلوب منه ان يعمل كل شغل البيت من طعام وغسيل ونظافة وطبعا انت تعلم ان الكل مشغول ولا يوجد احدا يتحمل مع اهل الاسرة هذا الحمل الثقيل
الاعمار بيد الله سبحانه وتعالى لكن الحالة التى تحكى عنها حالة متأخرة جدا نسأل الله لها العافية ولاهلها الصبر
لو تريد ان تكون ايجابيا ابدأ حملة تبرعوا لتحديث اجهزة كلية طب المنصورة واذهب للعميد حاول اقناعه بالفكرة وهى فكرة صعبة جدا لتعارض المصالح
فمثلا بعض اجهزة القصر العينى الفرنساوى معطلة واذا اردت ان تعمل اشعة عاجلة فما عليك الا ان تعبر الشارع لتجد مركز الدكتور فلان الفلانى للاشعة وهو كله اكل عيش
والى الله المشتكى وحسبنا الله ونعم الوكيل وسامحك الله فقد ذكرتنى بالذى مضى

[أبو أنس الأنصاري]

الباشا الكبير كل شوية يجى يدى التعليمات المفروض سايب اللى تحتيه يشف الرقبة والمفروض كان هيتشال الزور ويتركبلها وصلة من الامعاء ـ ده كان المفروض ولكن المفاجأت معانا مبتخلصش وهنشوف ـ
الدكاترة اللى تحت الباشا شفوا الرقبة وكانت الامور ماشية تمام قعدنا نتفرج ساعتين ونص على ازاى هما بيفصلوا كل جنب من الرقبة، وكان فى فاصل ،ان العيانة بتصحى ،ولكن بتحصل فى احسن العائلات نامت تانى وكل الامور مستقرة
لغاية لحظة فصل البلعوم والزور اللى فيهم الورم وطبعا مكانوش متوقعين المفاجاة بعد فصل البلعوم والزور نسأل الباشا ونديه ولا نفصل على طول ، كالعادة افصل افصل ـ انا قولت فى بالى هما ازاى هيقدروا يرجعوا كل حاجة زى ماكانت انا لو مكانهم همشى لسة صغير بقى وقولت لو العيانة فاقت هتموت من شكلها ربنا يعافينا ـ مش هتلاقى رقبتها اصلا وكلها مقصات وبعدين حطوا الفوطة على الرقبة وسابها

الحمدُ للهِ تعالى على فضلهِ ومنِّه ، وأن عافانا مما ابتلى بهِ كثيراً من خلقِهِ .
وسامحكَ اللهُ .

يشف
شفوا الرقبة
مش فاهم يا مولانا !
قصدك ايه بالكلمتين دول ؟

ازاى هيقدروا يرجعوا كل حاجة زى ماكانت
أكيد بالهندسة العكسية .

فعينك ماتشوف الا النور تك تك تك على اللى اتقاله واللى سمعناه والشغل اسرار يا سيد والرقابة معانا بقى
يعني هيَّ جَت على دي ؟!
أضمن لك الرقابة هنا ان شاء الله .

وربنا يشفيها
اللهم آمين .

وانا كنت واقف علشان اشوف هيلموا الرقبة ازاى والبطن
إجابتي فوق طلعت صح وللا ايه يا هندسة ؟

وكفاية كده لانى روحت بعد الحالة

طبعاً كفاية ..
انت كنت عايز تكمِّل تاني ؟

ونويت اشوف حل لرجلى ان شاء الله
لأ خليها كده كويس ، كفاية علينا أربع ساعات وجع بطن .

وياريت متكنش زهقت من الموضوع
!!

استنونى الحلقة الجاية مفاجأت غير متوقعة بجد
هنروح فين يعني ؟!
أسألُ اللهَ تعالى أن يَشفيَ مرضانا ومرضي المُسلمين .

[الشافعى الصغير]

لو تريد ان تكون ايجابيا ابدأ حملة تبرعوا لتحديث اجهزة كلية طب المنصورة واذهب للعميد حاول اقناعه بالفكرة وهى فكرة صعبة جدا لتعارض المصالح
فمثلا بعض اجهزة القصر العينى الفرنساوى معطلة واذا اردت ان تعمل اشعة عاجلة فما عليك الا ان تعبر الشارع لتجد مركز الدكتور فلان الفلانى للاشعة وهو كله اكل عيش

جزاكم الله خيرا على هذه المبادرة بس والله العيب مش فى ضعف الإمكانيات ولا عدم وجود الأجهزة ، الأجهزة موجودة والإمكانيات متاحة حتى لو مش بالكامل بس الامور بتمشى ، ممكن من اللى شوفته اقول انه عدم اهتمام كافى يعنى ضعف الإمكانيات مكنش السبب انه يفصل قبل السؤال ولا يستنى يشوف الوصله هتنفع ولا لاء هو استعجال من وجهة نظرى ، أى خطأ بيكون نتيجة استعجال ومش هتفرق 5 دقايق تأخير فالله المستعان

شفوا الرقبة

مش عارف اجيب كلمة بمعنى تانى بس انا هشبهالك بحتة لحمة وعليها عضم وجلد ولما تلاقى الجزار طلعلك اللحمة بس ورمى العضم والجلد ـ هى تقريبا كده ـ كانوا بيشفوا الزور علشان يفصلوه من اللى حوليه ويشلوه لوحده ومعلشى بقى اللغة ضعيفة
واستنونى الحلقة الجاية

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ


فى يوم 15 مارس وفى تمام الساعة التاسعة صباحا ـ معادى الرسمى ـ روحت فى معادى ومازال الالتزام مستمر ولسة بدور على الراجل بتاع البدلة وجابلى البدلة وعرفت اسمه كمان قولت خلاص العجلة لفت والجواب بيبان من عنوانه
كنت جاى اليوم ده وعارف انا داخل لمين بصيت على الليستة وشوفت الدكتور فين ودخلت
بصراحة راجل محترم جدا ومتعاون للغاية وبيشرح من نفسه الحالة

الحالة الأولى فتق فى البطن وكان هيشيل جزء من البطن من تحت كمان
حضرت العملية من الاول والعيانة اتخدرت تخدير كامل ولأول مرة العيانة متصحاش طوال العملية والدكتور كان بيشرح خطوة خطوة والمساعدين بتوعوا كانوا متعاونين ويشرحوا بصراحة كانت العملية ظريفة جدا مكنش بيعكر صفوها الا ان الجوانتى بيتقطع من الدايثرمى ـ حاجة زى المشرط بتطلع حرارة ـ رغم ان الجوانتى المفروض يستحمل واحد منهم كان لابس اتنين فوق بعض واتقطع وعجيبة برده الخيط يتقطع ميهمش ـ الظاهر العتة وكلاه ـ بس انا استمتعت من طريقة الدكتور فى الشرح وتواضعه وبعد مافصل الجزء اللى تحت من البطن ـ الجلد والدهن اللى فيه ـ وبالصرة ابتدت المواقف الكوميدية بمعنى الكلمة كل دكتور كبير يعدى يقول له اوعى تنسى تعمل صرة ، الصرة فين ، هتعمل ايه فى الصرة ، وفجأة تحولت الصرة لمطلب جماهيرى نسوا العيانة والعملية وبيطالبوا بالصرة سبحان الله عيانة فوق ال60 هتفرق معاها اوى الصرة واللى يجى يقول له فى حالتين ماتوا ـ فيقول له احنا على طريق لما الحالة تفوق ادينى التقرير ـ وعجايب فعلا
المهم الفتق هو صلحه وركب الشبكة وكانت عملية مفيدة جدا ليا ولجميع اللى واقفين
وطبعا والمساعدين بيقفلوا وسط التاكيدات انهم يعملوا صرة لازم يعملوا صرة والحمدلله الصرة اتعملت والعيانة ربنا شفاها بعد حوالى 3 ساعات فى العملية بس كانوا ممتعين جدا
وبكده نتعلم اهم من العملية انك متنساش الصرة لو هتشيلها والشكل الخارجى اهم من الشكل الداخلى
وكمان نستفيد ان الدكتور المحترم اللى بيعلم الناس ، الكل بيشكر فيه وبيدعوله ، غير اللى شايف نفسه
الحالة التانية ازالة المرارة بطريقة ذى المنظار ـ من غير فتح البطن ومش عارف ترجمتها ايه ـ
برده روحت اتفرج على نفس الدكتور ـ لأنى بصراحة بحترمه وبحبه ـ طبعا اول مرة اتفرج على بطن عيان داخل فيها الآلات وطالعة فى التليفزيون ـ فيلم عمرك متنساه او تفكر تسيبه قبل ميخلص ـ
برده الدكتور كالعادة فضل يشرح كل حاجة فى العملية والخطوات وهو شغال والكل استفاد لغاية طلع المرارة وقال عادى مش لازم من اول مرة تبقى متخيل الوضع جوة عامل ازاى بس برده استفدنا
وبعد العملية الكل طبعا بيشكره وبيهنيه ولازم انا اكون منهم ـ لان المرة دى مكنتش بنفاق ـ لانى استمتعت معاه وان شاء الله رايحله الأسبوع الجاى ان قدر الله لنا البقاء
وبكده نعرف ان الكبير كبير ، ومش لازم يبقى سنك كبير علشان تبقى محترم ، الاحترام سلوك مش بالسن
وكفاية كده لانى روحت بعد الحالة
مش معقول هتفرج على حد بعد الدكتور المحترم ده
وكمان رجلى كالعادة
ونويت اشوف حل لرجلى ان شاء الله
وإلى لقاء فى الحلقة الجاية
وياريت متكنش زهقت من الموضوع



هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية مفاجأت غير متوقعة بجد

[مجدى غريانى]

طبعا ظريف جدا هذه اليوميات واكيد بتفكرنا لما كنا دكاتره امتياز بس ده من 24 سنه والحال هو الحال-رغم دوام الحال من المحال-
كان النواب بيقولنا ان الوصف بتعنا-hopless----- useless ------blood carier
لكن اتعلمنا -ولما جه علينا الدور علمنا --
لكن ياصديقى اتمنى من هذا المراسل الهمام -ان يصف لنا رحلته القادمه فى الجيش او فى التكليف
مثلا لوكان فى كفر البطيخ او فى نجع فى الصعيد وهو المسئول عن كل وظائف وزير الصحه فى الزمام
كله والبيه الدكتور البيه الدكتور راح ومفبش فى جيبه ريحه الفلوس-
ممكن نحكى ونقول المواقف الاجتماعيه للناس العاديه
لكن رجاء المسائل الفنيه بلاش علشان مانعملشى بلبله -بين العامه والناس تنسى الجانب الانسانى فى مهنتنا وتكبر -اخطاء وارد ان تحدث بدون تعمد- او نظرا لضعف الامكانيات الماديه
وعلى فكره انا معجب جدا بمواضيعك الطبيه ونشاطك وربنا يوفقك -وتكمل رحله السيد ابوالعلا البشرى
د_مجدى طه

[هجرة إلى الله السلفية]

متابعون
والله المستعان
مش عارفة لو قالوا لي اني احتاج لعملية
حاعمل ايه!؟
اكيد مش حاعملها

[د. حازم]

مش عارفة لو قالوا لي اني احتاج لعملية
حاعمل ايه!؟
اكيد مش حاعملها


نسأل الله لكم ولجميع اعضاء المنتدى السلامة والا نموت بسبب العمليات الجراحية وأن نموت على طاعة ولا يعذبنا بذنوبنا ولا يجعلنا نحتاج الى احد من خلقه امين امين

[أم عبد الرحمن السلفية]

اسأل الله أن يشفي مرضانا ومرضى المسلمين .
جزاكم الله خيراً, وأعانكم الله, ووفقكم لما يحب ويرضى .

[الشافعى الصغير]

نسأل الله لكم ولجميع الأعضاء السلامة وسامحونا لو الموضوع سبب للبعض القليل من القلق ولكن ما كتبت هذا الموضوع إلا لانتفع به اولا وينتفع به الآخرون فالله المستعان
ولا اخفيكم سرا انى لا اتمنى ان اموت على تربيزة العمليات ـ إلا ان يشاء ربى شيئا ـ فاتمنى ان اموت صحيحا معافى لانى لا اتوقع هل سأصبر وأشكر فى المرض ام لا
فنسأل الله ان يحسن خاتمتنا جميعا
وانتظرونا فى الحلقة القادمة

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ


فى يوم 16 مارس وفى تمام الساعة التاسعة صباحا ـ معادى الرسمى ـ روحت فى معادى ومازال الالتزام مستمر ولسة بدور على الراجل بتاع البدلة ملقتهوش بس لاحظت ان محدش موجود كتير قولت اجازة قالوا لاء مشددين فى الدخول ـ عدد قليل بس اللى يدخل ـ قولت يلا هى طردة ولا اكتر
والمرادى نقيت بدلة من وسط 3 بدل ـ لك تتخيل قلة الحضور بقى ـ المهم دخلت والمفروض رئيس القسم بيطرد الصغيرين ـ لقيته شغال فى حالة بيخلصها قولت سلم يارب سلم الطرد جاى اهو
ونبتدى الحالة الأولى فتق فى اسفل البطن
العيان اتخدر قدامى تخدير نصفى فى المرة الاولى ولا الدموع العيان متخدرش جابوا بتاع تخدير تانى خده المرداى مظبوط وابتدى الباشا يشتغل فى العملية وانا الوحيد اللى من الصغيرين وكل ميبصلى اقول الطرد جاى اهو ـ بس والله الدكتور طلع زوق ومطردنيش ـ شكلها اشاعات طبعا هنا ولا تقدر تسأله انت مهدد بالطرد هتسأل اذاى احمد ربنا انك بتتفرج العملية مخدتش وقت وساب المساعد يقفل والمساعد تكرم عليا وقالى كلمتين اذاى تقفل وحاجات من دى وبكده الحالة الاولى تخلص فى وقت قصير جدا
وكده نتعلم نصيبك هتخده هتخده ، ومتخفش من الطرد واللى تخاف منه ميجيش أحسن منه
الحالة التانية ازالة للغدة الدرقية
كان الدكتور بيعلم حد صغير اذاى يعمل العملية وكان بيساعده فالحمدلله جت بمصلحة وكان بيشرح الخطوات خطوة خطوة وكان ماشى براحة علشان يعلم اللى معاه واحنا واقفين نستفيد برده اهو رزقك هتاخده هتاخده وبرده الامور كانت مستقرة وكالعادة الجملة المعروفة ـ العيانة بتصحى ـ وننتيمها تانى ـ طبعا هى مبتفتحش بس اهو ازعاج برده
قبل نهاية العملية حصل موقف عجيب جدا على التربيزة اللى جنبنا
الدكتور اللى بيعمل العملية جاله موبايل ـ رد عليه وقاله ياباشا انا فى العمليات ومتعقم ـ الباشا يقولوا سيب اللى فى ايدك وتعالى ـ يقولوا اقفل قاله تعالى بقولك ـ طبعا لازم يروح للباشا ويفطى بطن العيان بالفوطة ويسيبه ويمشى ـ هتقولى عرفت المكالمة منين هو اللى حكاها
المهم لما رجع بعد 10 دقايق العيان كان ابتدى يصحى بيقول لبتوع التخدير العيان بيصحى قالوا مانت اللى سبته ومشيت وهات يا كلام
والله هم يبكى وهم يضحك انا معرفتش أضحك ولا أضايق قولت اركز فى الحالة اللى واقف عليها بتفرج
وبرده فى التقفيل المساعد قالنا كلمتين فادونا
وبكده نعرف الباشا كلمك وانت فى بطن العيان ترد عليه لان كلام معاليه كلام معقم والحمدلله على اختراع الفوطة تغطى بيها وترجع هتلاقى العيان مستنيك بس الخوف ترجع مرة تلقيه صحى بجد
وكفاية كده لانى روحت بعد الحالة علشان الليستة خلصت
وكمان رجلى المرادى كانت كويسة
وإلى لقاء فى الحلقة الجاية
وياريت متكنش زهقت من الموضوع


هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية

[د. حازم]

منتظرين الحلقة القادمة
ياترى الباشا بعد التليفون راح فين؟

[الشافعى الصغير]

ياترى الباشا بعد التليفون راح فين؟

رجع يكمل شغله عادى جدا وقفل والعيان قام ولا عرف حاجة
استنونى الحلقة الجاية مفاجأت جديدة كالعادة

[هجرة إلى الله السلفية]

متعك الله بالصحةوالعافية

ويسر علي يديك شفاء المسلمين

[هجرة إلى الله السلفية]

نسأل الله لكم ولجميع اعضاء المنتدى السلامة والا نموت بسبب العمليات الجراحية وأن نموت على طاعة ولا يعذبنا بذنوبنا ولا يجعلنا نحتاج الى احد من خلقه امين امين


امين...امين....امين

وان يصلح حال اطباءنا ومستشفياتنا

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ


فى يوم 18 مارس وفى تمام الساعة التاسعة والربع صباحا ـ أتاخرت والنهاردة يوم زحمة كالعادة يبقى مصيرى المعروف مفيش بدلة واروح مكان تانى ـ وجه فى بالى اشترى بدله علشان ابقى حر نفسى ـ لسة بفكر وبتلقى التبرعات نقدا او بشيكات ـ
روحت المركز ابو تكييف وحاجة هادية ومحترمة جدا شوفت الليستة كالعادة وقبل مادخُل سألت النايب هى الحالة اللى انا كنت ناوى ادخلها فين قالى فى اوضة كذا ـ وطلعت حالة تانية ـ يلا مش مهم النصيب
الحالة الأولى إزالة الغدة اللعابية
دخلت الدكتور شافنا بصراحة ابتدى شرح لوحدة قولت الحمدلله مش مهم الحالة اللى كنت عايزها المهم الشرح طبعا واحد من المساعدين حب يتسلى عليا قالى انت تعرف الحالة ايه اصلا ـ ميعرفش انى قريت الليستة وعارف التلات حالات اللى شغالين ـ وفعلا بحمد ربنا على اختراع الليستة دى
قولتله اه طبعا الحالة هنشيل الغدة اللعابية ـ طبعا بالانجليش علشان اوقفه عند حده بقى ده انا قارى الليستة ـ فطبعا الدكتور الكبير اتبسط وقاله كلمتين ومن حفر حفرة لاخيه وقع فيها
وكمل الباشا الشرح وكان مفيد جدا وفعلا الحمدلله ان نصيبى فى الحالة الاولى كان كويس وبعد ما الباشا مشى المساعد كمل شرح لينا وكان متعاون والحالة عدت على خير
وبكده نعرف ان اهم من الحضور تعرف الليستة فعلا بتفرق كتير ومن حفر حفرة لاخيه وقع فيها

الحالة التانية فتق فى اسفل البطن
بصراحة المركز كل البشوات اللى فيه محترمين جدا ومتعاونين الحالة دى شوفت التخدير بتاعها ازاى والحمدلله وكانت الدكتورة متعاونة وشرحت ازاى نعمل تخدير نصفى وهنعمل الخطوات ازاى وايه الأفضل وايه المتاح الواحد استفاد برده
وطبعا كالعادة هى انهى ناحية وتسأل العيان وتتاكد يمين ولا شمال مش معقول هنسيب نفسنا للفضائيات ويقولوا اهمال ده مش عندنا
والدكتور اللى كان هيعمل العملية دكتور كويس ومتعاون لما ابتدى العملية فضل يشرح برده خطوة خطوة وكل لما يكون حاجة ليها تحذير او نخلى بالنا اننا منعملهاش يقول ورغم ان العملية طولت ورجلى وجعتنى كالعادة ولكن الحمدلله استفدت فى العملية التانية وقولت العجلة هتلف معانا والحمدلله ودعواتكم بقى
وبكده نعرف ان لكل مجتهد نصيب حاول تحضر وتسأل وان شاء الله العجلة هتلف معاك
الحالة التالتة إزالة الثدى
فى الحلة دى كان باين انه شمال من الاول والحالة المفروض كانت متخدرة بتكنيك جديد حاجة زى النصفى ولكن بياخد لغاية الصدر مش تحت بس طبعا الدكتور مكنش مخدرها كده علشان ده الاحسن ولكن علشان هو بيعد الحالات وعايز حالات بالتكنيك ده بس
المهم العملية ابتدت والمفروض العيانة متحسش باى حاجة من رجليها لغاية صدرها وفى احساس فى منطقة تحت الأبط وهى فايقة تكلمها ترد عليك بعد ربع ساعة ولما الدكتور ابتدى يشتغل وقطع من فوق العيانة بتحرك ايدها ورجليها وحاسة
نادى دكتور التخدير الدكتور يجى يقف شوية وبرده الجراح مش مرتاح ولا العيانة مرتاحة ولا حد مرتاح بس المهم التكنيك يتعد
لغاية فى لحظة العيانة كانت هتقوم ـ هى مجازا ـ بس رفعت رجليها وضمت اديها ولو بصت على صدرها كانت هتلاقى الناس شغالين
هنا الجراح طلع برة الاوضة وفضل ينادى على بتاع التخدير ويقول مش شغال ومش مكمل غير لما تتخدر تخدير كامل
وفعلا فى الاخر اتخدرت تخدير كامل والدكتور كمل العملية بصورة احسن كتير والحمدلله فى الاخر قال كلمتيين شرح بس بصراحة من حق مكنش يكمل العملية مكنش مرتاح فيها ولا العيانة مرتاحة واظن لو حد كان كلمه كان هيحصل مواقف مش ظريفة بس من اول ماخدت تخدير كلى الامور اتحسنت كتير والحمدلله العملية تمت على خير
وبكده نعرف ان مش كل تكنيك جديد لازم نعمله علشان الحسابة تحسب اهم حاجة راحة الدكتور والعيانة مش راحة العداد ونخلينا فى الامور التقليدية المتجربة اكيد هنرتاح ونريح اللى حولينا
وكفاية كده لانى روحت بعد الحالة دى
وكمان رجلى كالعادة
ونويت اشوف حل لرجلى ان شاء الله
وبفكر اشترى بدلة
وإلى لقاء فى الحلقة الجاية
وياريت متكنش زهقت من الموضوع



هى الكتابة بفلوس يعنى
بكرة أجازة ان شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية

[هجرة إلى الله السلفية]

هنا الجراح طلع برة الاوضة وفضل ينادى على بتاع التخدير

ماشاء الله
جزاك الله خيرا
بس ليا سؤال
من فضلك
هو بتاع التخدير بيروح فين..؟
كان علي ايامنا الدكتور اللي بيعمل العمليةوالدكتور اللي بيخدر بيفضلوا واقفين طول الوقت وحتي نهاية العملية
وان مافيش حد يخرج او يدخل عشان التعقيم
هو دلوقت بقي فيه نظام جديد والا ده طبيعي...؟
مجرد سؤال....

[د. حازم]

بتاع التخدير
العيان صحى
خدرنا مرة ثانية

ياهندسة شكلك عامل مشاكل مع اسطوات التخدير
الرجل خدر العيان ويمكن راح يأكل شندوتش

ياهندسة فى فصل عنصرى بينك وبين التخدير
ولازم نعمل قعدة عرب مع المعلم الكبير بتاع التخدير ليتم الصلح
وياريت تغيروا البنج الموجود فى المستشفى

[الشافعى الصغير]

هو بتاع التخدير بيروح فين..؟

بيكون بيتابع حالة تانية لانه المسئول عن الحالات اللى فى العمليات وحالات العناية
هو واتنين معاه
وفى المرة دى حالة فى العناية جالها اريست ـ القلب وقف ـ وكان رايح يركبها على التنفس الصناعى ويتعامل معاها
هو برده الحمل عليه كتير علشان منظلموش كلمه حق برده
واستنونى الحلقة الجاية

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ



فى يوم 22 مارس وفى تمام الساعة التاسعة صباحا ـ نازل وكل امل إنى قلاقى الدكتور اللى انا عايز اقف معاه علشان الراجل بيفهم وبيشرح لوحده وانا برتاح فى وقفته ـ
الحمدلله وصلت فى معادى ولقيت فى بدل كتير شكل النا س معدتش بتيجى او كل واحد اشترى بدلته بقى ـ عقبالنا يارب ـ شوفت الليستة ودخلت على الدكتور على طول

الحالة الأولى فتق فى اسفل البطن
دخلت الدكتور كان لسة هيبتدى الحالة ابتدى شرح فى الحالة وهيعمل ايه والخطوات وكان الدكتور ماشى خطوة خطوة فى جو من الهدوء التام والسلاسة مفيش اى حاجة غير الشرح ويتخلله حبة ضحك برده يعنى العيان كان واخد تخدير نصفى وهو كان بيشرح للمساعد بتاعه وبيخليه يعمل حاجات وطبعا بيشرحلنا معاه
وبعدين لما هو مشى المساعد خد الراية شرح اذاى هيقفل وكام حاجة كده والحمدلله الحالة خلصت فى هدوء ومن غير ما العيان يتأذى ولا يتحرك ولا تحصل مفاجأت
وبكده نتعلم انك لو كنت فى عون غير ربنا يكون فى عونك والامور تيسر فعلا
الحالة التانية دوالى فى الساق
العيانة هنا كانت تخدير نصفى وبصراحة من ساعة مدخلت وهى عاملة قلق شوية العملية هتتعمل اذاى ومين هيعملهالى واعملولى كذا وكذا ـ طبعا من حقها وانا مضيقتش ـ بس فى ناس تانية أضايقت ومكنتش عايزة صداع
الهم العملية ابتدت ـ بس قبل مقف ـ سالت الدكتور المحترم بتاع الحالة الاولى هتشتغل حالجة تانية قالى لاء كده خلاص وادانى كام نصيحة فى التخدير واقولهم ايه ـ لانى شغال تخدير أصلا ـ وانا سالته على حالة والحوار خلص وهو كان كل شوية يجى يشرح على الحالة دى
المهم العملية ابتدت والباشا مكنش ناوى يكلم وهو شغال ـ متعرفش ليه ـ بس طبعا تأتى الرياح بما لا تشتهى السفن ـ كل شوية يا دكتور كذا اتعمل كده ليه ويكلم ويرد بالقطارة ـ بس الحمدلله انه بيعبرنا برده وشوية كان بيكلم من نفسه بس طبعا الحاجة الوحيدة اللى كانت بتضايقه العيانة كل شوية تتكلم ـ وهما مش عايزين صداع ـ وحاجة تانية كانت تقطع صفو الهدوء أو الشرح ـ انهم عايزين الترابيزة لحالة تانية ، طبعا هنا هنتكلم نقول ايه بشوات مع بعض ومن حقهم أى حاجة ، كل واحد يجى خلص بسرعة شوية ياباشا التربيزة محتاجنها ـ وناسين ان العيانة فايقة معانا ، هى بدورها تقولك يادكتور مش عيزاها ترجعلى تانى وعلى مهلك
ودار الحوار كله بين تخلص بسرعة علشان التربيزة تفضى وندخل عليها حد تانى ولا تمشى على مهلك ومش مهم حد تانى
والحمدلله العملية خلصت على خير والحالة التانية اتلغت علشان الباشا اتأخر انت عارف نحن نحترم مواعيد العمل الرسمية وممنوع اننا نشتغل بعديها ول بثانية ، النظام والسيستم فوق كل شىء
وبكده نتعلم متخدش اكتر من وقتك فى اى حاجة وفى العجلة الندامة ـ بس مقدرش اعرف العيانة حصلها ايه لانى مش بتابعها غير فى العمليات بس بس ربنا يشفيها ان شاء الله ، والتربيظة اهم من العيانة فى بعض المواقف يعنى محدش سأل عليها وكانوا عايزين التربيزة ممكن علشان واثقين فى شغل الباشا
ممكن برده

وكفاية كده لانى روحت بعد الحالة دى
وكمان رجلى كالعادة
وخوفت يشيلونى التربيظة
ونويت اشوف حل لرجلى ان شاء الله
ولغيت تفكيرى انى اشترى بدلة ـ بقى فيها وفرة ـ
وإلى لقاء فى الحلقة الجاية
وياريت متكنش زهقت من الموضوع



هى الكتابة بفلوس يعنى
بكرة أجازة ان شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية

[هجرة إلى الله السلفية]

ماشاء الله
في الانتظار

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

فى يوم 24 مارس وفى تمام الساعة التاسعة صباحا ـ نازل والمرادى قولت من غير تفكير اروح على المركز المحترم تكيفيك معاك وبدلتك بتجيلك من غير متطلب والنضافة حلوة برده ـ
طلبت البدلة وبعيدن شوفت الليستة وشوفت كل دكتور داخل فين والحمدلله اخترت الحالة ودخلتها

الحالة الأولى والوحيدة النهاردة سرطان فى المثانة
لحقت الحمدالله الحالة من اولها كانت الدكتورة لسة هتخدره قولت نقف نفهم اى حاجة والحمدلله الدكتورة شرحت الخزطات بالتفصيل وكانت الاول بتخدره ـ تخدير نصفى وبعدين خدرته تخدير كامل ـ طبعا انا قولت اسال احنا لازم نفهم شوية
والحمدلله جاوبت ان العملية كبيرة ولازم نبقى مخدرين نصى ـ طبعا هو مش نصفى ولكن حاجة اسمها ابيديورل ـ المهم وبعدين العيان اتخدر وكان النايب هيخلينى اعمل الاسطرة وبعدين هو عملها وجابت دم علشان هى سرطان فى المثانة ـ طبعا انا قولت الحمدلله لو كانت جابت دم منى مكنش هيسبنى فى حالى ـ ربنا بيسترها برده
وبعدين قالى اتعقم علشان نساعد شوية ـ طبعا لازم نشكر اللى بيقدروا المواهب ـ متعرفش هو تقدير مواهب ولا مش لاقيين حد
انا اظن التانية
والعملية استغرقت حوالى 6 ساعات وطبعا انا مش قادر اوصف شعور رجلى بعد العملية
وخلال الست ساعات اتغير فيهم 3 حكيمات والباشا شرب قهوة ولكن طبعا بيعزم والكل يقولوا متشكرين يا باشا ـ مش ممكن اقوله انا هات قهوة ولا حتى مية ولا هقدر اقوله عايز اعد ـ
بس هو بصراحة كان بيشرح فى وقت الشغل وحتى المساعدين فهمونى كام حاجة كده يعنى وجع رجليا مرحش على الفاضى
وعملوا مخرج للبول بعد ماشالوا المثانة بحتة من الامعاء
وفى الاخر الدكتور خلانى اقفل معاه ، هما موقفنى 6 ساعات من غير اجرة بقى وولكن احنا اخر حاجة نفكر فيها الفلوس نحن لا نبحث عن مجد شخصى خالص والفلوس بتتصرف برده
والحمدلله العملية تمت ذى مكان متوقعلها هى اى نعم الحالة كانت وحشة جدا بس الحمدلله العملية عدت ومقفلوش وسابوها
طبعا وانا واقف كل ما يدور فى دماغى اذاى هيقدروا يلموا الليلة دى وشفاط يسحب فى الدم ويركبوا دم
كانت حاجة صعبة سبحان من علم هذا الدكتور وستر فى العملية
ولو عرفتم سبب نوع السرطان ده تحديدا فى المثانة ـ على كلامهم انه بيجى للمدخنين فقط على اخر الأراء ـ والعيان بالفعل كان حريقة سجاير وشيشة على حد كلامهم
فالحمدلله الذى من علينا بنعمة الهداية وبكده نتعلم اننا نشكر الله على نعمة الصحة والله ولا نستخدمها الا فى طاعته
فاللهم ثبتنا على الحق

وكفاية كده لانى روحت بعد الحالة دى
وكمان رجلى كالعادة بعد 6 ساعات توقع حالتها بقى
ونويت اشوف حل لرجلى ان شاء الله
وإلى لقاء فى الحلقة الجاية
وياريت متكنش زهقت من الموضوع

هى الكتابة بفلوس يعنى
بكرة أجازة ان شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية

[هجرة إلى الله السلفية]

يسر الله لك

وجزيت خيرا

اللهم اشفي مرضي المسلمين

[امال العروبة]

اسأل الله أن يشفي مرضانا ومرضى المسلمين .
جزاكم الله خيراً, وأعانكم الله, ووفقكم لما يحب ويرضى .

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ


فى يوم 25 مارس وفى تمام الساعة التاسعة صباحا ـ نازل والمرادى قولت من غير تفكير اروح على المركز المحترم تكيفيك معاك وبدلتك بتجيلك من غير متطلب والنضافة حلوة برده ذى امبارح ـ
طلبت البدلة وبعدين شوفت الليستة وكانت فاضية الحالات قليلة جدا وشوفت كل دكتور داخل فين والحمدلله اخترت الحالة ودخلتها


الحالة الأولى والوحيدة النهاردة سرطان فى الغدة الدرقية
لحقت الحمدالله الحالة من اولها كانت الدكتور لسة هتخدره قولت نقف نفهم اى حاجة ولكن الدكتور مكنش متعاون ولا اكنه شايف حد قولت مش مهم واقف واقف
والدكتور ـ الجراح ـ دخل طبعا مش لاقى حد معاه ولا اكننا فى صحرا قالى اتعقم اتعقمت وبعدين قالى هنعمل ايه فى العملية والخطوات
سالنى تفتح ـ قوتله ماشى ـ هو العيانة كانت بتاعتنا
وبعدين كان بيشرح الحمدلله كويس طبعا مش علشانى بس هو مضطر مش لاقى حد
برده العدد القليل والغيابات مفيد فى المواقف اللى ذى دى
وبعدين وصلنا للغدة وكان المفروض هيشلها ولكن الحاجة الوحيدة اللى كانت تضايق فى العملية مش الوصول للغدة
التخدير
من غير مبالغة العيانة كانت بتصحى كل ربع ساعة ولكن هنكمل هنكمل
وبعدين فى مرحلة ما بعد ازالة الغدة ـ هما شالوا نصها ـ والمفروض ابعتت تتحل
وبعدين شال النص التانى ـ طبعا المفروض النتيجة تيجى فى وسط العملية ـ
النتايج مجتش غير بعد ما العملية خلصت واتشالت الغدة كلها وحتى النتيجة مكنتش مؤكده ولكن اشتباه فى ورم
واصعب موقف فعلا فى وقت تقفيل الحالة والغرز بتتاخد الجلد العيانة لا ابالغ انها فاقت فى الاخر ـ مش بتصحى ذى كل مرة ـ
ودكتور التخدير يقولها متتحركيش وفى الاخر مسك راسها والحكيمات مسكت اديها ورجليها علشان كانت بتتحرك فعلا وبتقوم
وسبحان من يسر اخر غرزتين وانا عن نفسى مش فاهم لغاية دلوقتى لي دكاترة التخدير بتستعجل فى تفويق العيان ـ حد يجاوبنى ـ
وبكده نتعلم ان فى العجلة مش الندامة لا والله ده اللى شوفته حاجة غير آدمية أصلا لما العيانة تفوق علشان فرق 5 دقايق الدكتور هيتاخر فيهم ـ الا لو فى حاجة انا مش بفهمها وطبعا واحد ذى الدكتور ده مقدرش اساله بتصحى بدرى ليه ـ
وكفاية كده لانى روحت بعد الحالة دى لان مكنش فى غيرها
ورجلى المرادى الحمدلله موجعتنيش
وإلى لقاء فى الحلقة الجاية
وياريت متكنش زهقت من الموضوع

هى الكتابة بفلوس يعنى
بكرة أجازة ان شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية

[أم أحمد عبد القوى]

جزاكم يا اطباء كل خير ويارب يجعل فى قلوبكم الرحمة والرأفة بالناس

وأعانكم الله على عملكم وبارك الله فيكم

[د. حازم]

يادكتور قلت لك غير نوع البنج أو غيروا المرضى الفايقيين

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ



فى يوم 29 مارس وفى تمام الساعة التاسعة صباحا ـالمرادى مكنتش متشجع انى انزل مش عارف ليه ـ
طلبت البدلة وبعدين شوفت الليستة وكانت فاضية الحالات قليلة جدا وشوفت كل دكتور داخل فين والحمدلله اخترت الحالة ودخلتها



الحالة الأولى فتق اسفل البطن
لحقت الحمدالله الحالة من اولها كانت الدكتور لسة هتخدره قولت نقف نفهم اى حاجة ولكن الدكتور مكنش متعاون ولا اكنه شايف حد قولت مش مهم واقف واقف
والدكتور ـ الجراح ـ دخل طبعا مش لاقى حد معاه ولا اكننا فى صحرا قالى اتعقم اتعقمت ـ ذى اليوم اللى قبليها ـ وبعدين قالى هنعمل ايه فى العملية والخطوات
وبعدين الدكتور كان ماشى بالتصوير البطئ الحالة الوحيدة اللى هيعملها وشغال على مهله خالص لا حاجة يعملها يكلم عليها كلمتين ولو انا عايز احس واشوف بايدى مسموحلى ـ يعنى كانت الامور الحمدلله ماشية كويسة ـ والعجلة ابتدت تلف شوية
اول مرة قلاقى واحد بيكلم بالاخلاص ده وشغال بمزاج مفيش دوشة ولا عيان بيصحى ولا حد بيزعق
هدوء تام لا يقطعه الا شرح الدكتور
والحمدلله الحالة عدت على خير والواحد استفاد من شرح الدكتور واتفرج بحوالى 5 جنيه على حاجات مظنش ممكن تتاح الفرصة تانى انى اشوفها او اعرفها
والحمدلله الدكتور كان كريم معايا وقالى اقفل اذاى وساعدنى
وبكده نعرف ان العيب مش فى الدكتور ولا فى التخدير
العيب فى زحمة العيانين

الحالة الثانية شرخ فى الشرج
العيانة دخلت لما الناس كلها تقريبا جت الوقت بقى 11.30 تقريبا وكان الطلبة كلها جت ومش هقدر اوصف الزحمة اللى كانت موجودة مش علشان الحالة دى تحديدا ولكن علشان يتفرجوا على حالات وبصراحة ربنا يكون فى عون العيانة كان الوضع فى نظرى غير آدمى برده ولكن فى نفس الوقت المفروض نتعلم وحد يشرح
ولغاية دلوقتى مش عارف حل لهذه المعادلة اللى فى نظرى انها صعبة يا تتعلم يا تخلى بالك من العيان ( نبحث عن حل )
وانا مكملتش الحالة عن نفسى علشان الدكتور مشرحش ذى ما كنت متوقع وبصراحة برده عرفت ان النهاردة معاد القبض والحمدلله انى نزلت لأنى مكنتش ناوى انزل
وبعدين روحت اقبض أول مرتب فى حياتى رغم صغره الا والله كان ليه طعم تانى وفرحة تانية
مش انا بس لكن لما شوفت كل اللى واقفين كانوا فرحانين
فالحمدلله شوفت اليوم اللى قبضت فيه

ونطمئنكم انه مازال فى المرتب بقيه
ونتقبل اى فيتامينات ومقويات للمرتب من فئة 100 جنية او 200 جنية
لاسعافه قبل ان توفاه المنية قبل بداية الشهر
فالله المستعان
تعاطفك لوحده مش كفاية تبرع ولو بـ 200 او فى اسوأ الاحول 100 جنية


وكفاية كده لانى روحت فرحان بالمرتب
وإلى لقاء فى الحلقة الجاية
وياريت متكنش زهقت من الموضوع


هى الكتابة بفلوس يعنى
نشوفكم الحلقة الجاية
ولو غيبت شوفنى فى المستشفى
ولا تنسونى من دعائكم
استنونى الحلقة الجاية

[د. حازم]

اول مرتب حكومى الاساسى 70 جنيه والحوافز 40 جنيه كان ذلك فى نهاية ديسمبر 1988
والحمد لله بعد الدكتوراه والاستاذية الحالة أصبحت عال والحمد لله المرتب 1700جنيه يعنى تستلف حتى تكمل مصاريف المدارس

[الشافعى الصغير]

اول مرتب حكومى الاساسى 70 جنيه والحوافز 40 جنيه كان ذلك فى نهاية ديسمبر 1988

الحمدلله رب العالمين ربنا يزود من العلاوات والزيادات
فعلا البلد بتتحرك لقدام وهناك اهتمام رفيع المستوى بمحدودى الدخل
المرتب زاد زاد وانا مش هقول علشان متحسدش بقى
وربنا يخلى الطابق مستور ويجعله عامر

وانتظروا مراسلنا فى ثوب جديد

[هجرة إلى الله السلفية]

ماشاء الله

متابعون معك

[د. حازم]

هو الباشا الصغير فين؟

[الشافعى الصغير]

هو الباشا الصغير فين؟

يبحث عن ماذا سيقدمه وذلك لتكرار المواقف فى الشهر الحالى ايضا
فخشيت على القارئ من الملل
وجزاكم الله خيرا على السؤال

[د. حازم]

الحمد لله انك بخير
خفت عليك لان الناس عرفت انك قبضت اول مرتب
ونخاف عليك من الحسد
عموما نحن فى الانتظار

[طالب النجاة]

بسم الله الرحمن الرحيم
جزاك الله خيرا دكتور المستقبل إن شاء الله
طيب سبت الموضوع ومعدتشي بتكمله
شوفت مشاركتي كنت تاني واحد أنا شاركت علشان أقول رأيي
أنا قرأت الحالات وبعدين قلت رجلك
... طبيب يداوي الناس والطبيب عليل
طبعا مستغرب
الوهم عدا خلاص
شكرا استفدت معاك كأنك ادخلني غرفة العمليات
وأنا في مكاني كأن أنا اللي بعمل العملية
الواحد بعد كده يخلي باله وميلفش كتير


قصة صغيرة
كان هناك زوجة بتخلي بالها من كل حاجه المهم حست إن قلبها مش طبيعي راحت للدكتور قلها الصمام عايز عملية توسعة
راحت لدكتور تاني قلها أنت كويسه
صدقت الأول
زوجها نصحها
قلها أنت تمام أنت معندكيش حاجه أنا جوزك أنت طبيعية خالص صدقيني
صدقت نفسها وعملت العملية و أثناء العملية
ماتت
قصة مؤثرة مؤلمة

[الشافعى الصغير]

جزاكم الله خيرا اخونا الحبيب للمتابعة والسؤال
ولكن سبب التوقف هو تكرار المواقف وظننت انه لم يعد جديد اقدمه فما تم عرضه خلال هذا الشهر هو نفس سيناريو باقى الاحوال
فلذلك وددت الاعداد لفكرة جديدة نسأل الله لنا التيسير
وجزاكم الله خيرا

[هجرة إلى الله السلفية]

فلذلك وددت الاعداد لفكرة جديدة نسأل الله لنا التيسير

امين
وفي الانتظار
متابعون معك

[الشافعى الصغير]

ذكريات...
فنسأل الله أن يجعلنا سببا فى علاج مرضى المسلنيت
فدائما نجد بالمستشفيات آلام وأفراح ... ولكن ما كثر آلامها
نسأل الله أن يخفف عنهم
ونهيب باخوانى أن يوجهوا زكاتهم إلى علاج مرضى المسلمين وبناء مستشفيات لهم
فلم أجد آلم اشد من آلم المرض الذى لا علاج له ...
احساس صعب وانت تنتظر الموت ونظرات من حولك تبلغك بموتك حتى وان لم تخبرك السنتهم بذلك
فالله المستعان